పొట్టుతో పుట్టెడు మేలు

ఉల్లి చేసే మేలు.. తల్లి కూడా చేయదని అంటారు. అయితే, ఉల్లి పొట్టుతోనూ ఎన్నో ఉపయోగాలు ఉన్నాయని నిపుణులు చెబుతున్నారు. చెత్త బుట్టలో పడేసే ఆ పొట్టుతో.. పుట్టెడు లాభాలు పొందవచ్చు.

ఉల్లి చేసే మేలు.. తల్లి కూడా చేయదని అంటారు. అయితే, ఉల్లి పొట్టుతోనూ ఎన్నో ఉపయోగాలు
ఉన్నాయని నిపుణులు చెబుతున్నారు. చెత్త బుట్టలో పడేసే ఆ పొట్టుతో.. పుట్టెడు లాభాలు పొందవచ్చు.

• ఉల్లిపాయ పొట్టులో ఉండే యాంటి ఆక్సిడెంట్‌ లక్షణాలు.. కండరాల నొప్పులను తగ్గించడంలో సమర్థంగా పనిచేస్తాయి.
• ఒక గ్లాసు నీటిలో కొంత ఉల్లిపాయ పొట్టు వేసి, పదిహేను నిమిషాలపాటు బాగా మరిగించాలి. ఆ నీటిని వడగట్టి తాగితే.. కండరాల నొప్పులు తగ్గుముఖం పడుతాయి.
• జుట్టు సంరక్షణకు ఉల్లిపాయలతో ఎంత ప్రయోజనం ఉంటుందో.. ఉల్లి పొట్టు కూడా అంతే సాయపడుతుంది. దీనిలో సల్ఫర్‌ ఎక్కువ. ఇది జుట్టు పెరుగుదలకు ఉపయోగపడే కొలాజెన్‌ ఉత్పత్తిని ప్రోత్సహిస్తుంది. జుట్టు తెల్లబడకుండా కాపాడుతుంది.
• ఒక గ్లాసు నీటిలో నాలుగోవంతు ఉల్లి పొట్టును తీసుకొని.. గంటసేపు బాగా మరిగించాలి. ఈ మిశ్రమాన్ని రాత్రంతా అలాగే వదిలేసి, మరుసటి రోజు ఉదయాన్నే వడబోసి.. జుట్టుకు బాగా పట్టించాలి. 30 నిమిషాలపాటు ఆరనిచ్చి.. తలస్నానం చేస్తే జుట్టు తెల్లబడటం తగ్గుతుంది. చుండ్రు కూడా తొలగిపోతుంది.
• యాంటి ఫంగల్‌ గుణాలు కలిగిన ఉల్లిపాయ పొట్టు.. చర్మ సమస్యలకు చెక్‌ పెడుతాయి.
• ఉల్లి పొట్టును నీటిలో మరగబెట్టి దురద, దద్దుర్లు ఉన్నచోట పూస్తే.. మంచి గుణం కనిపిస్తుంది.
• ఉల్లి పొట్టుతో టీ చేసుకొని తాగితే ఎన్నో ఆరోగ్య ప్రయోజనాలు కలుగుతాయి. ‘ఉల్లి టీ’.. నిద్రలేమిని దూరం చేయడంతోపాటు కంటి ఆరోగ్యాన్నీ మెరుగుపరుస్తుంది.
• రెండు కప్పుల నీటిలో ఉల్లి పొట్టు వేసి.. నీటి రంగు మారేవరకూ మరిగించాలి. ఆ తర్వాత వడపోసి, ఒక టీస్పూన్‌ తేనె కలుపుకొంటే.. ‘ఉల్లి టీ’ సిద్ధం!