Cock Fighting : సంక్రాంతికి ముందే జోరుగా కోడిపందేలు.. 32 మంది అరెస్ట్, 60 కోడిపుంజులు స్వాధీనం

Cock Fighting : పశ్చిమగోదావరి జిల్లా నాగిరెడ్డిగూడెంలో పోలీసులు దాడులు నిర్వహించి కోడిపందేల్లో పాల్గొన్న 32 మందిని అరెస్టు చేశారు. 60 కోడిపుంజులను ...

November 7, 2021 / 03:32 PM IST

Cock Fighting : సంక్రాంతికి ముందే జోరుగా కోడిపందేలు.. 32 మంది అరెస్ట్, 60 కోడిపుంజులు స్వాధీనం

ఏలూరు : (Cock Fighting) దీపావళి నిన్ననే ముగిసింది. ఇంకా కార్తీక మాసం ముగియలేదు. అప్పుడే కోడిపందేలా జోరు ప్రారంభమైంది. సంక్రాంతికి ఉభయ గోదావరి జిల్లాలో జోరుగా కనిపించే కోడి పందేలు.. ఇప్పుడే మొదలయ్యాయి. పశ్చిమగోదావరి జిల్లా నాగిరెడ్డిగూడెంలో పోలీసులు దాడులు నిర్వహించి కోడిపందేల్లో పాల్గొన్న 32 మందిని అరెస్టు చేశారు. 60 కోడిపుంజులను పోలీసులు స్వాధీనం చేసుకున్నారు. వీరి నుంచి బైకులు, కార్లు, నగదు కూడా స్వాధీన పర్చుకున్నారు.

పశ్చిమ గోదావరి జిల్లా పరిధిలోని చింతలపూడి మండలం యర్రంపల్లిలో కోడిపందేలు నిర్వహిస్తున్నారన్న సమాచారం మేరకు పోలీసులు దాడులు జరిపారు. జంగారెడ్డి గూడెం డీఎస్పీ రవికిరణ్ ఆధ్వర్యంలో సెబ్ అధికారులు సంయుక్తంగా దాడులు జరిపి కోడిపందేలు నిర్వహిస్తున్న 32 మందిని అరెస్ట్ చేశారు. మరికొందరు పోలీసులకు చిక్కకుండా పరారయ్యారు. వీరి నుంచి దాదాపు రూ. లక్ష నగదుతోపాటు 40 బైకులు, 20 కార్లు, 60 కోడిపుంజులను పోలీసులు స్వాధీనం చేసుకున్నారు. కోడి పందేలు నిర్వహిస్తే కఠిన చర్యలు తప్పవని పోలీసులు హెచ్చరిస్తున్నారు.