అటు పంచులు.. ఇటు నవ్వులు

రాజన్న సిరిసిల్ల జిల్లా కలెక్టరేట్‌లో బీసీ వృత్తిదారులకు రూ.లక్ష సాయం సందర్భంగా కేటీఆర్‌ హాస్యచతురతో కూడిన ప్రసంగం లబ్ధిదారులను కట్టిపడేసింది. తనదైన శైలిలో అటు ప్రతిపక్షాలపై సైటర్లు వేస్తూ.. ప్రభుత్వ పథకాలను సోదాహరణంగా వివరించి ఆకట్టుకున్నారు. కేటీఆర్‌ పంచులు, విసుర్లకు అంతా పగలబడి నవ్వారు. కరతాల ధ్వనులతో ప్రతిస్పందించారు.

• సిరిసిల్లలో ఆకట్టుకున్న అమాత్యుడు రామన్న ప్రసంగం
• ఆద్యంతం హాస్యచతురతతో కట్టిపడేసిన కేటీఆర్‌
• కరతాళ ధ్వనులతో ప్రతిస్పందించిన లబ్ధిదారులు
• ‘సిరిసిల్లకేనా అన్ని’ అని అంటున్నవారికి సమాధానం

సిరిసిల్ల రూరల్‌/కలెక్టరేట్‌,ఆగస్టు 8: రాజన్న సిరిసిల్ల జిల్లా కలెక్టరేట్‌లో బీసీ వృత్తిదారులకు రూ.లక్ష సాయం సందర్భంగా కేటీఆర్‌ హాస్యచతురతో కూడిన ప్రసంగం లబ్ధిదారులను కట్టిపడేసింది. తనదైన శైలిలో అటు ప్రతిపక్షాలపై సైటర్లు వేస్తూ.. ప్రభుత్వ పథకాలను సోదాహరణంగా వివరించి ఆకట్టుకున్నారు. కేటీఆర్‌ పంచులు, విసుర్లకు అంతా పగలబడి నవ్వారు. కరతాల ధ్వనులతో ప్రతిస్పందించారు. రైతుబంధుపై ఆవునూరుకు చెందిన నర్సయ్య అన్న మాటలను గుర్తు చేస్తూ రైతుకు ఎంత పొలం ఉంటే అంతే రైతుబంధు వస్తుందని, ఎక్కువ ఉన్న వారికి ఎక్కువనే వస్తుందని వివరించారు. ఎక్కువ భూమి ఉన్నోళ్లకు రావద్దని అనడం సరికాదన్నారు.

• ప్రభుత్వ పథకాలు ఆటోమేటిక్‌గా లబ్ధిదారులకు పోతే ప్రజాప్రతినిధులు అన్న.. మమ్మల్ని ఎవలు కానుతలేరని అంటున్నారని.. మాకు కూడా జెర గిరాకీ ఉండాల గదనే అంటున్నారని, వాస్తవమేనా? అని అడిగి సభలో నవ్వులు పూయించారు. వంద మంది ప్రజాప్రతినిధుల్లో ఒక్కడు లంగా ఉంటే బదనామయితం చెడ్డపేరు వస్తందని సీఎం కేసీఆర్‌ వద్దన్నారని సర్ది చెప్పారు.
• ప్రభుత్వం ఎన్ని సంక్షేమ కార్యక్రమాలు చేపట్టినా కొందరు ఎట్లా బతకాలంటూ పర్యటనలో అడుగుతున్నారని మంత్రి గుర్తు చేశారు. ఇటీవల ఓ వ్యక్తి తన ముగ్గురు పిల్లలు, తాను ఎట్లా బతకాలని ఆవేశంగా అడిగాడని, అతన్ని శాంతపరిచి మర్యాదగా అడుగుమని చెప్పినట్లు తెలిపారు. ప్రభుత్వం పింఛన్లు, రేషన్‌, అన్ని విధాల సౌలత్‌లు చేసినా సమాజంలో వచ్చే మార్పులు ఆశ్చర్యానికి గురి చేస్తున్నాయని ఆవేదన వ్యక్తం చేశారు.
• 10 రోజుల క్రితం ఎల్లారెడ్డిపేటకు డిగ్రీ కళాశాల మంజూరైంది అన్నా.. ఇది మాకు చెప్పలేదు.. పటాకులు కాల్చి సంబురాలు చేసేవాళ్లమని అంటున్నారని, కానీ తానే సంబురాలు వద్దన్నానని. బయటి నియోజకవర్గం దుబ్బాక, ఇతర ప్రాంతాల వాళ్లు అన్నీ సిరిసిల్లకే అంటూ తనను విమర్శిస్తున్నారని చెప్పారు. అందుకే వారించానని, ఏం చేసినా సీక్రెట్‌గా చేసుకుందామంటే వింటలేరని.. తన బాధ ఎవలకు చెప్పుకోవాలని అనడంతో ఒక్కసారిగా లబ్ధిదారులు పగలబడి నవ్వారు.