Indiramma Indlu | పేదలకు ఇందిరమ్మ ఇండ్లు ఇవ్వరా?.. పూరి గుడిసెలు, తాటాకు ఇండ్లలో ఉన్నోళ్లం అనర్హులమా?

ములుగు జిల్లా వాజేడు మండలానికి వచ్చిన భద్రాచలం ఎమ్మెల్యే తెల్లం వెంకట్రావుకు శుక్రవారం ఓ కాంగ్రెస్‌ కార్యకర్త గోడు వెల్లబోసుకున్నాడు.

• అశ్వారావుపేటలో అధికారులను నిలదీసిన నిరుపేదలు
• అర్హుల ఎంపికలో అవకతవకలు జరుగుతున్నాయని
• జాతీయ రహదారిపై ఎల్లక్కపేటవాసుల రాస్తారోకో
• ఇల్లు మంజూరుకు రూ.10వేలు అడుగుతున్నరు
• ఎమ్మెల్యే వెంకట్రావుకు కాంగ్రెస్‌ కార్యకర్త ఫిర్యాదు
• మాకు నచ్చినోళ్లకే ఇందిరమ్మ ఇండ్లు ఇస్తం
• మక్తల్‌లో అర్హులపై కాంగ్రెస్‌ నేత చిందులు

ఇందిరమ్మ ఇల్లుకు 10 వేలు లంచం అడుగుతున్రు..!

ములుగు జిల్లా వాజేడు మండలానికి వచ్చిన భద్రాచలం ఎమ్మెల్యే తెల్లం వెంకట్రావుకు శుక్రవారం ఓ కాంగ్రెస్‌ కార్యకర్త గోడు వెల్లబోసుకున్నాడు. ఇందిరమ్మ ఇంటి మంజూరు కోసం కొందరు రూ.10వేలు అడుగుతున్నారని కొప్పుసూరు గ్రామానికి చెందిన కార్యకర్త ముత్యారావు ఫిర్యాదు చేశాడు. అర్హత ఉన్నా తన భార్య జమున పేరు జాబితాలో రాలేదని తెలిపాడు.

-వాజేడు

మా ఇష్టమొచ్చినోళ్లకు ఇచ్చుకుంటం..!

నారాయణపేట జిల్లా మక్తల్‌ మున్సిపాలిటీలోని అంబేదర్‌నగర్‌లో అధికారులు శుక్రవారం ఇందిరమ్మ ఇండ్ల అర్హుల జాబితా విడుదల చేశారు. అందులో అనర్హుల పేర్లు ఉండడంతో స్థానికులు అధికారులను నిలదీశారు. ఓ కాంగ్రెస్‌ నేత స్పందించి ‘మాకు ఇష్టం వచ్చిన వారికే ఇండ్లను కేటాయిస్తున్నాం.. ఇది మా ప్రభుత్వం..’ అంటూ తెగేసి చెప్పాడు.

– మక్తల్‌

ఎంపికలో అవకతవకలు… రోడ్డెక్కిన గ్రామస్థులు

‘ఇందిరమ్మ ఇండ్ల ఎంపికలో అవకతవకలు జరుగుతున్నాయి. ఇందిరమ్మ కమిటీ సభ్యులు డబ్బులిచ్చినోళ్లను.. నచ్చినోళ్లనే ఎంపిక చేస్తున్నరు. అర్హులందరికీ న్యాయం చేయాలి’ అని డిమాండ్‌ చేస్తూ మంచిర్యాల జిల్లా కిష్టంపేట జీపీ పరిధిలోని ఎల్లక్కపేట కాలనీవాసులు రోడ్డెక్కారు.

-చెన్నూర్‌ రూరల్‌

ఇండ్లు లేనోళ్లకిస్తరా.. ఇష్టమొచ్చినోళ్లకిస్తరా?

తలదాచుకునేందుకు గూడు లేని తమకు ఇండ్లు ఎందుకు ఇవ్వరని భద్రాద్రి జిల్లా గుర్రాలచెరువు గ్రామస్థులు అధికారులను నిలదీశారు. అర్హుల జాబితాపై అధికారుల విచారణలో మండిపడ్డారు. ఇందిరమ్మ కమిటీల బాధ్యులు ఇష్టారాజ్యంగా వ్యవహరిస్తున్నారని తెలిపారు.

– అశ్వారావుపేట టౌన్‌