Bibinagar : ఉద్యోగ నియామకాల్లో స్థానికులకు ప్రాధాన్యం ఇవ్వాలి : ఎంపీ చామల

ఉద్యోగ నియామకాల్లో స్థానికులకు ప్రాధాన్యం ఇవ్వాలని, భ‌వ‌న‌ నిర్మాణ పనులను నిర్ణీత గడువులోగా పూర్తి చేయాలని భువనగిరి ఎంపీ, బీబీనగర్‌ ఎయిమ్స్​‍ పాలక మండలి సభ్యుడు చామల కిరణ్‌ కుమార్‌ రెడ్డి అన్నారు.

బీబీనగర్‌, నవంబర్ 03 : ఉద్యోగ నియామకాల్లో స్థానికులకు ప్రాధాన్యం ఇవ్వాలని, భ‌వ‌న‌ నిర్మాణ పనులను నిర్ణీత గడువులోగా పూర్తి చేయాలని భువనగిరి ఎంపీ, బీబీనగర్‌ ఎయిమ్స్​‍ పాలక మండలి సభ్యుడు చామల కిరణ్‌ కుమార్‌ రెడ్డి అన్నారు. సోమ‌వారం మండల పరిధిలోని బీబీనగర్‌ ఎయిమ్స్​‍ను ఆయన సందర్శించి నిర్మాణ పనులుతో పాటు వివిధ అంశాలపై సమీక్ష సమావేశం నిర్వహించారు. ఈ సందర్భంగా ఎంపీ మాట్లాడుతూ.. ఉద్యోగ నియామకాలు పారదర్శకంగా చేప‌ట్టాల‌ని, స్థానిక యువతకు అవకాశాలు ఇవ్వాలని అధికారులకు సూచించారు.

అనంతరం ఎయిమ్స్‌ డైరెక్టర్ డాక్ట‌ర్ అమితా అగర్వాల్‌ ఎయిమ్స్​‍ అభివృద్ధిలో భాగమైన పలు అంశాలు, ప్రభుత్వం తరపున ఎయిమ్స్​‍ పరిధిలో అగ్నిమాపక కేంద్రం ఏర్పాటు, ఎయిమ్స్​‍ బీబీనగర్‌ వద్ద అన్ని బస్సులు ఆగేలా చర్యలు, ఉప్పల్‌ నుండి ఎయిమ్స్​‍ వరకు ప్రత్యేక బస్సు సేవలు ప్రారంభించేలా కృషి చేయాలని కోరుతూ ఎంపీకి ప్రతిపాదనలు అంద‌జేశారు. ఈ ప్రతిపాదనలపై ఎంపీ చామల సానుకూలంగా స్పందిస్తూ సంబంధిత అధికారులతో చర్చించి తగిన చర్యలు తీసుకుంటామని హామీ ఇచ్చారు. అధేవిధంగా నిర్మాణ సంస్దలు ఎన్‌సిసి, హైట్స్​‍ ప్రతినిధులతో పనుల పురోగతిపై సమీక్ష నిర్వహించి నిర్ణీత గడువులోగా పనులు పూర్తి చేయాలని పేర్కొన్నారు.