అర్థం చేసుకుందాం.. బాధ్యతగా వ్యవహరిద్దాం

యాక్సిడెంట్‌ అంటే ఓ బైకో, కారో రోడ్డు మీద పడటం కాదు ఓ కుటుంబం రోడ్డున పడటం అని మెదక్‌ ఎస్పీ రోహిణి ప్రియదర్శిని అన్నారు. శుక్రవారం జిల్లా పోలీస్‌ ప్రధాన కార్యాలయంలో ఏర్పాటు చేసిన విలేకరుల సమావేశంలో ఆమె మాట్లాడారు. రహదారులపై తెలుపు గీతలు, పసుపు లైన్లు, సంజ్ఞలు, సంకేతాలు, రోడ్డుపై మనకు రకరకాల రేఖలు

రోడ్డుపై ఉండే గీతలను అవగాహన చేసుకోవాలి
మెదక్‌ ఎస్పీ రోహిణి ప్రియదర్శిని

మెదక్‌ అర్బన్‌, జూన్‌17: యాక్సిడెంట్‌ అంటే ఓ బైకో, కారో రోడ్డు మీద పడటం కాదు ఓ కుటుంబం రోడ్డున పడటం అని మెదక్‌ ఎస్పీ రోహిణి ప్రియదర్శిని అన్నారు. శుక్రవారం జిల్లా పోలీస్‌ ప్రధాన కార్యాలయంలో ఏర్పాటు చేసిన విలేకరుల సమావేశంలో ఆమె మాట్లాడారు. రహదారులపై తెలుపు గీతలు, పసుపు లైన్లు, సంజ్ఞలు, సంకేతాలు, రోడ్డుపై మనకు రకరకాల రేఖలు కనిపిస్తుంటాయి. చాలామందికి వీటి ఆర్థం తెలియదు. కొందరైతే అసలు పట్టించుకోరని, ప్రతి గీతకో పరమార్థం ఉందన్నారు. వాటిపై అవగాహన పెంచుకుంటేనే ప్రమాదాలు జరుగకుండా ఉంటాయని, మన తలరాతను మార్చే శక్తి ఆ గీతలకు ఉందని, వాటి గురించి వివరించారు.

1. తెలుపు: అన్ని రకాల సంకేతాలకు తెలుపు రంగు వాడతారు.
2. పసుపు: అవరోధాలు ఉన్నాయి అనడానికి సంకేతం.
3. నలుపు: తెలుపునకు ప్రత్యామ్నాయం. పాదచారుల ఖాళీ బాటకు ఎక్కువగా వాడతారు.
4. బ్రోకెన్‌ తెలుపు గీతలు: దేశంతో అత్యధికంగా కనిపించే రోడ్డు మార్కింగ్‌. దీని అర్థం వాహనదారుడు రోడ్డు మీద వెళ్తుంటే కావాలనకున్నప్పుడు వరుసలు మారొచ్చు. యూటర్న్‌ తీసుకోవచ్చు అని అర్థం అయితే ఇవన్నీ చేసేముందు తగు జాగ్రత్తలు తీసుకోవాలి. వెనకాముందు చూడాలని ఈ గీత చెబుతుంది.
5. ఏకదాటి సాలీడ్‌ గీతలు: ముందున్న వాహనాన్ని ఓవర్‌టెక్‌ చేయొద్దు యూటర్న్‌ తీసుకోవద్దు అని ఈ రేఖ చెబుతుంది. ముందు ప్రమాదకర పరిస్థితులున్నాయి. వెలుతురు సరిగా లేదని అయినా ఈ రోడ్డు నుంచి బయటకి వెళ్లాలి.
6. రెండు వరుసల పసుపు గీతలు: ఎట్టి పరిస్థితుల్లోనూ వరుస మారొద్దు, ముందు వాహనాల్ని దాటొద్దు, ఏదైనా అతి పెద్ద అడ్డంకి ఉంటే తప్ప కూడలిలో సిగ్నళ్లు పడినప్పుడు మాత్రమే రోడ్డు దాటాలి. వెడల్పు తక్కువగా ఉంటే రెండు వరుసల రహదారికి మాత్రమే ఇలాంటి గీతలు వాడతారు.
7. పసుపు గీత పక్కన బ్రోకెన్‌ పసుపు రేఖ: ఇందులో రెండు అర్థాలున్నాయి. బ్రోకెన్‌ లైన్‌ వైపు మనం ఉంటే ముందు వెళ్తున్న వాహనాన్ని దాటుకొని వెళ్లవచ్చు. సాలిడ్‌ పసుపురంగు గీత వైపు డ్రైవింగ్‌లో ఉంటే ఒవర్‌టేక్‌ చేయడానికి వీల్లేదు.
8. స్టాప్‌ లైన్‌: ఆ గీత కన్నా ముందే ఆగిపోవాలి. వాహనాన్ని ముందు ఆపాలి.
9. గివ్‌ అవే లైన్‌: తిరగేసిన త్రిభుజకారపు గుర్తు, రెండు వరుసల చుక్కల లైన్లు జంక్షన్ల దగ్గర కనిపిస్తాయి. మనం నడిపే వాహనం ప్రధాన రహదారిపై వస్తున్నప్పుడు అటూ ఇటూ చూసుకొని వాహనాలకు, ట్రాఫిక్‌కి అడ్డుపడకుండా వెళ్లాలి.
10. బార్డర్‌ ఎడ్జ్‌ లైన్స్‌: రహదారి ముగిసేవరకూ ఇవి ఉంటాయి. సాధారణంగా తెలుపు రంగులో వేస్తారు. వాహనాలు ఈ గీతలను దాటి బయటికి వెళ్లడం ప్రమాదకరం అని చెప్పడమే దాని ఉద్దేశం. ఒక వేళ వాహనాన్ని పార్క్‌ చేయాల్సివస్తే ఈ గీతకి బయటే నిలపాలి.
11. ఎల్లో బాక్స్‌ జంక్షన్‌: రోడ్డు మధ్యలో ఇంటర్‌ సెక్షన్‌లో వేస్తారు. దీనిపై నుంచి ఇరుపక్కల ద్వారా వాహనాలు వెళ్లొచ్చు. ఇతర అడ్డంకులేమీ లేనప్పుడు, వేరే వాహనాలు బాక్స్‌ గుండా వెళ్లనప్పుడు మాత్రమే ఈ బాక్స్‌ ద్వారా మలుపు తీసుకోవచ్చు.
12. పెడెస్ట్రియిన్‌ క్రాసింగ్‌: వీటినే జీబ్రా క్రాసింగ్‌ అంటుంటారు. నలుపు, తెలుపుల స్ట్రిప్‌లతో గుర్తులు వేస్తారు. కూడళ్ల వద్ద సిగ్నల్‌ పడ్డప్పుడు పాదచారులు తప్పకుండా వీటిద్వారానే రోడ్డు దాటాలి. ఆ సమయంలో చోదకులు వాహనాలను ఆపేయాలి.
13. రంబుల్‌ స్ట్రిప్‌లు: పట్టిలా రోడ్డుపై కొంచెం ఉబ్బెత్తుగా వేసే గీతలివి. వాహ నాలు వీటిపై నుంచి వెళ్తుంటే చిన్నపాటి శబ్ధం వస్తుంది. నిద్రమత్తులో, పరాకుగా ఉన్న డ్రైవర్లను అప్రమత్తం చేయడానికి ఈ ఏర్పాట్లు. ఈ నిబంధనలు పాటిస్తే రోడ్డు గీతలపై అవగాహన ఉంటే ప్రయాణం భద్రంగా ఉంటుంది. ప్రమాదాలు తగ్గడానికి ఆస్కారం ఉంటుందని ఎస్పీ తెలిపారు. ఇరుకు రోడ్డు, వంతెనలు, మలుపులు, ఇలాంటి అడ్డంకులను సైతం తెలియజేస్తూ ప్రమాదాలను నివారిస్తాయి అన్నారు.