Belly Fat | పొట్ట చుట్టూ పెరిగిన కొవ్వును ఇలా త‌గ్గించుకోండి..

Belly Fat | ఆధునిక జీవనశైలి, మారిన ఆహారపు అలవాట్లు, నిద్రలేమి, పని ఒత్తిడి.. కారణమేదైనా కానీ, వయసుతో సంబంధం లేకుండా వేధిస్తున్న సమస్య అధిక బరువు. ముఖ్యంగా పొట్ట చుట్టూ పేరుకుపోయిన కొవ్వును కరిగించేందుకు అనేక మార్గాలు..

అన్ని పోషకాలూ కలిగిన సమతుల ఆహారాన్ని తీసుకోవాలి. భోజనంలో ఫైబర్‌ అధికంగా ఉండేలా చూసుకోవాలి. పొట్ట దగ్గరి కొవ్వును తగ్గించడంలో ఫైబర్‌ సాయపడుతుంది. ఫైబర్‌ సమృద్ధ ఆహారం వల్ల చాలాసేపటి వరకూ ఆకలి వేయదు. దీంతో మరింత ఆహారం తీసుకోవాల్సిన అవసరం ఉండదు. సులభంగా బరువు తగ్గవచ్చు. ఇది ఆహారం నుంచి కేలరీల శోషణను కూడా తగ్గిస్తుంది. దీనివల్ల పొట్ట చుట్టూ కొవ్వు తగ్గుతుంది.

ట్రాన్స్‌ ఫ్యాట్స్‌ వద్దు

ట్రాన్స్‌ ఫ్యాట్స్‌ అనేవి ప్రధానంగా నూనెలను వేడి చేసినప్పుడు ఏర్పడతాయి. అంటే, నూనెలో వేయించిన లేదా నూనెతో తయారు చేసిన పదార్థాల్లో ఇవి అధికంగా ఉంటాయి. అందువల్ల నూనె పదార్థాలను ఎక్కువగా తినకూడదు. తింటే శరీరంలో కొవ్వు పేరుకుపోతుంది. డయాబెటిస్‌, గుండె జబ్బులు వచ్చేందుకూ ఆస్కారం ఉంది. నూనె పదార్థాలను మానేయడం వల్ల పొట్ట దగ్గరి కొవ్వు కరుగుతుంది. వారంలో కనీసం ఒక రోజు అయినా ఉపవాసం ఉండాలి. అప్పుడప్పుడు ‘ఇంటర్మిటెంట్‌ ఫాస్టింగ్‌’ను అనుసరించాలి. అంటే రోజులో 6 గంటల పాటు మాత్రమే తిని, మిగతా 18 గంటల పాటు జీర్ణాశయాన్ని ఖాళీగా ఉంచాలి. ఇలా చేస్తుంటే..పొట్ట చుట్టూ పేరుకుపోయిన కొవ్వు కనీసం 4 నుంచి 7 శాతం వరకు కరుగుతుందని చెబుతారు నిపుణులు.

ఒత్తిడిని తగ్గించుకోవాలి

ఒత్తిడి ఎక్కువగా ఉన్నప్పుడు శరీరంలో కార్టిసోల్‌ అనే హార్మోన్‌ విడుదలై.. పొట్ట దగ్గర కొవ్వు పేరుకుపోయేలా చేస్తుంది. కాబట్టి, ఒత్తిడిని వదిలించు కోవాలి. కుటుంబంతో, స్నేహితులతో సమయం గడపడం, యోగా, ధ్యానం ఒత్తిడిని కొంతమేర నివారిస్తాయి. అంతేకాదు, ఆల్కహాల్‌ మితం తప్పి తీసుకోవడం వల్ల శరీరానికి తీవ్ర హాని కలుగుతుంది.

వ్యాయామం ఉత్తమం

రోజూ వ్యాయామం చేయడం వల్ల పొట్ట దగ్గర కొవ్వుతో సహా శరీరంలో ఉండే అదనపు కొవ్వు మొత్తం కరిగిపోతుంది. మంచి ఫలితం పొందాలంటే రోజూ కనీసం 30 నిమిషాల చొప్పున, వారానికి కనీసం 5 రోజులపాటు వ్యాయామం చేయాలి. చెమట పట్టేలా కసరత్తు చేసి హృదయ స్పందన రేటును పెంచాలి. దీనివల్ల కూడా పొట్ట చుట్టూ ఉన్న కొవ్వు కరిగిపోతుంది. వేగవంతమైన నడక, స్కిప్పింగ్‌, జాగింగ్‌, ఏరోబిక్‌ వ్యాయామం వంటివి కూడా కొవ్వును కరిగించడంలో ముఖ్యపాత్ర పోషిస్తాయి.

Read More :

GREEN TEA: ఈ స‌మ‌యంలోనే తాగితేనే అధిక బ‌రువుకు చెక్‌!!”