Visit:
Virosh | టాలీవుడ్ స్టార్ జంట విజయ్ దేవరకొండ- రష్మిక మందన్నా పెళ్లి వేడుకలు ప్రస్తుతం సోషల్ మీడియాలో హాట్ టాపిక్గా మారాయి. తాజాగా జరిగిన వీరి వెడ్డింగ్ రిసెప్షన్లో రష్మిక తల్లిదండ్రుల సంప్రదాయ దుస్తులు అందరి దృష్టిని ఆకర్షించారు. సాధారణంగా సెలబ్రిటీ వేడుకల్లో ఖరీదైన డిజైనర్ డ్రెస్సులు కనిపిస్తాయి. అయితే రష్మిక తల్లిదండ్రులు మాత్రం తమ గిరిజన మూలాలను ప్రతిబింబించే సంప్రదాయ వస్త్రధారణలో హాజరై ప్రత్యేకంగా నిలిచారు. రష్మిక కర్ణాటకలోని కొడుగు (కూర్గ్) ప్రాంతానికి చెందిన కొడవ సముదాయానికి చెందినవారు. ఈ ప్రాంత సంస్కృతి, సంప్రదాయాలు దేశంలో ప్రత్యేక గుర్తింపు పొందాయి. ముఖ్యంగా అక్కడి పురుషులు ధరించే కుప్యా అనే నలుపు రంగు కోటు తరహా దుస్తులు, మహిళలు ధరించే ప్రత్యేక కొడవ చీర కట్టు వారి సాంప్రదాయాన్ని ప్రతిబింబిస్తాయి. రష్మిక తల్లిదండ్రులు కూడా అదే సంప్రదాయ వేషధారణలో రిసెప్షన్కు హాజరై తమ వారసత్వాన్ని ఘనంగా చాటిచెప్పారు.
ఈ వేడుకలో రష్మిక తండ్రి మందన్న మదన్ ధరించిన వేషధారణ ప్రత్యేక ఆకర్షణగా నిలిచింది. నడుముకు చుట్టుకున్న ఎరుపు రంగు పట్టు వస్త్రం (చేలే), అందులో అమర్చిన సంప్రదాయ కత్తి (పిచే కత్తి) కొడవ యోధుల సాహసాన్ని గుర్తు చేశాయి. ఆధునిక కాలంలో కూడా తమ మూలాలను మరచిపోకుండా ఇలాంటి ప్రతిష్టాత్మక వేడుకలో సంప్రదాయ దుస్తులు ధరించడం వారి సంస్కృతి పట్ల ఉన్న గౌరవాన్ని తెలియజేసింది.అలాగే రష్మిక తల్లి సుమన్ మందన్న ధరించిన కొడవ స్టైల్ చీర కూడా ప్రత్యేక ఆకర్షణగా నిలిచింది. కొడవ మహిళలు చీరను సాధారణంగా ముందు కుచ్చెళ్లతో కాకుండా వెనుక భాగంలో కుచ్చెళ్లతో కడతారు. కొండ ప్రాంతాల్లో నివసించే ప్రజల కదలికలకు సౌలభ్యం ఉండేలా పూర్వీకులు ఈ విధానాన్ని పాటించేవారు. ఒక స్టార్ హీరోయిన్ తల్లి సంప్రదాయ చీరలో కనిపించడం అతిథులను ఆకట్టుకుంది.
ఈ వేడుక ద్వారా రష్మిక కుటుంబం ఒక గొప్ప సందేశాన్ని ప్రపంచానికి అందించింది. ఎంత ఎత్తుకు ఎదిగినా తమ పుట్టిన గడ్డను, సంస్కృతిని మరచిపోకూడదని వారు నిరూపించారు. గిరిజన సంస్కృతి వెనుకబాటుతనానికి ప్రతీక కాదు, గర్వించదగ్గ వారసత్వమని వారి వస్త్రధారణ తెలియజేసింది. ప్రస్తుతం విరోష్ రిసెప్షన్ ఫోటోలు సోషల్ మీడియాలో వైరల్ అవుతుండగా, నెటిజన్లు రష్మిక తల్లిదండ్రుల సంప్రదాయ దుస్తులపై ప్రశంసల వర్షం కురిపిస్తున్నారు. తమ మూలాలను మరచిపోని గొప్ప కుటుంబమని అభిమానులు కామెంట్లు చేస్తున్నారు. ఈ పెళ్లి వేడుక కేవలం ఇద్దరు స్టార్ల కలయికగా మాత్రమే కాకుండా, భారతీయ సంస్కృతి సంప్రదాయాల మేళవింపుగా నిలిచింది.
