గులాబీ జెండా రెపరెపలు

ఉమ్మడి ఖమ్మం జిల్లాలో వాడవాడలా గులాబీజెండా రెపరెపలాడింది. సోమవారం బీఆర్‌ఎస్‌ పార్టీ ఆవిర్భావ దినోత్సవ వేడుకలు అంబరాన్నంటాయి. పార్టీ శ్రేణులు, ఉద్యమకారులు, ప్రజాప్రతినిధులు సంబురాల్లో పాల్గొని కేక్‌లు కట్‌ చేసి స్వీట్లు పంచుకున్నారు. పలుచోట్ల అన్నదానాలు, రక్తదాన శిబిరాలు నిర్వహించారు.

April 28, 2026 / 05:20 AM IST

ఉమ్మడి ఖమ్మం జిల్లాలో వాడవాడలా ‘బీఆర్‌ఎస్‌’ ఆవిర్భావ దినోత్సవం
మారుమోగిన జై తెలంగాణ, జై కేసీఆర్‌ నినాదాలు
స్వీట్లు పంచి సంబురాలు చేసుకున్న పార్టీ శ్రేణులు
పాల్గొన్న ఉద్యమకారులు, నాయకులు, కార్యకర్తలు
వచ్చేది బీఆర్‌ఎస్‌ ప్రభుత్వమే.. : మాజీ మంత్రి వనమా, దిండిగల
కాంగ్రెస్‌కు తగిన బుద్ధి చెప్పాలి : కూరాకుల

నమస్తే నెట్‌వర్క్‌, ఏప్రిల్‌ 27 : ఉమ్మడి ఖమ్మం జిల్లాలో వాడవాడలా గులాబీజెండా రెపరెపలాడింది. సోమవారం బీఆర్‌ఎస్‌ పార్టీ ఆవిర్భావ దినోత్సవ వేడుకలు అంబరాన్నంటాయి. పార్టీ శ్రేణులు, ఉద్యమకారులు, ప్రజాప్రతినిధులు సంబురాల్లో పాల్గొని కేక్‌లు కట్‌ చేసి స్వీట్లు పంచుకున్నారు. పలుచోట్ల అన్నదానాలు, రక్తదాన శిబిరాలు నిర్వహించారు. తెలంగాణ తల్లి విగ్రహాలకు పూలమాలలు వేశారు. పల్లెల్లో పండుగ వాతావరణం సంతరించుకుంది. గ్రామగ్రామాన పార్టీ దిమ్మెలను గులాబీ రంగుతో ముస్తాబు చేసి బీఆర్‌ఎస్‌ జెండాలను ఎగురవేశారు. ‘జై తెలంగాణ.. జై కేసీఆర్‌.. జై కేటీఆర్‌’ నినాదాలు మోరుమోగాయి.

ఖమ్మం నగరంలోని జిల్లా పార్టీ కార్యాలయంలో డీసీసీబీ మాజీ చైర్మన్‌ కూరాకుల నాగభూషణం గులాబీ జెండాను ఎగురవేసి మాట్లాడుతూ తెలంగాణ ప్రజల చిరకాల వాంఛ అయిన స్వరాష్ర్టాన్ని సాధించిపెట్టిన ఏకైక పార్టీ ఆనాటి టీఆర్‌ఎస్‌.. ప్రస్తుత బీఆర్‌ఎస్‌ పార్టీ మాత్రమేనని స్పష్టం చేశారు. మోసపూరిత హామీలతో గద్దెనెక్కిన కాంగ్రెస్‌కు ప్రజలు తగిన బుద్ధి చెప్పాలని, తెలంగాణ పునర్నిర్మాణం కోసం కేసీఆర్‌ నాయకత్వాన్ని బలపర్చాలని పిలుపునిచ్చారు.

భద్రాద్రి కొత్తగూడెం జిల్లా కేంద్రం కొత్తగూడెంలోని జిల్లా పార్టీ కార్యాలయంలో సీనియర్‌ నాయకుడు దిండిగల రాజేందర్‌ పార్టీ జెండాను ఎగురవేయగా.. పాల్వంచలోని తన స్వగృహంలో మాజీ మంత్రి వనమా వెంకటేశ్వరరావు కేక్‌ను కట్‌ చేశారు. ఈ సందర్భంగా వారు మాట్లాడుతూ వచ్చేది కేసీఆర్‌ సర్కారేనని అందరికీ తెలిసిపోయిందన్నారు. కాంగ్రెస్‌ ప్రభుత్వం రెండున్నరేళ్లు అధికారంలో ఉన్నా ప్రజలకు ఒక్క హామీ కూడా నెరవేర్చలేకపోయిందన్నారు.