ప్రజాగ్రహం.. రెండోరోజూ గ్రామసభల్లో లొల్లిలొల్లి..

కాంగ్రెస్‌ ప్రభుత్వం అనుకున్నది ఒకటి గ్రామాల్లో జరుగుతున్నది మరొకటి. ప్రభుత్వ పనితీరుపై గ్రామసభలో నిరసనల హోరు కొనసాగుతున్నది. రెండోరోజూ బుధవారం ఉమ్మడి మెదక్‌ జిల్లాలో నిర్వహించిన గ్రామసభల్లో ప్రభుత్వ తీరును ప్రజలు తీవ్రంగా ఎండగట్టారు. గ్రామసభల్లో ప్రజలు లొల్లిలొల్లి చేశా రు.

• ప్రభుత్వానికి వ్యతిరేకంగా నినాదాలు.. నిరసనలు
• జాబితాలను ఏ ప్రాతిపదికన సిద్ధం చేశారని, గత దరఖాస్తులు ప్రశ్నల వర్షం
• కాంగ్రెసోళ్లకే పథకాలు కేటాయిస్తారా అని జనం ఆక్రోశం
• ఉమ్మడి మెదక్‌ జిల్లాలో ఎక్కడికక్కడ అధికారుల నిలదీత
• మద్దూరు మండలం నర్సాయపల్లిలో బీఆర్‌ఎస్‌ కార్యకర్తపై దాడికి పాల్పడిన కాంగ్రెస్‌ నేతలు

సిద్దిపేట, జనవరి 22(నమస్తే తెలంగాణ ప్రతినిధి): కాంగ్రెస్‌ ప్రభుత్వం అనుకున్నది ఒకటి గ్రామాల్లో జరుగుతున్నది మరొకటి. ప్రభుత్వ పనితీరుపై గ్రామసభలో నిరసనల హోరు కొనసాగుతున్నది. రెండోరోజూ బుధవారం ఉమ్మడి మెదక్‌ జిల్లాలో నిర్వహించిన గ్రామసభల్లో ప్రభుత్వ తీరును ప్రజలు తీవ్రంగా ఎండగట్టారు. గ్రామసభల్లో ప్రజలు లొల్లిలొల్లి చేశా రు. నిరసనలు.. ప్రభుత్వానికి వ్యతిరేకంగా నినాదా లు చేశారు. సంక్షేమ పథకాల జాబితాలను ఏ ప్రతిపాదికన సిద్ధ్దం చేశారని ప్రశ్నించారు.

రేషన్‌ కార్డుల కోసం ఎన్నిసార్లు దరఖాస్తు పెట్టాలి? ఇందిరమ్మ ఇండ్లకు కోసం ప్రజాపాలనలో ఇచ్చిన ధరఖాస్తులు ఏమయ్యాయి.. అంటూ అధికారులను నిలదీశారు. వివిధ సంక్షేమ పథకాల కోసం గతంలో ఇచ్చిన దరఖాస్తులు ఏమయ్యాయి అంటూ ఆగ్రహాన్ని వ్యక్తం చేశారు. కొన్నిచోట్ల గ్రామసభలను ప్రజలు బహిష్కరించారు. మరికొన్నిచోట్ల అధికారులతో వాగ్వాదానికి దిగారు. కాంగ్రెస్‌ కార్యకర్తలకేనా సంక్షేమ పథకాలు? ఇదేం ప్రభుత్వం అంటూ గ్రామసభల్లో ప్రజల తమ ఆక్రోశాన్ని వెల్లగక్కారు. ఎన్నికల ముందు చెప్పింది ఏంటి? ఇప్పడు చేస్తున్నది ఏంటి? అంటూ అధికారులను నిలదీశారు. మద్దూరు మండలం నర్సాయపల్లిలో బీఆర్‌ఎస్‌ కార్యకర్తపై కాంగ్రెస్‌ నేతలు దాడికి పాల్పడ్డారు. పోలీస్‌ బందోబస్తు మధ్య గ్రామసభలు తూతూమంత్రంగా నిర్వహించి మమ అనిపించారు.

• సిద్దిపేట అర్బన్‌ మండలం మిట్టపల్లి గ్రామసభలో లబ్ధ్దిదారుల జాబితాను అధికారులు చదువుతున్న క్రమంలో వారంతా అనర్హులు అంటూ గ్రామస్తులు అధికారులపై ఆగ్రహం వ్యక్తం చేశారు. అధికారులు ఎంత సర్ధిచెప్పినా వినకపోవడంతో గ్రామసభను మధ్యలోనే ముగించారు. ప్రభుత్వానికి వ్యతిరేకంగా ప్రజలు నినాదాలు చేశారు. కాసేపు ఉద్రిక్త పరిస్థితులు ఏర్పడ్డాయి.
• నంగునూరు మండలం ఘణపూర్‌ గ్రామసభలో గొడవ జరిగింది. అధికారులతో గ్రామస్తులు వాగ్వాదానికి దిగారు. సంక్షేమ పథకాలు అర్హులకు అందడం లేదని ఆరోపించారు.
• నారాయణరావుపేట మండలం జక్కాపూర్‌ గ్రామసభ పోలీస్‌ బందోబస్తు మధ్యన జరిగింది. ఇందిరమ్మ ఇండ్లు, రేషన్‌ కార్డుల్లో అర్హుల పేర్లు లేవంటూ గ్రామస్తులు ఆందోళనకు దిగారు.
• గజ్వేల్‌ మండలం రిమ్మనగూడ గ్రామసభలో ప్రారంభం నుంచి విద్యుత్‌ సరఫరా లేకపోవడంతో 24గంటల కరెంట్‌ ఇదేనా..? అంటూ గ్రామస్తులు అధికారులను ప్రశ్నించారు. బయ్యారంలో గ్రామసభ ప్రారంభంతోనే అర్హులకు సంక్షేమ పథకాలు అందడం లేదు అంటూ అధికారులను గ్రామస్తులు నిలదీశారు.
• మద్దూరు మండలం నర్సాయిపల్లి గ్రామసభ రసాభసగా మారింది. కాంగ్రెస్‌, బీఆర్‌ఎస్‌ నాయకుల మధ్య గొడవ జరిగింది.
• నర్సాపూర్‌ మండలంలోని బ్రాహ్మణపల్లి గ్రామసభ రసాభాస అయ్యింది. పంట బోనస్‌ డబ్బు లు రాలేదని అధికారులను రైతులు నిలదీశారు. భూమి ఉన్నవారికే ఆత్మీయ భరోసా తయారు చేశారని నిరుపేదలు అధికారుల తీరుపై ఆగ్రహం వ్యక్తం చేశారు.
• నిజాంపేట మండలం నస్కల్‌ బీటీ పనులు చేపట్టాలని గ్రామసభలో నిరసన తెలియజేసి గ్రామస్తులు బైఠాయించారు.
• కొల్చారం మండలం కొంగోడు గ్రామసభ రసాభసగా మారింది.
• శివ్వంపేట మండలం పాంబండలో అనర్హులను ఎంపిక చేశారని అధికారులను గ్రామస్తులు నిలదీశారు.
• చిలిపిచెడ్‌ మండలం జగ్గంపేటలో కాంగ్రెస్‌, బీఆర్‌ఎస్‌ నాయకులు ప్రొటోకాల్‌ వివాదంలో వాగ్వాదానికి దిగారు.
• కౌడిపల్లి మండలం తిమ్మాపూర్‌లో గ్రామసభను గ్రామస్తులు బహిష్కరించారు.
• నార్సింగి మండల కేంద్రంలో అర్హులకు పథకాలు రాలేదని గ్రామస్తులు ఆందోళన చేశారు.
• న్యాల్‌కల్‌ మండలం గంగ్వార్‌లో పంట నష్టపరిహారం రాలేదని అధికారులను నిలదీశారు. రెండు లక్షల రుణమాఫీ కాలేదని, ఇందిరమ్మ ఇండ్లు అర్హులకు రాలేదని అధికారులతో గ్రామస్తులు వాగ్వాదానికి దిగారు.
• రామచంద్రాపూరం మండలం తెల్లాపూర్‌ మున్సిపాలిటీ పరిధిలోని కొల్లూరు గ్రామసభలో అధికారుల పనితీరుపై కాంగ్రెస్‌ నాయకులు అసహనం వ్యక్తం చేశారు. ఎమ్మెల్యే మహిపాల్‌రెడ్డిపై మండిపడ్డారు. పటాన్‌చెరు పాశమైలారం, గుమ్మడిదల నల్లవల్లిలో నిరసనలు, నిలదీతలు జరిగాయి.
• నారాయణ్‌ఖేడ్‌ మండలం సత్య గ్రామసభలో ఆత్మీయ భరోసాకు అనర్హులను ఎంపిక చేశారంటూ గ్రామస్తులు ఆగ్రహం వ్యక్తం చేశారు. కంగ్టి మండలం బోర్గిలో అధికారుల తీరుపై గ్రామస్తులు ఆగ్రహం వ్యక్తం చేశారు.