సరిహద్దుల్లో.. డేగ కన్ను

తెలంగాణ శాసన సభ ఎన్నికలు ప్రశాంతంగా జరిగేందుకు పోలీసుశాఖ కసరత్తు ప్రారంభించింది. రాష్ట్ర ఎన్నికల కమిషనర్‌ ఆదేశాల మేరకు ఇటీవల తెలంగాణ-కర్ణాటక రాష్ర్టాల సరిహద్దు పోలీసు అధికారులు సమావేశమయ్యారు.

• సరిహద్దుల వద్ద చెక్‌పోస్టుల ఏర్పాటుకు కసరత్తు
• నేరాల అదుపునకు పకడ్బందీ చర్యలు
• నేరస్తుల కదలికలపై నిరంతర నిఘా
• మద్యం, నగదు సరఫరా నియంత్రణకు చర్యలు
• గంజాయి, మాదక ద్రవ్యాల రవాణాపై ప్రత్యేక తనిఖీలు
• సమస్యాత్మక ప్రాంతాలను గుర్తించి ప్రత్యేక చర్యలు
• సరిహద్దు రోడ్లపై మొబైల్‌ టీంల ఏర్పాటు
• జహీరాబాద్‌లో సమావేశమైన సంగారెడ్డి, కామారెడ్డి, బీదర్‌, కలబుర్గా ఎస్పీలు

జహీరాబాద్‌, సెప్టెంబర్‌ 8: తెలంగాణ శాసన సభ ఎన్నికలు ప్రశాంతంగా జరిగేందుకు పోలీసుశాఖ కసరత్తు ప్రారంభించింది. రాష్ట్ర ఎన్నికల కమిషనర్‌ ఆదేశాల మేరకు ఇటీవల తెలంగాణ-కర్ణాటక రాష్ర్టాల సరిహద్దు పోలీసు అధికారులు సమావేశమయ్యారు. జహీరాబాద్‌ పట్టణ సమీపంలోని మహీంద్రా ఆండ్‌ మహీంద్రా విశ్రాంతి గృహంలో సంగారెడ్డి, కామారెడ్డి, బీదర్‌, కలబుర్గా జిల్లా ఎస్పీలు సమావేశమై ఎన్నికల నిర్వహణపై చర్చించారు. కర్ణాటక రాష్ర్టానికి జహీరాబాద్‌, నారాయణఖేడ్‌ డివిజన్లు సమీపంలో ఉండడంతో సరిహద్దులో పోలీసు చెక్‌పోస్టులు ఏర్పాటు చేసి పరస్పర సహకారంపై మంతనాలు చేశారు. 65వ జాతీయ రహదారిపై చెక్‌పోస్టుల వద్ద సీసీ కెమెరాలు ఏర్పాటు చేసి పర్య వేక్షించేందుకు కసరత్తు మొదలుపెట్టారు. జహీరాబాద్‌ నియోజకవర్గంలో కర్ణాటక సరిహద్దులో ఉన్న 65 జాతీయ రహదారిపై చెరాగ్‌పల్లి, మొగుడంపల్లి మండలంలోని గౌసాబాద్‌ తండా, కోహీర్‌ మండలంలోని మనియార్‌పల్లి శివారు, గోటిగార్‌పల్లి పంచాయతీ పరిధిలోని సిద్దాపూర్‌తండా, న్యాల్‌కల్‌ మండలంలోని బీదర్‌-జహీరాబాద్‌ రోడ్డుపై గణేశ్‌పూర్‌, శంశోల్లాపూర్‌, డప్పుర్‌, హుసేనగర్‌ శివారులు సరిహద్దులున్నాయి. వీటిలో చెక్‌పోస్టులు మొబైల్‌ వాహనాలు ఏర్పాటు చేసి తనిఖీలు చేసేందుకు ప్రతిపాదనలు సిద్ధం చేసినట్లు సమాచారం.

సమస్యాత్మక ప్రాంతాలు గుర్తింపు
అసెంబ్లీ ఎన్నికలో ఎలాంటి సంఘటనలు జరగకుండా ఉండేందుకు పోలీసు, రెవెన్యూ అధికారులు సమస్యాత్మక ప్రాంతాలను గుర్తిస్తున్నారు. జహీరాబాద్‌ నియోజకవర్గంలో 313 పోలింగ్‌ కేంద్రాలున్నాయి. 2018 శాసనసభ ఎన్నికల్లో నియోజకవర్గంలో 292 పోలింగ్‌ కేంద్రాలు ఉండగా, 52 సమస్యాత్మక కేంద్రాలను గుర్తించి, ప్రత్యేక పర్యవేక్షణ చేశారు. జహీరాబాద్‌ రూరల్‌ పోలీసు స్టేషన్‌లో 9 సమస్యాత్మక కేంద్రాలుగా గుర్తించారు. కోహీర్‌లో 16, చెరాగ్‌పల్లి11, హద్నూర్‌ 3, ఝరాసంగంలో 1 సమస్యాత్మక కేంద్రాలు గుర్తించి, అక్కడ పోలింగ్‌ ప్రశాంతంగా జరిగేందుకు ప్రత్యేక పోలీసులను నియమించి పర్యవేక్షణ చేశారు. పాత నేరస్తులు, రౌడీ షీటర్లు కదలికలపై నిఘా ఏర్పాటు చేసేందుకు కసరత్తులు చేస్తున్నారు.

సరిహద్దులో ప్రత్యేక నిఘా..
తెలంగాణకు సరిహద్దు రహదారులపై పోలీసు, రెవెన్యూ చెక్‌పోస్టులు ఏర్పాటు చేసి తనిఖీలు చేసేందుకు పోలీసు, రెవెన్యూ శాఖ అధికారులు కసరత్తు ప్రారంభించారు. కర్ణాటకకు సరిహద్దులో ఉన్న గ్రామాలకు సమీపంలో తాత్కాలిక చెక్‌పోస్టులు ఏర్పాటు చేసి శాసన సభ ఎన్నికలు ముగిసే వరకు వాహనాలు తనిఖీలు చేసేందుకు ఏర్పాట్లు చేస్తున్నారు. నేరస్తుల కదిలికలపై నిఘా కోసం ప్రత్యేక టీంలను ఏర్పాటు చేసేందుకు ఉన్నతా అధికారులు ఆదేశాలు జారీ చేశారు. నగదు, మద్యం, గంజాయి, మాదక ద్రవ్యాలు తెలంగాణ వైపు రాకుండా నివారణ చర్యలు తీసుకునేందుకు ఎన్నికల కమిషనర్‌ ఆదేశాలు జారీ చేశారు. పోలీసు చెక్‌పోస్టులో ఎస్‌ఐ స్థాయి అధికారిని నియమించి పర్యవేక్షణ చేసేందుకు ఉన్నతాధికారులు ఏర్పాట్లు చేస్తున్నారు. సరిహద్దులో బీదర్‌, చించోళి, హుమ్నాబాద్‌ తాలూకాలు ఉన్నాయి. అక్కడి పోలీసు అధికారులతో ప్రతి సమాచారం సేకరించి సమన్వయంతో పని చేసేందుకు పోలీసులు సిద్ధం అవుతున్నారు.

అక్రమ రవాణాకు కేంద్రాలుగా ఉన్న ప్రాంతాలు..!

• జహీరాబాద్‌ మండలం జాతీయ రహదారిపై ఉంది. కర్ణాటక, మహారాష్ర్ట వైపు నుంచి అధికంగా జాతీయ రహదారి గుండా వాహనాలు రాకపోకలు సాగుతుంటాయి. ఇక్కడ తెలంగాణ, కర్ణాటక పోలీసులు తనిఖీ కేంద్రాలు ఏర్పాటు చేసేందుకు ఏర్పాట్లు చేస్తున్నారు. జహీరాబాద్‌ నుంచి మొగుడంపల్లి మీదుగా చించోళికి చేరుకోవచ్చు. తెలంగాణ సరిహద్దు గౌసాబాద్‌ తండా సమీపంలో చెక్‌పోస్టు ఏర్పాటు చేసేందుకు అవకాశమున్నది. ఈ మార్గంలో జోరుగా అక్రమ రవాణా జరిగే ఆస్కారం ఉందనే ఆరోపణలున్నాయి.
• ముంబాయి-హైదరాబాద్‌ 65వ జాతీయ రహదారిపై చెరాగ్‌పల్లి శివారులో మాడ్గి చౌరస్తాలో పోలీసు చెక్‌పోస్టు ఉన్న అక్కడ ఎలాంటి తనిఖీలు చేయడం లేదు. గతంలో ఎస్‌ఐ స్థాయి అధికారి పర్యవేక్షణలో వాహనాలు తనిఖీ చేసే వారు. జాతీయ రహదారిపై చెక్‌పోస్టు ఉన్న ఇప్పటి వరకు ఎలాంటి గంజాయి, మద్యం, నగదు, పట్టుకున్న సంఘటనలు లేవు. గతంలో పని చేసిన పోలీసు అధికారులు చెరాగ్‌పల్లి, గణేశ్‌పూర్‌ శివారులో పోలీసు చెక్‌పోస్టుల కోసం షెడ్ల నిర్మాణం చేశారు. కరోనా సమయంలో షెడ్ల నిర్మాణం చేసి పోలీసులు, వైద్యులు తనిఖీలు చేశారు. ప్రస్తుతం జాతీయ రహదారిపై ప్రతిరోజు వేలాది వాహనాలు తిరుగుతున్నా చెక్‌పోస్టు వద్ద తనిఖీ చేయడం లేదు.
• జహీరాబాద్‌ నుంచి తాండూరు వైపు వెళ్లే రోడ్డు కర్ణాటకలో కలబుర్గా జిల్లాలోని కుంచారం ఉంది. తాండూరుకు వెళ్లే మార్గం మధ్యలో కర్ణాటకలోకి ప్రవేసించవచ్చు. అక్కడ రోడ్డు మార్గం ఉన్నా ఎలాంటి తనిఖీలు చేయడం లేదు. చెక్‌పోస్టులు ఏర్పాటు చేయలేదు. ఈ మార్గంలో అక్రమ రవాణా జోరుగా సాగే అవకాశమున్నది.
• బీదర్‌-జహీరాబాద్‌ రోడ్డుపై చెక్‌పోస్టు ఏర్పాటు చేసిన తనిఖీలు చేయడం లేదు. ఇక్కడ తనిఖీలు చేస్తున్నా ఎలాంటి నగదు, మద్యం ఇప్పటి వరకు పట్టుకున్న సంఘటనలు లేవు. పోలీసు అధికారుల పర్యవేక్షణ అంతగా లేదనే విమర్శలు వినిపిస్తున్నారు. బీదర్‌-న్యాల్‌కల్‌ మార్గంలో గతం ఎన్నికల్లో చెక్‌పోస్టు ఏర్పాటు చేసి తనిఖీలు చేశారు. ఈ ఎన్నికల్లో అధికారులు ఎలాంటి తాత్కాలిక తనిఖీ కేంద్రాలు ఏర్పాటు చేసేందుకు కసరత్తు ప్రారంభించలేదు. బీదర్‌-చాల్కి రోడ్డు మార్గంలో సైతం ఎలాంటి తనిఖీ కేంద్రాలు లేవు. ఈ మార్గంలో వచ్చే వాహనాలు నేరుగా రాయికోడ్‌ చౌరస్తాకు చేరుకొని అక్కడి నుంచి కొన్ని మెదక్‌, జోగిపేట వైపు పోతున్నాయి. మరికొన్ని రాయికోడ్‌ మీదగా కంకోల్‌ వైపు వెళ్లి 65వ జాతీయ రహదారి వెంట హైదరాబాద్‌కు చేరుకుంటున్నాయని సమాచారం.
• కోహీర్‌-మనియార్‌పల్లి మార్గంలో గతంలో తాత్కాలిక చెక్‌పోస్టులు ఏర్పాటు చేసి తనిఖీలు చేశారు. ఈ ఎన్నికల్లో అధికారులు ఎలాంటి చెక్‌పోస్టులు ఏర్పాటు చేస్తారో తెలియడం లేదు. దీంతో ఈ రహదారిని సైతం అక్రమ రవాణాకు వాడుకునే అవకాశముంది.