Palvai Harish Babu | అప్పట్లో తల్లి, తండ్రి.. ఇప్పుడు తనయుడు.. ఎమ్మెల్యేగా గెలిచిన పాల్వాయి హరీశ్‌

Palvai Harish Babu | అప్పట్లో తల్లి, తండ్రి.. ఇప్పుడు తనయుడు.. ఇలా ఒకే కుటుంబం నుంచి ముగ్గురు అసెంబ్లీకి ప్రాతినిథ్యం వహించిన రికార్డును సిర్పూర్‌ నియోజకవర్గం నుంచి గెలుపొందిన పాల్వాయి కుటుంబం దక్కించుకుంది.

Palvai Harish Babu | హైదరాబాద్‌, డిసెంబర్‌ 3 (నమస్తే తెలంగాణ) : అప్పట్లో తల్లి, తండ్రి.. ఇప్పుడు తనయుడు.. ఇలా ఒకే కుటుంబం నుంచి ముగ్గురు అసెంబ్లీకి ప్రాతినిథ్యం వహించిన రికార్డును సిర్పూర్‌ నియోజకవర్గం నుంచి గెలుపొందిన పాల్వాయి కుటుంబం దక్కించుకుంది. సంఖ్యాపరంగా ఒకటో నెంబర్‌ నియోజకవర్గమైన ఇక్కడి నుంచి గతంలో పాల్వాయి పురుషోత్తంరావు 1989, 1994లో ఇండిపెండెంట్‌ ఎమ్మెల్యేగా గెలుపొందారు. 1999 ఎన్నికల్లో పోటీచేసిన ఆయన్ను పీపుల్స్‌వార్‌ కాల్చి చంపగా, ఆయన భార్య పాల్వాయి రాజ్యలక్ష్మి టీడీపీ అభ్యర్థిగా పోటీచేసి, గెలుపొందారు. సుదీర్ఘకాలం తర్వాత తనయుడు పాల్వాయి హరీశ్‌ బీజేపీ అభ్యర్థిగా సిర్పూర్‌ నుంచి గెలుపొందారు.

ఒకే కుటుంబం నుంచి గెలిచినవారు

• తండ్రి. తనయులైన కేసీఆర్‌, కేటీఆర్‌లిద్దరూ గజ్వేల్‌, సిరిసిల్ల నుంచి ఘనవిజయం సాధించి ఒకే అసెంబ్లీకి మరోసారి ప్రాతినిథ్యం వహించనున్నారు. కేసీఆర్‌ మేనల్లుడైన హరీశ్‌రావు సిద్దిపేట నుంచి రికార్డు విజయాన్ని నమోదుచేశారు.
• భార్యభర్తలైన ఎన్‌ ఉత్తమ్‌కుమార్‌రెడ్డి, ఆయన సతీమణి పద్మావతి హుజూర్‌నగర్‌, కోదాడ నుంచి పోటీచేసి విజయం సాధించారు.
• మైనంపల్లి హన్మంతరావు మల్కాజిగిరి, ఆయన తనయుడు రోహిత్‌రావు మెదక్‌ నుంచి పోటీచేయగా.. రోహిత్‌ విజయం సాధించగా, హన్మంతరావు పరాజయం పాలయ్యారు.
• మాజీ కేంద్రమంత్రి జీ వెంకటస్వామి తనయులిద్దరూ కాంగ్రెస్‌ నుంచి గెలిచారు. బెల్లంపల్లి నుంచి జీ వినోద్‌, చెన్నూరు నుంచి జీ వివేక్‌ ఇద్దరూ గెలుపొందారు. వెంకటస్వామి అసెంబ్లీకి ఎన్నికై రాష్ట్రమంత్రిగా సేవలందించగా, వినోద్‌ ఒక పర్యాయం రాష్ట్రమంత్రిగా సేవలందించారు. వికారాబాద్‌ నుంచి గెలిచిన మాజీ మంత్రి ప్రసాద్‌కుమార్‌.. వినోద్‌, వివేక్‌కు సమీప బంధువు కాగా, ముగ్గురు ఒకేసారి అసెంబ్లీకి ప్రాతినిథ్యం
  వహించనున్నారు.
• కోమటిరెడ్డి వెంకట్‌రెడ్డి నల్లగొండ, ఆయన సోదరుడు రాజగోపాల్‌రెడ్డికి మునుగోడు నుంచి విజయంసాధించారు. వీరిద్దరు భువనగిరి ఎంపీలుగా గెలవగా, తాజాగా ఇద్దరు అసెంబ్లీకి గెలిచారు.
• కాంగ్రెస్‌ సీనియర్‌ నేత జానారెడ్డి కుమారుడు జయవీర్‌రెడ్డి నాగార్జునసాగర్‌లో గెలుపొందారు. మాజీ మంత్రి చిట్టెం నర్సిరెడ్డి సమీప బంధువు చిట్టెం పర్మికారెడ్డి నారాయణపేటలో గెలిచారు.
• నాగర్‌కర్నూల్‌లో ఎమ్మెల్సీ కూచకుళ్ల దామోదర్‌రెడ్డి తనయుడు డాక్టర్‌ కూచకుళ్ల రాజేశ్‌రెడ్డి గెలుపొందారు.
• మాజీ స్పీకర్‌ శ్రీపాదరావు తనయుడు శ్రీధర్‌బాబు మంథనిలో, నారాయణఖేడ్‌లో కిష్టారెడ్డి తనయుడు సంజీవరెడ్డి, అందోల్‌లో మాజీ మంత్రి రాజనర్సింహ తనయుడు దామోదర రాజనర్సింహ గెలుపొందారు.
• మాజీ మంత్రి ఎర్రబెల్లి దయాకర్‌రావు ఓటమిపాలు కాగా, ఆయన అల్లుడు మదన్‌మోహన్‌రావు ఎల్లారెడ్డి నుంచి గెలుపొందారు. దయాకర్‌రావు సోదరుడు ప్రదీప్‌రావు వరంగల్‌-తూర్పు నుంచి ఓటమి చవిచూశారు.
• మామా అల్లుళ్లు అయిన చామకూర మల్లారెడ్డి మేడ్చల్‌ నుంచి, మర్రి రాజశేఖర్‌రెడ్డి మల్కాజిగిరి నుంచి ఘన విజయాన్ని నమోదుచేశారు. ఇద్దరు ఒకే సమయంలో అసెంబ్లీకి ప్రాతినిథ్యం వహించనున్నారు.
• కంటోన్మెంట్‌కు సుదీర్ఘకాలం ఎమ్మెల్యేగా పనిచేసిన సాయన్న కూతురు లాస్యనందిత కంటోన్మెంట్‌లో విజయం సాధించారు.
• ఆసిఫాబాద్‌ నుంచి పోటీచేసిన కోవా లక్ష్మి.. మాజీ మంత్రి కోట్నాక భీంరావు కూతురు కాగా, ఆమె విజయం సాధించారు. కోరుట్ల ఎమ్మెల్యే డాక్టర్‌ సంజయ్‌ ఎమ్మెల్యే కల్వకుంట్ల విద్యాసాగర్‌రావు తనయుడిగా విజయతీరాలకు చేరారు.