సీఎం సభలు గ్రాండ్‌ సక్సెస్‌

సూర్యాపేట జిల్లాలో సీఎం కేసీఆర్‌ బహిరంగ సభలు విజయవంతంగా జరిగాయి. కోదాడ, తుంగతుర్తి నియోజకవర్గం తిరుమలగిరిలో సభలకు పల్లెలు, పట్టణాలు, మారుమూల తండాల నుంచి జనం పెద్ద ఎత్తున స్వచ్ఛందంగా తరలివచ్చారు.

• కోదాడ, తుంగతుర్తిలో బీఆర్‌ఎస్‌ సభలకు విశేష స్పందన
• స్వచ్ఛందంగా తరలివచ్చిన ప్రజలు
• బీఆర్‌ఎస్‌ శ్రేణుల్లో మరింత ఉత్సాహం

సూర్యాపేట జిల్లాలో సీఎం కేసీఆర్‌ బహిరంగ సభలు విజయవంతంగా జరిగాయి. కోదాడ, తుంగతుర్తి నియోజకవర్గం తిరుమలగిరిలో సభలకు పల్లెలు, పట్టణాలు, మారుమూల తండాల నుంచి జనం పెద్ద ఎత్తున
స్వచ్ఛందంగా తరలివచ్చారు. ముఖ్యమంత్రి కేసీఆర్‌ సభలో సమైక్య పాలన పరిస్థితులు, స్వరాష్ట్రంలో జరిగిన అభివృద్ధిని ప్రజలకు వివరించారు. దశాబ్దాలుగా ఏమీ చేయని కాంగ్రెస్‌పై విరుచుకుపడ్డారు. బీఆర్‌ఎస్‌ అభ్యర్థులు బొల్లం మల్లయ్యయాదవ్‌, గాదరి కిశోర్‌కుమార్‌ భారీ మెజారిటీతో గెలిపించుకోవాలని కోరడంతో సభికుల నుంచి మంచి స్పందన వచ్చింది. చప్పట్లు, ఈలలు, కేరింతలతో సభా ప్రాంగణం మార్మోగింది. కళాకారుల ఆటపాటలు ఉత్సాహం నింపాయి.

తిరుమలగిరి అక్టోబర్‌ 29 : తిరుమలగిరిలో ఆదివారం జరిగిన తుంగతుర్తి సమర శంఖారావం సభ గ్రాండ్‌ సక్సెస్‌ అయ్యింది. నియోజకవర్గం నుంచి పార్టీ శ్రేణులు, ప్రజలు స్వచ్ఛందంగా తరలివచ్చారు. అనుకున్నదానికంటే లక్షకు పైగా ప్రజలు వచ్చినట్లు బీఆర్‌ఎస్‌ శ్రేణులు చెబుతున్నారు. అన్ని వర్గాల ప్రజలు సంక్షేమ పథకాలు పొందడంతో సభకు స్వచ్ఛందంగా తరలి వచ్చారు. సభా ప్రాంగణమంతా జై తెలంగాణ.. జై కేసీఆర్‌ నినాదాలతో మారుమ్రోగాయి.

సీఎం కేసీఆర్‌ సభ సైడ్‌ లైట్స్‌

• సాయంత్రం 3.44 గంటలకు సీఎం కేసీఆర్‌ సభ స్థలానికి చేరుకున్నారు. ఎమ్మెల్యే కిశోర్‌ సతీమణి కమల కేసీఆర్‌కు వీర తిలకం దిద్ది చేతికి దట్టి కట్టారు.
•  రాష్ట్ర విద్యుత్‌ శాఖ మంత్రి గుంటకండ్ల జగదీశ్‌రెడ్డి, మాజీ స్పీకర్‌ మధుసూదనాచారి, ఎంపీ బడుగుల లింగయ్యయాదవ్‌, ఎమ్మెల్యే కిశోర్‌కుమార్‌ సీఎంకు స్వాగతం పలికారు.
• 3.58 గంటలకు సీఎం కేసీఆర్‌ సభా వేదిక పైకి వచ్చి ప్రజలకు అభివాదం చేశారు.
• 4 నుంచి 4.02 గంటల వరకు ఎమ్మెల్యే కిశోర్‌కుమార్‌ ప్రసంగించారు.
• 4.03 నుంచి 4.29 గంటల వరకు ముఖ్యమంత్రి కేసీఆర్‌ ప్రసంగం కొనసాగింది.
• గాయకులు, కళాకారులు తమ పాటలతో ప్రజలను ఉర్రూతలూగించారు.
• గతంలో దంతాలపల్లి రోడ్డు నుంచి వెళ్తే దంతాలు ఊడిపడేవని, ప్రస్తుతం సువిశాలమైన రోడ్లతో ప్రయాణం ప్రశాంతంగా సాగుతుందని సీఎం కేసీఆర్‌ చెప్పడంతో చప్పట్లు మారుమ్రోగాయి. 4.35 గంటలకు సీఎం కేసీఆర్‌ తిరుగు పయణమయ్యారు.

రలివచ్చిన ప్రజలు

సూర్యాపేట, అక్టోబర్‌ 29 (నమస్తే తెలంగాణ) : బీఆర్‌ఎస్‌ అధినేత, సీఎం కేసీఆర్‌ ఆధ్వర్యంలో కోదాడలో ఆదివారం నిర్వహించిన సభ గ్రాండ్‌ సక్సెస్‌ అయ్యింది. సభకు ప్రజలు దండులా కదిలారు. సుమారు 40వేల మంది ప్రజలు సభకు తరలివచ్చారు. హెలీకాప్టర్‌లో వస్తూ జనాన్ని గమనించిన సీఎం కేసీఆర్‌ మల్లయ్య గెలుపును ఎవరూ ఆపలేరని ప్రశంసలు కురిపించారు. మల్లయ్య బీసీ బిడ్డ, పీహెచ్‌డీ వరకు చదువుకున్న వ్యక్తి ప్రజా సేవ చేయాలనే తపనతో రాజకీయాల్లోకి వచ్చినట్లు తెలిపారు. కొంతమంది కుట్రలు చేస్తూ ఎన్ని ఒడిదొడుకులు సృష్టించినా నియోకవర్గాన్నే పట్టుకొని, జనాన్నే నమ్ముకొని సేవ చేస్తూ తిరుగుతున్నాడని ప్రశంసించారు. తొమ్మిదిన్నరేండ్లలో ప్రభుత్వ పాలన విజయాలు ప్రత్యర్థి పార్టీల కుట్రలు, మోసాలను ఎండగట్టారు. సీఎం ప్రసంగిస్తున్నంత సేపు విమర్శలు చేసినా… అభినందించినా… సంక్షేమ పథకాలను గర్తు చేసినా సభ హోరెత్తడంతో ప్రతిసారి ప్రసంగాన్ని ఆపిఆపి కొనసాగించాల్సి వచ్చింది.

సభ సైడ్‌లైట్స్‌

• 2.45గంటలకు వేదికకు చేరిన సీఎం కేసీఆర్‌, మంత్రి జగదీశ్‌రెడ్డి
• స్వాగతం పలికిన ఎమ్మెల్యే బొల్లం మల్లయ్యయాదవ్‌
• 2.48గంటలకు సీఎం ప్రసంగం ప్రారంభం
• 3.15గంటలకు ముగిసిన ప్రసంగం
• ప్రతి గ్రామం నుంచి బతుకమ్మలతో బీఆర్‌ఎస్‌ అభిమానులు
• 2గంటల ముందుగా సభకు చేరుకున్న బీఆర్‌ఎస్‌ శ్రేణులు
• ఆసక్తిగా సీఎం ప్రసంగం విన్న ప్రజలు
• సభికులను ఉర్రూతలూగించిన మధుప్రియ, మానుకోట సతీశ్‌ పాటలు
  కోదాడ రూరల్‌ / నడిగూడెం,అక్టోబర్‌29: