అభివృద్ధి, సంక్షేమ పథకాల్లో తెలంగాణ అగ్రగామి : ప్రభుత్వ విప్‌ గంప గోవర్ధన్‌

ప్రత్యేక రాష్ట్రంగా తెలంగాణ ఏర్పడి, పదేండ్లలో అద్భుతమైన ప్రగతి సాధించిందని ప్రభుత్వ విప్‌ గంప గోవర్ధన్‌ పేర్కొన్నారు. తెలంగాణ జాతీయ సమైక్యతా దినోత్సవం సందర్భంగా ఆదిలాబాద్‌ కలెక్టర్‌ కార్యాలయ ఆవరణలో ఆదివారం నిర్వహించిన కార్యక్రమానికి ఆయన హాజరై జాతీయ జెండాను ఎగురవేశారు.

• సీఎం కేసీఆర్‌తోనే దేశంలో నంబర్‌ వన్‌ రాష్ట్రంగా తెలంగాణ
• 76 ఏండ్ల స్వాతంత్య్ర భారతావనిలో 60 ఏండ్లు అస్తిత్వం కోసం ఉద్యమించాం..
• రాష్ట్ర సమైక్యత, సమగ్రతల పరిరక్షణకు సంఘటితంగా పునరంకితమవుదాం..
• బంగారు తెలంగాణ నిర్మాణంలో అందరూ భాగస్వాములు కావాలి..
• అటవీ, పర్యావరణ శాఖ మంత్రి అల్లోల ఇంద్రకరణ్‌రెడ్డి, విప్‌ గంప గోవర్ధన్‌
• ఆదిలాబాద్‌, నిర్మల్‌ జిల్లాల్లో ఘనంగా జాతీయ సమైక్యతా దినోత్సవం
• జాతీయ జెండాలు ఎగురవేసి, గౌరవ వందనం స్వీకరణ..

“పద్నాలుగేండ్లపాటు పోరాడి సాధించుకున్న తెలంగాణ రాష్ట్రంలో ఈ పదేండ్లకాలంలో అద్భుతమైన, అమోఘమైన ప్రగతి సాధించాం. సీఎం కేసీఆర్‌ ప్రవేశపెడుతున్న సంక్షేమ పథకాలతో పల్లెలు, పట్టణాలు కనీవినీ ఎరుగనిరీతిలో ప్రగతి పథంలో దూసుకుపోతున్నాయి. 60 ఏండ్లపాటు అస్తిత్వం కోసం ఉద్యమించిన మనం.. ప్రస్తుతం దేశంలోనే నంబర్‌ వన్‌ స్థానానికి దూసుకెళ్తున్నాం.” అని అటవీ, పర్యావరణ, న్యాయ, దేవాదాయ శాఖ మంత్రి అల్లోల ఇంద్రకరణ్‌రెడ్డి, ప్రభుత్వ విప్‌ గంగ గోవర్ధన్‌ ఉద్ఘాటించారు. ఆదివారం జాతీయ సమైక్యతా దినోత్సవం సందర్భంగా నిర్మల్‌ కలెక్టరేట్‌లో మంత్రి, ఆదిలాబాద్‌ కలెక్టరేట్‌లో విప్‌ జాతీయ పతాకాలను ఆవిష్కరించారు. అనంతరం పోలీసుల గౌరవ వందనం స్వీకరించారు. ఈ సందర్భంగా వారు మాట్లాడుతూ.. ప్రధానంగా సాగు నీరు, వ్యవసాయం, విద్య, వైద్య, మౌలిక సదుపాయాల కల్పనతోపాటు, సంక్షేమ పథకాల అమలులో తెలంగాణ రాష్ట్రం అగ్రగామిగా నిలుస్తున్నదన్నారు. రాష్ట్ర సమైక్యత, సమగ్రతల పరిరక్షణకు సంఘటితంగా పునరంకితం కావాలని, బంగారు తెలంగాణ నిర్మాణంలో అందరూ భాగస్వాములు కావాలని కోరారు.

– ఆదిలాబాద్‌/నిర్మల్‌, సెప్టెంబర్‌ 17(నమస్తే తెలంగాణ)

ఆదిలాబాద్‌, సెప్టెంబర్‌ 17(నమస్తే తెలంగాణ) : ప్రత్యేక రాష్ట్రంగా తెలంగాణ ఏర్పడి, పదేండ్లలో అద్భుతమైన ప్రగతి సాధించిందని ప్రభుత్వ విప్‌ గంప గోవర్ధన్‌ పేర్కొన్నారు. తెలంగాణ జాతీయ సమైక్యతా దినోత్సవం సందర్భంగా ఆదిలాబాద్‌ కలెక్టర్‌ కార్యాలయ ఆవరణలో ఆదివారం నిర్వహించిన కార్యక్రమానికి ఆయన హాజరై జాతీయ జెండాను ఎగురవేశారు. అన్ని వర్గాల ప్రజలకు అభివృద్ధి, సంక్షేమ పథకాలు అమలు చేస్తూ తెలంగాణ అగ్రగామి రాష్ట్రంగా నిలుస్తున్నదన్నారు. 76 ఏండ్ల స్వాతంత్య్ర భారతావనిలో తెలంగాణ 60 ఏండ్ల పాటు అస్తిత్వం కోసం ఉద్యమించిందన్నారు. జాతీయ సమైక్యతా దినోత్సవ స్ఫూర్తితో జాతి సమగ్రతను నిలబెట్టుకుంటూ ప్రజల మధ్య ఐక్యతను కాపాడుకుందామని సూచించారు. భిన్నత్వంలో ఏకత్వాన్ని కా పాడడమే నిజమైన దేశభక్తి అని స్పష్టం చేశారు.