Inter Exams | నేటి నుంచి ఇంటర్‌ పరీక్షలు.. 9:05 గంటల తర్వాత నో ఎంట్రీ

Inter Exams | ఇంటర్‌ వార్షిక పరీక్షలు బుధవారం నుంచి ప్రారంభంకానున్నాయి. ఉదయం 9 గంటల నుంచి మధ్యాహ్నం 12 గంటల వరకు మొత్తం మూడు గంటలపాటు పరీక్షలు నిర్వహిస్తారు. విద్యార్థులను కాస్త ముందుగానే సెంటర్‌లోకి అనుమతిస్తారు.

Inter Exams | హైదరాబాద్‌, మార్చి 4 (నమస్తే తెలంగాణ) : ఇంటర్‌ వార్షిక పరీక్షలు బుధవారం నుంచి ప్రారంభంకానున్నాయి. ఉదయం 9 గంటల నుంచి మధ్యాహ్నం 12 గంటల వరకు మొత్తం మూడు గంటలపాటు పరీక్షలు నిర్వహిస్తారు. విద్యార్థులను కాస్త ముందుగానే సెంటర్‌లోకి అనుమతిస్తారు. విద్యార్థులు ఉదయం 8:45 గంటలలోపు సెంటర్‌లో ప్రవేశించడం ఉత్తమమని అధికారులు సూచించారు. ఆలస్యంగా వచ్చే వారిని అంటే 9:05 గంటల తర్వాత వచ్చే వారిని అస్సలు అనుమతించరు. బుధవారం ఫస్టియర్‌ విద్యార్థులకు రెండోభాష పేపర్‌-1కు పరీక్ష నిర్వహిస్తారు.

గురువారం సెకండియర్‌ విద్యార్థులకు పరీక్షలు ప్రారంభమవుతాయి. రాష్ట్రవ్యాప్తంగా 1,532 పరీక్షాకేంద్రాలను ఏర్పాటు చేశారు. ఫస్టియర్‌లో 4,88,448 విద్యార్థులు, సెకండియర్‌లో 5,08,523 విద్యార్థుల చొప్పున 9,96,971 విద్యార్థులు పరీక్షలు రాయబోతున్నారు. వీరిలో గతంలో ఫెయిలైన 67,735 మంది విద్యార్థులు కూడా పరీక్షలకు హాజరుకాబోతున్నారు. పరీక్షల కోసం 29,992 మంది ఇన్విజిలెటర్లు, 72 మంది ప్లయింగ్‌స్కాడ్‌, 124 సిట్టింగ్‌ స్కాడ్‌లకు విధులు కేటాయించారు. ఇంటర్‌బోర్డు అబ్జర్వర్లను (పరిశీలకులు) సైతం రంగంలోకి దించనున్నది.

ఏర్పాట్లు ఇవే..

• కంట్రోల్‌ కమాండ్‌ సెంటర్‌లో ప్రత్యేకంగా స్మార్ట్‌నిఘాను పెడుతున్నారు. 45 పరీక్షాకేంద్రాలకు ఒక బృందం చేత నిఘాపెట్టారు.
• పరీక్షకేంద్రాల వద్ద 100 మీటర్ల దూరంలో బీఎన్‌ఎస్‌ 163(144 సెక్షన్‌) అమల్లో ఉంటుంది. పోలీసు బందోబస్తు ఉంటుంది.
• హాల్‌టికెట్‌ లేకుండా విద్యార్థులను పరీక్షకు అనుమతించరు. హాల్‌టికెట్‌పై తప్పులుంటే ప్రిన్సిపాళ్లను, ఇతర అధికారులను సంప్రదించి సవరించుకోవచ్చు.
• విద్యార్థులను గంట ముందు నుంచే అంటే ఉదయం 8 గంటల నుంచే పరీక్షాకేంద్రాల్లోకి అనుమతిస్తారు. ఉదయం 8:45 గంటలకు ఓఎమ్మార్‌షీట్‌ను అందజేస్తారు. ఆలస్యంగా అంటే ఉదయం 9:05 గంటల తర్వాత వచ్చేవారిని అస్సలు అనుమతించరు.
• వాచ్‌లు, సెల్‌ఫోన్లు, పేజీలు, క్యాలిక్యులెటర్లు, ఇతర ఎలక్ట్రానిక్‌ ఉపకరణాలు, ముద్రిత సామగ్రిని పరీక్షాకేంద్రాల్లోకి అనుమతించరు.