అదును దాటలేదు.. ఆందోళన వద్దు

ఈ ఏడాది రుతు పవనాలు కొంత ఆలస్యంగా వచ్చాయి. జిల్లాలో వర్షాలు వారం రోజులుగా కురుస్తున్నాయి. కానీ పంటల సాగు సమయం దాటి పోయిందని రైతులు ఆతృత పడుతున్నారు.

• తక్కువ కాల పరిమితి విత్తనాల ఎంపిక ఉత్తమం
• మిశ్రమ పంటల సాగు లాభదాయకం
• వరిలో నేరుగా విత్తే పద్ధతిపై శ్రద్ధ వహించాలి
• ఆరుతడి పంటలను జూలై చివరి వరకు సాగు చేయొచ్చు
• కేవీకే శాస్త్రవేత్త నరేశ్‌

ఈ ఏడాది రుతు పవనాలు కొంత ఆలస్యంగా వచ్చాయి. జిల్లాలో వర్షాలు వారం రోజులుగా కురుస్తున్నాయి. కానీ పంటల సాగు సమయం దాటి పోయిందని రైతులు ఆతృత పడుతున్నారు. వాస్తవంగా వివిధ రకాల పంటల సాగుకు విత్తుకోవడానికి సమయం దాటిపోలేదని.. పంటల ఎంపిక, తక్కువ కాల పరిమితి గల రకాలను ఎంచుకోవడం కీలకమని గడ్డిపల్లి కేవీకే పంటల విభాగం శాస్త్రవేత్త దొంగరి నరేశ్‌ తెలిపారు. స్వల్ప, మధ్య, దీర్ఘకాలిక రకాలను బట్టి వరి నారు ఈ నెల 20 నుంచి జూలై చివరి వరకు పోసుకోవచ్చని.. పత్తి, మొక్కజొన్న, కంది, వేరుశనగ, పెసర, మినుము జూలై 20-30 వరకు విత్తుకోవచ్చని చెప్పారు. మిశ్రమ పంటల సాగు లాభదాయకంగా ఉంటుందని తెలిపారు.

-గరిడేపల్లి, జూన్‌ 26

కేరళను ఈ నెల తాకవలసిన ఈశాన్య రుతుపవనాలు 8న తాకాయి. అయితే చాలా మంది రైతులు ఇప్పటికే పంటల సాగు సమయం దాటిపోయిందని ఆందోళన చెందుతున్నారు. వాస్తవంగా వివిధ పంటలను విత్తుకోవడానికి సమయం దాటిపోలేదు. మెట్ట పంటలను జూలై చివరి వరకు వేసుకోవచ్చని, రైతులు ఆందోళన చెందవద్దని గడ్డిపల్లి కృషి విజ్ఞాన కేంద్రం పంటల విభాగం శాస్త్రవేత్త దొంగరి నరేశ్‌ నమస్తే తెలంగాణకు వివరించారు. ఏ పంటను ఎప్పుడు సాగు చేసుకోవాలి. ఎలాంటి పద్ధ్దతులను అవలంబిస్తే మంచి లాభాలు పొందవచ్చో ఆయన వివరించారు. అదనపు సమాచారం కోసం 9290615952 నెంబర్‌లో ఆయనను సంప్రదించవచ్చు.

– గరిడేపల్లి, జూన్‌ 26

రుతుపవనాల రాక ఆలస్యమైనప్పుడు పంటల ఎంపిక కీలకం. ఈ సమయంలో తక్కువ కాల పరిమితి గల రకాలను ఎంచుకోవాలి. 10 – 15 శాతం ఎక్కువ విత్తనాలను వేసుకోవాలి. నీటి వినియోగం తక్కువగా ఉండే పంటలను, బెట్ట పరిస్థితులను తట్టుకునే రకాలను వేసుకోవాలి. అంతర పంటలు లేదా మిశ్రమ పంటలను సాగు చేసుకోవాలి. అంతర పంటల్లో ధాన్యం పంటలకు బదులు పప్పుదినుసులు లేదా నూనె గింజల పంటలను వేసుకోవాలి. సోయాచిక్కుడు, పత్తి పంటలను తేలికపాటి నేలల్లో వర్షాధారపు పంటలుగా విత్తుకోకూడదు. ఈ సంవత్సరం వానకాలంలో సాధారణ వర్షపాతం నమోదు కావచ్చని వాతావరణ శాఖ ప్రకటించింది. వాతావరణ సూచనలను రైతులు పాటిస్తూ పంటలను వేసుకోవాలి.

• వరి : దీర్ఘకాలిక రకాలు (140 – 150 రోజులు) జూన్‌ 20 వరకు, మధ్యకాలిక రకాలు (130 – 135 రోజులు) జూలై 10 వరకు, స్వల్పకాలిక రకాలవి (120 – 125 రోజులు) జూలై చివరి వరకు నార్లు పోసుకోవచ్చు. నేరుగా విత్తే పద్ధతులపై (దమ్ము చేసి లేదా దమ్ము చేయకుండా సీడ్‌ కం పర్టీడ్రిల్‌) రైతులు శ్రద్ధ వహించాలి.
• పత్తి : జూలై 20వరకు పత్తి విత్తనాలు విత్తుకోవచ్చు. తేలిక నేలల్లో 50 – 60 మిల్లీమీటర్లు, బరువు నేలల్లో 60 – 75 మి.మీ. వర్షపాతం నమోదైన తర్వాత మాత్రమే విత్తుకోవాలి. లేదా నేల 15 సెంటీమీటర్ల లోతు వరకు తడిసిన తర్వాత మంచి తేమతో పత్తిని విత్తుకుంటే భూమిలో వేడి తగ్గి మొలక శాతం బాగుంటుంది. న్యూమాంటిక్‌ ప్లాంటర్‌ యంత్రం ద్వారా అధిక సాంద్రత పద్ధతిలో 90X15 సెంటీమీటర్ల దూరంలో (హెక్టారుకు 74,074 మొక్కలు) విత్తుకోవచ్చు.
• కంది : పత్తిలో అంతర పంటగా కంది సాగు చేస్తే మంచి దిగుబడి వస్తుంది. కంది పంటను పెసర, మినుము, వేరుశనగ, పత్తి, ఆముదం ఇతర పంటల్లో అంతర పంటగా విత్తుకోవచ్చు. సరైన యాజమాన్య పద్ధతులు చేపట్టడం ద్వారా ఆగస్టు 15 వరకు కందిని విత్తుకోవచ్చు.
• సోయాచిక్కుడు : జూన్‌ చివరి వరకు విత్తుకోవచ్చు. సరైన సస్యరక్షణ చర్యలు చేపట్టి జూలై మొదటి వారం వరకు కూడా విత్తి మంచి దిగుబడులు సాధించవచ్చు.
• మొక్కజొన్న : జూలై 15 వరకు మొక్కజొన్నను విత్తుకోవచ్చు. మొక్కజొన్న నీటి ఎద్దడిని తట్టుకోలేదు. కాబట్టి బోదె మరియు సాళ్ల పద్ధతి ఆచరించడం ద్వారా పంటకు ఎక్కువ కాలం తేమ అందుబాటులో ఉంటుంది.
• పెసర, మినుము : జూలై 15 వరకు విత్తుకోదగ్గ పంటలు. సరైన మొక్కల సంఖ్యను పాటించడం ద్వారా ఆశించిన దిగుబడులు పొందవచ్చు.

ఇతర ఆరుతడి పంటలైన ఆముదాలు, పొద్దుతిరుగుడు, ఉలవలు జూలై 31 వరకు సాగు చేసుకోవచ్చు.