Hanumakonda | ప్రోగ్రెస్ హై స్కూల్‌కు చెందిన ఐదుగురు టీచర్లకు తెలుగు బుక్‌ ఆఫ్‌ రికార్డ్‌లో చోటు

హనుమకొండలోని ప్రోగ్రెస్ హై స్కూల్‌కు చెందిన ఐదుగురు టీచర్లకు తెలుగు బుక్‌ ఆఫ్‌ రికార్డ్‌లో చోటు సంపాదించారు.

హనుమకొండ చౌరస్తా, ఫిబ్రవరి 10: హనుమకొండలోని ప్రోగ్రెస్ హై స్కూల్‌లో ఈనెల 8న పాఠశాలలో నిర్వహించిన తెలుగు బుక్‌ ఆఫ్‌ రికార్డ్స్​‍సర్టిఫికేషన్‌ కార్యక్రమంలో పాఠశాలకు చెందిన ఐదుగురు ఉపాధ్యాయులు అరుదైన జ్ఞాపకశక్తి ప్రదర్శనతో విశిష్ట ఘనతను సాధించినట్లు ప్రోగ్రెస్ హై స్కూల్‌ ప్రిన్సిపల్‌, కరస్పాండెంట్‌ మల్లాడి ప్రభాకర్‌రెడ్డి తెలిపారు. ఈ కార్యక్రమంలో ఉపాధ్యాయులు తెలంగాణ రాష్ర్టంలోని అన్ని అసెంబ్లీ నియోజకవర్గాల పేర్లు, ఆయా నియోజకవర్గాలకు సంబంధించిన ఎమ్మెల్యేల పేర్లను, ఎలాంటి సూచనలు లేకుండా, పూర్తిగా జ్ఞాపకశక్తి ఆధారంగా, మూడు నిమిషాలలోపే నిరంతరంగా పఠించడం ద్వారా తమ అసాధారణ మేధస్సును ప్రదర్శించారు.

ఈ అత్యంత క్లిష్టమైన జ్ఞాపక ప్రదర్శనను తెలుగు బుక్‌ ఆఫ్‌ రికార్డ్స్​‍అధికారికంగా పరిశీలించి, రికార్డుగా నమోదు చేసినట్లు చెప్పారు. ఈ ఘనత సాధించిన ఉపాధ్యాయులు గుడి వాణిరెడ్డి, షేక్‌ షరీఫాబేగం, వరాల రావళిక, బి. మౌనిక, ఎన్‌.కృష్ణవేణి ఉన్నారు. ఈ ఉపాధ్యాయులు తమ అపూర్వ జ్ఞాపకశక్తి, తార్కిక నైపుణ్యాలు, క్రమశిక్షణ, బోధనా నిబద్ధతతో ఈ అరుదైన గౌరవాన్ని సొంతం చేసుకున్నట్లు పేర్కొన్నారు.