కరెంట్‌ ‘కట్‌’కట.. వేళాపాలా లేని విద్యుత్‌ కోతలు

యాదాద్రి భువనగిరి జిల్లాలో 4.30 లక్షల విద్యుత్‌ కనెక్షన్లు ఉండగా, అందులో 2.70లక్షల గృహ వినియోగం కనెక్షన్లు ఉన్నాయి. ప్రస్తుతం 200ఎంయూ(మిలియన్‌ యూనిట్ల) విద్యుత్‌ డిమాండ్‌ ఉన్నది. వేసవి కావడంతో కరెంట్‌ భారీగా వినియోగిస్తున్నారు. జిల్లాలోని పలు మండలాల్లో విద్యుత్‌ కోతలతో జనం అల్లాడిపోతున్నారు.

• నిత్యం ఐదు నుంచి ఏడు సార్లు కట్‌
• పోయినప్పుడల్లా 15 నిమిషాలపైనే..
• చినుకులు పడ్డా.. గాలి వీచినా అంతే..
• వానొస్తే గంటల తరబడి సరఫరా బంద్‌
• వేసవిలో ఉక్కిరిబిక్కిరవుతున్న జనం
• బీఆర్‌ఎస్‌ హయాంలో నాన్‌ స్టాప్‌ వెలుగులు

జిల్లాలో కరెంట్‌ కష్టాలు షురూ అయ్యాయి. అటు అనధికారికంగా కోతలు.. ఇటు వర్షాలు, గాలి దుమారంతో విద్యుత్‌ సరఫరా లేక జనం ఉక్కిరిబిక్కిరవుతున్నారు. అసలే ఎండాకాలం కావడంతో విలవిల్లాడుతున్నారు. కరెంట్‌ ఎప్పుడు పోతుందో.. ఎప్పుడు వస్తుందో తెలియని పరిస్థితి నెలకొంది. తాజాగా భువనగిరిలో కరెంట్‌ కోసం రోడ్డెక్కి ఆందోళన చేపట్టడమే ఇందుకు నిదర్శనం.

యాదాద్రి భువనగిరి, ఏప్రిల్‌ 4 (నమస్తే తెలంగాణ) : యాదాద్రి భువనగిరి జిల్లాలో 4.30 లక్షల విద్యుత్‌ కనెక్షన్లు ఉండగా, అందులో 2.70లక్షల గృహ వినియోగం కనెక్షన్లు ఉన్నాయి. ప్రస్తుతం 200ఎంయూ(మిలియన్‌ యూనిట్ల) విద్యుత్‌ డిమాండ్‌ ఉన్నది. వేసవి కావడంతో కరెంట్‌ భారీగా వినియోగిస్తున్నారు. జిల్లాలోని పలు మండలాల్లో విద్యుత్‌ కోతలతో జనం అల్లాడిపోతున్నారు. ప్రతి రోజూ 5నుంచి 7సార్లు కరెంట్‌ కట్‌ చేస్తున్నారు. ప్రతి సారి 15నిమిషాల నుంచి 20 నిమిషాల పాటు సరఫరా నిలిచిపోతున్నది. ఈ లెక్కన రోజుకు సుమారుగా 2నుంచి 5 గంటల పాటు కరెంట్‌ ఉండటం లేదు. వేసవి కావడంతో ఇంట్లో ఉండలేక, బయటికి రాలేక సతమతమవుతున్నారు. ఇంట్లో శుభకార్యం ఉందంటే చాలు కుటుంబ సభ్యులు, బంధు మిత్రులు కరెంట్‌ కోత కారణంగా ఉక్కపోతతో ఉక్కిరిబిక్కిరవుతున్నారు. చిన్నారులు, వృద్ధుల పరిస్థితి ఇక చెప్పనక్కర్లేదు. మధ్యాహ్న సమయంలో పవర్‌ కట్‌ చేస్తుండటంతో కొందరు చెట్ల కింద సేద తీరుతున్నారు. రాత్రి పూట కరెంట్‌ కోతతో నిద్ర కరువవుతున్నది. విద్యుత్‌ అధికారులకు ఫిర్యాదు చేస్తే తప్ప పట్టించుకోవడం లేదనే ఆరోపణలు వినిపిస్తున్నాయి.

చిన్నపాటి వర్షం వచ్చినా..

కరెంట్‌ కోతలు అటుంచితే చిన్నపాటి వర్షం పడినా, గాలి వీచినా విద్యుత్‌ సరఫరా నిలిచిపోతున్నది. గంటల తరబడి కరెంట్‌ రావడం లేదు. రాత్రి, పగలు అనే తేడా లేకుండా కట్‌ చేస్తున్నారు. గత నెల రోజులుగా ఇదే పరిస్థితి నెలకొంది. కరెంట్‌ సరఫరాలో తరచూ అంతరాయంతో వ్యాపార, వాణిజ్య వర్గాలపై ఎక్కువగా ప్రభావం పడుతున్నది. అంతరాయానికి నెలకొరిగిన స్తంభాల పునరుద్ధరణ, చెట్ల కొమ్మలు తొలగింపు కారణంగా విద్యుత్‌ నిలిపివేస్తున్నామని విద్యుత్‌ అధికారులు చెబుతున్నారు.

పాడవుతున్న గృహోపకరణాలు..

విద్యుత్‌ సరఫరాలో అంతరాయమే కాకుండా కొన్ని సార్లు హెచ్చు తగ్గులు కూడా ఉండటంతో గృహోపకరణాలు పాడవుతున్నాయి. తరచుగా కరెంటు వస్తూ, పోతూ ఉండటంతో ఇండ్లలో టీవీలు, రిఫ్రిజిరేటర్లు, ఇతర విద్యుత్‌ వస్తువులు చెడిపోతున్నాయని పలువురు ఆందోళన వ్యక్తం చేస్తున్నారు. ఇప్పటికైనా అధికారులు చర్యలు, తీసుకుని గతంలో మాదిరి నిరంతరం కరెంటు సరఫరా చేసేలా చర్యలు తీసుకోవాలని ప్రజలు కోరుతున్నారు.

గత పదేండ్ల పాలనలో నిరంతర వెలుగులు

పదేండ్ల బీఆర్‌ఎస్‌ పాలనలో విద్యుత్‌ సరఫరాలో ఏనాడూ డోకా లేదు. పిడుగులు పడినా, భారీ వర్షాలు కురిసినా కరెంట్‌ పోయిన సందర్భాలు తక్కువ. రెడ్‌ అలెర్ట్‌లోనూ సరఫరా చేసింది. నాటి ప్రభుత్వం విద్యుత్‌ వ్యవస్థను బలోపేతం చేసి, అవసరాలకు అనుగుణంగా లైన్లు, ట్రాన్స్‌ఫార్మర్లు ఏర్పాటు చేసింది. 24గంటలపాటు సిబ్బంది అందుబాటులో ఉండి.. నిరంతరాయంగా విద్యుత్‌ సరఫరా చేసింది. కానీ ఇప్పుడు మళ్లీ ఉమ్మడి రాష్ట్ర పరిస్థితులు కనిపిస్తున్నాయని పలువురు పేర్కొంటున్నారు.

జిల్లాలో పరిస్థితి ఇలా..

• తుర్కపల్లి మండల పరిధిలో రాత్రి పగలు తేడా లేకుండా కరెంటు కోతలు ఏర్పడుతున్నాయి. ప్రతిరోజూ ఏడు నుంచి 8 సార్లు కరెంటు పోతున్నది. పోయిన ప్రతిసారి పావుగంట నుంచి అరగంట కట్‌ చేస్తున్నారు. వర్షాలు వచ్చినప్పుడు గంటల తరబడి విద్యుత్‌ ఉండటం లేదు.
• భువనగిరి మండలంలో చిన్న గాలి దుమారానికి కరెంటు పోతుంది. రోజుకు 5 నుంచి 10 సార్లు కరెంటు సరఫరా నిలిపోతున్నది. గాలివాన వచ్చినప్పుడు గంటల తరబడి కరెంటు తీసివేస్తున్నారు.
• ఆలేరు పట్టణ కేంద్రంలో రోజుకు నాలుగైదు సార్లు కరెంటు పోతున్నది. 10 నుంచి 15 నిమిషాల తర్వాత విద్యుత్‌ సరఫరా పునరుద్ధరిస్తున్నారు. ఈదురుగాలులతో వర్షం వచ్చినప్పుడు కరెంటు బంద్‌ చేస్తున్నారు.
• యాదగిరిగుట్టలో వర్షం వస్తే చాలు కరెంట్‌ పోయి గంట వరకు రావడం లేదు. చిన్న గాలి దుమారం వల్ల కూడా కరెంట్‌ పోతున్నది.
• గుండాల మండల పరిధిలోని అన్ని గ్రామాల్లో ఈదురుగాలల సమయంలో కరెంట్‌ పోతున్నది. కరెంట్‌ పునరుద్ధరణకు అరగంటకు పైగా సమయం పడుతున్నది.
• ఆత్మకూరు ఎం, మండలం పరిధిలో అన్ని గ్రామాల్లో ఈదురు గాలులు వచ్చినప్పుడు విద్యుత్‌ అంతరాయం జరుగుతున్నది. అరగంట నుంచి గంట వరకు పునరుద్దరణకు సమయం తీసుకుంటున్నారు.
• మోత్కూర్‌లో వర్షం పడితే అరగంట నుంచి 45 నిమిషాల వరకు విద్యుత్‌ సరఫరా నిలిపేస్తున్నారు.
• భూదాన్‌ పోచంపల్లిలో వర్షాలు వచ్చినప్పుడు కరెంటు కోత ఏర్పడుతున్నది. కరెంట్‌ ఎప్పుడు వస్తుందో ఎప్పుడు పోతుందో అర్థం కావడం లేదు. పగలు రాత్రి తేడా లేకుండా తరచూ కరెంటు సరఫరా నిలిచిపోతున్నది.