ఆర్టీసీ అద్దె బస్సుల సమ్మె సైరన్‌

మహాలక్ష్మి పథకంలో మహిళలకు ప్రభుత్వం పల్లె వెలుగు, ఎక్స్‌ప్రెస్‌ బస్సుల్లో ఉచిత ప్రయాణం కల్పించడంతో ప్రయాణికుల సంఖ్య రెండింతలు పెరిగింది. బస్సులు కెపాసిటీకి మించి వెళ్తున్నాయి.

• మహాలక్ష్మి పథకంతో ప్రయాణికుల సంఖ్య పెరిగిందంటున్న బస్సుల యజమానులు
• అధిక లోడ్‌తో మరమ్మతులకు గురవుతున్నామని ఆందోళన
• బస్సుల నిర్వహణ భారం పెరిగిందని ఆవేదన
• తమ సమస్యను ప్రభుత్వం పరిష్కరించాలని డిమాండ్‌
• ఉమ్మడి జిల్లాలో 7 డిపోల పరిధిలో 254 అద్దె బస్సులు
• సమ్మెతో సంక్రాంతి ప్రయాణాలకు ఇబ్బందే..

నల్లగొండ సిటీ, జనవరి 3 : మహాలక్ష్మి పథకంలో మహిళలకు ప్రభుత్వం పల్లె వెలుగు, ఎక్స్‌ప్రెస్‌ బస్సుల్లో ఉచిత ప్రయాణం కల్పించడంతో ప్రయాణికుల సంఖ్య రెండింతలు పెరిగింది. బస్సులు కెపాసిటీకి మించి వెళ్తున్నాయి. దాంతో బస్సులు తరుచూ మరమ్మతులకు గురవుతున్నాయంటున్నారు ఆర్టీసీ అద్దె బస్సుల యజమానులు. కేఎంపీఎల్‌ కూడా రావడం లేదంటున్నారు. ఖర్చుల భారం భరించలేమంటూ ఈ నెల 5 నుంచి సమ్మెకు దిగేందుకు సిద్ధమవుతున్నారు.

ఈ నేపథ్యంలో ఆర్‌ఎమ్‌కు సమ్మె నోటీసులు ఇచ్చారు. ఉమ్మడి నల్లగొండ జిల్లాలోని 7 డిపోల పరిధిలో 254 అద్దె బస్సులు నడుస్తున్నాయి. కేఎంపీఎల్‌ తగ్గించి చార్జీలు ఇవ్వాలని, బస్సు టైర్లను బల్క్‌ రేట్లకే అందజేయాలని, ప్రమాదం జరిగినప్పుడు ైక్లెయిమ్‌కు ఇబ్బంది లేకుండా చూడాలని పలు డిమాండ్లను అద్దె బస్సు యజమానులు ప్రభుత్వం ముందుంచారు. సమ్మెతో సంక్రాంతి పండుగకు వివిధ ప్రాంతాల నుంచి వచ్చే ప్రయాణికులకు ఇబ్బందిగా
మారనున్నది.

రోజూ 3లక్షల మంది ప్రయాణికులు

మహిళలకు ఉచిత బస్సు ప్రయాణం అమల్లోకొచ్చాక నల్లగొండ రీజియన్‌లో ప్రయాణికుల సంఖ్య గణనీయంగా పెరిగింది. పల్లె వెలుగు, ఎక్స్‌ప్రెస్‌ బస్సులు ఖాళీ లేకుండా వెళ్తున్నాయి. ఈ పథకం అమల్లోకి రాక ముందు నల్లగొండ ఉమ్మడి జిల్లా రీజియన్‌ పరిధి 7 డిపోల్లో ప్రతిరోజూ 2 లక్షల మంది ప్రయాణించేవారు. ప్రస్తుతం ఆ సంఖ్య 3లక్షలకు చేరింది. ఇందులో 2లక్షల మంది మహిళలే ఉండడం గమనార్హం. నల్లగొండ రీజియన్‌లో 7 డిపోలకుగానూ 637 బస్సులు ఉన్నాయి. ఇందులో ఆర్టీసీ 383, అద్దె బస్సులు 254 నడుస్తున్నాయి.

అద్దె బస్సుల ఓనర్లు చెప్తున్నదిదీ..

• మహాలక్ష్మి పథకంతో గతంలో కంటే ప్రయాణికుల సంఖ్య భారీగా పెరుగడంతో బస్సుల నిర్వహణ భారంగా మారింది.
• బస్సులో పరిమితికి మించి ప్రయాణికులు వెళ్లడంతో టైర్లు వేడెక్కి పేలే అవకాశం ఉంది. కమాన్‌ కట్టలపై అధిక లోడు పడి అవి విరిగే
  ప్రమాదం.

డిమాండ్లు

• బస్సులకు నూతన టైర్లు బల్క్‌ రేట్లకే అందించాలి.
• కేఎంపీఎల్‌ను తగ్గించి చార్జీలు ఇవ్వాలి.
• బస్సులో పరిమితికి మించి ప్రయాణించడం వల్ల ప్రమాదాలు జరిగే అవకాశం ఉన్నది. ఈ నేపథ్యంలో క్లెయిమ్‌కు ఇబ్బంది కలుగకుండా ప్రభుత్వం ఏర్పాట్లు చేయాలి.