మండుతున్న ఎండలు.. ముందు జాగ్రత్త మేలు

ఉమ్మడి జిల్లా వ్యాప్తంగా ఉష్ణోగ్రతలు పెరుగుతున్నాయి. 37నుంచి 39 డిగ్రీల ఉష్ణోగ్రతలు నమోదు కావడం, ఉక్కపోత ఉండడంతో ప్రజలు బెంబేలెత్తిపోతున్నారు. ఉదయం తొమ్మిది గంటల నుంచే ఎండలు మండిపోతుండడంతో జనం బయటకు రావాలంటేనే జంకుతున్నారు.

• వారం నుంచి హడలెత్తిస్తున్న సూర్యుడు
• 38డిగ్రీలకు పైగా ఉష్ణోగ్రతలు నమోదు
• ఎండ వేడితో వడదెబ్బ, చర్మవ్యాధులు వచ్చే ప్రమాదం
• వృద్ధులు, పిల్లలపై ప్రత్యేక శ్రద్ధ అవసరం
• జాగ్రత్తలు తీసుకోవాలంటున్న వైద్య నిపుణులు

నీలగిరి, ఏప్రిల్‌ 19 : ఉమ్మడి జిల్లా వ్యాప్తంగా ఉష్ణోగ్రతలు పెరుగుతున్నాయి. 37నుంచి 39 డిగ్రీల ఉష్ణోగ్రతలు నమోదు కావడం, ఉక్కపోత ఉండడంతో ప్రజలు బెంబేలెత్తిపోతున్నారు. ఉదయం తొమ్మిది గంటల నుంచే ఎండలు మండిపోతుండడంతో జనం బయటకు రావాలంటేనే జంకుతున్నారు. రాబోయే రోజుల్లో ఎండ తీవ్రత మరింత పెరిగే అవకాశం ఉంది. ఈ క్రమంలో చర్మ వ్యాధులు, వడదెబ్బ, మూత్ర పిండాల్లో రాళ్లు, ఇన్‌ఫెక్షన్లు, గొంతు, ఒంటి నొప్పులు, చర్మం నల్లబారడం వంటివి వచ్చే అవకాశం ఉంది. వీటికి గురికాకుండా ప్రజలు తగిన జాగ్రత్తలు తీసుకోవాలని జిల్లా వైద్యారోగ్య శాఖ అధికారులు సూచిస్తున్నారు. ముఖ్యంగా ఆరు సంవత్సరాల్లోపు పిల్లల పట్ల ప్రత్యేక శ్రద్ధ తీసుకోవాలంటున్నారు.

వడదెబ్బ లక్షణాలు

వేసవిలో వడదెబ్బ అతి ప్రమాదకరమైంది. మెదడులో ఉష్ణోగ్రతను నియంత్రించే వ్యవస్థ పని చేయకపోవడం వల్ల ఇది వస్తుంది. సాధారణంగా వ్యక్తి శరీర ఉష్ణోగ్రత 98.4 డిగ్రీల ఫారెన్‌ హీట్‌. ఇంతకంటే ఎక్కువ అయితే (105 డిగ్రీల నుంచి 107 డిగ్రీల ఫారెన్‌ హీట్‌) దాటితే వడదెబ్బ వస్తుంది. మొదట తలనొప్పి, తల తిరుగడం, సరిగ్గా చూడలేకపోవడం జరుగుతుంది. రక్తపీడనం మామూలు కంటే తక్కువగా ఉంటుంది. శరీరం నుంచి చెమట కారుతుంది. ఈ సమయంలో వైద్యం అందకపోతే వ్యక్తి స్పృహ కోల్పోయి మరణించే ప్రమాదం ఉంటుంది.

చికిత్స..

వడదెబ్బ బారిన పడిన వ్యక్తిని చల్లని ప్రదేశంలోకి చేర్చి శరీరం మీద దుస్తులను తొలగించాలి. శరీరాన్ని తడి బట్టతో తుడిచి, తడి బట్టతో కప్పాలి. ఫ్యాన్‌ ఉంటే పెట్టాలి. శరీర ఉష్ణోగ్రత 101 నుంచి 102 డిగ్రీల ఫారెన్‌ హీట్‌ తగ్గే వరకు ఇలా చేయాలి. శరీర ఉష్ణోగ్రత మామూలు స్థితికి రాగానే వైద్యుడి దగ్గరకు తీసుకెళ్లి చికిత్స అందించాలి.

తీసుకోవాల్సిన జాగ్రత్తలు

• ఎండకు బయటకు వెళ్లాల్సి వస్తే విధిగా గొడుగులను లేదా నీడ కోసం ఇతర వస్తువులను తీసుకెళ్లాలి. ఉన్ని దుస్తులను ధరించాలి. తలపాగా లేదా టోపీని ధరించాలి
• నీరసంగా ఉన్నవారు ముఖ్యంగా వృద్ధులు, పిల్లలను ఎక్కువ సేపు ఎండలోకి వెళ్లనీయవద్దు.
• ఎండలో వెళ్లాల్సి వస్తే గంటకు ఒక గ్లాసు, రోజుకు ఐదు లీటర్ల నీటిని తాగాలి. అవసరమైతే ఉప్పు, పంచదార కలిపిన నీటిని గానీ, మజ్జిగ గానీ తీసుకోవాలి.
• సీజనల్‌ పండ్ల రసాలు, కొబ్బరి నీళ్లు తాగాలి.
• కూల్‌డ్రింక్స్‌, శీతల పానియాలు, ఐస్‌క్రీమ్‌లను పూర్తిగా నిషేధించాలి.
• 2నుంచి 6సంవత్సరాల్లోపు పిల్లలకు అరగంటకోసారి నీళ్లు తాగించాలి. 2నుంచి 4 సంవత్సరాల్లోపు పిల్లలకు రోజుకు 12నుంచి 14 గ్లాసుల నీళ్లు తాగించాలి.
• గంజిలో ఉప్పు కలుపుకొని తాగడం మంచిది.
• వేసవిలో తెల్లని, లైట్‌ కలర్‌ కాటన్‌ దుస్తులు ధరించాలి.
• మెడపై సూర్యరశ్మి పడకుండా టవల్స్‌, చున్నీ వంటివి చుట్టుకోవాలి.

అప్రమత్తంగా ఉండాలి

వేసవిలో ముందు జాగ్రత్తలు తీసుకుంటే వడదెబ్బ, వేడి వల్ల సంభవించే వ్యాధులకు గురి కాకుండా ఉండవచ్చు. వాతావరణంలో వచ్చిన మార్పులతోపాటు ఉష్ణోగ్రతలు పెరుగడంతో చర్మ వ్యాధులు, వడదెబ్బ, డీ హైడ్రేషన్‌, మూత్రపిండాల్లో రాళ్లు, శ్వాస సంబంధిత వ్యాధులు వచ్చే అవకాశం ఉంటుంది. నీటిని బాగా తాగడంతోపాటు చలువ కోసం కొబ్బరి నీళ్లు, పండ్ల రసాలు తీసుకోవాలి. శరీర నీటి శాతం పెంచే పుచ్చ, కర్బూజను బాగా తినాలి. మజ్జిగ బాగా తాగాలి. వేసవి దృష్ట్యా జిల్లా వ్యాప్తంగా 40వేల ఓఆర్‌ఎస్‌ ప్యాకెట్లను అందుబాటులో ఉంచాం.

– డాక్టర్‌ పుట్ల శ్రీనివాస్‌, జిల్లా వైద్యారోగ్య శాఖ అధికారి, నల్లగొండ