FCI | కేంద్ర కొర్రీలు, ఎఫ్‌సీఐ సతాయింపులతో మిల్లుల్లోని మిగులు ధాన్యం బహిరంగ వేలం

కేంద్రం కొర్రీలు, ఫుడ్‌ కార్పొరేషన్‌ ఆఫ్‌ ఇండియా (ఎఫ్‌సీఐ) సతాయింపులతో మిల్లుల్లో పేరుకుపోయిన మిగులు ధాన్యాన్ని విక్రయించాలని తెలంగాణ సర్కారు నిర్ణయించింది. 2022-23 వానకాలం, యాసంగిలో మిగిలిన ధాన్యాన్ని వేలం వేయాలని నిర్ణయం తీసుకొన్నది.

• విధి విధానాల రూపకల్పనకు రాష్ట్రస్థాయి కమిటీ ఏర్పాటు
• మిల్లింగ్‌ కెపాసిటీ పెంచడంపైనా కమిటీ కసరత్తు
• కమిటీ చైర్మన్‌గా ఆర్థిక శాఖ స్పెషల్‌ చీఫ్‌ సెక్రటరీ
• కేంద్రం కొర్రీలతో ధాన్యం వేలానికి రాష్ట్రం నిర్ణయం

FCI |  హైదరాబాద్‌, ఆగస్టు 10 (నమస్తే తెలంగాణ): కేంద్రం కొర్రీలు, ఫుడ్‌ కార్పొరేషన్‌ ఆఫ్‌ ఇండియా (ఎఫ్‌సీఐ) సతాయింపులతో మిల్లుల్లో పేరుకుపోయిన మిగులు ధాన్యాన్ని విక్రయించాలని తెలంగాణ సర్కారు నిర్ణయించింది. 2022-23 వానకాలం, యాసంగిలో మిగిలిన ధాన్యాన్ని వేలం వేయాలని నిర్ణయం తీసుకొన్నది. ధర నిర్ణయించడంతోపాటు వేలానికి సంబంధించిన విధి విధానాలను రూపొందించేందుకు ప్రభుత్వం రాష్ట్రస్థాయి కమిటీని ఏర్పాటు చేసింది. ఈ మేరకు ప్రభుత్వ ప్రధాన కార్యదర్శి శాంతికుమారి గురువారం ఉత్తర్వులు జారీ చేశారు. ఈ కమిటీ ధాన్యం వేలం వేసేందుకు విధి విధానాలను రూపొందించడంతో పాటు రాష్ట్రంలో మిల్లింగ్‌ కెపాసిటీ పెంచడంపై, ఫుడ్‌ ప్రాసెసింగ్‌ జోన్ల ఏర్పాటుకు స్థలం గుర్తింపు, పరిశ్రమలకు రాయితీలు, అధిక మొత్తంలో పెట్టుబడులు పెట్టగల వ్యాపారులను గుర్తించడం వంటి అంశాలపైనా కమిటీ కసరత్తు చేయనున్నది. ఈ కమిటీకి ఆర్థిక శాఖ ప్రత్యేక ప్రధాన కార్యదర్శి చైర్మన్‌గా వ్యవహరిస్తుండగా.. రాష్ట్ర పరిశ్రమల శాఖ ప్రత్యేక ప్రధాన కార్యదర్శి, సీఎం కార్యదర్శి, టీఎస్‌ఐఐసీ ఎండీ, సివిల్‌సైప్లె కమిషనర్‌ సభ్యులుగా ఉండనున్నారు. పౌరసరఫరాల సంస్థ సమస్యలపై ఇటీవల సీఎం కేసీఆర్‌ సమీక్ష నిర్వహించారు. ఇందులో భాగంగానే సీఎం కేసీఆర్‌ ఆదేశాల మేరకు కమిటీని నియమించింది.

కేంద్రం కొర్రీలు… మిల్లుల్లో గుట్టలుగా ధాన్యం
రాష్ట్ర ప్రభుత్వం సేకరించిన ధాన్యం నుంచి తీసిన బియ్యం కొనుగోలుకు కేంద్ర ప్రభుత్వం కొర్రీలు పెడుతున్నది. బాయిల్డ్‌ రైస్‌ తీసుకోబోమని, కేవలం రా రైస్‌, ఫోర్టిఫైడ్‌ రైస్‌ మాత్రమే కావాలంటూ కండిషన్‌ పెట్టింది. కేంద్ర ప్రభుత్వ కనుసన్నల్లో నడుస్తున్న ఎఫ్‌సీఐ వేధింపులు ఇందుకు తోడయ్యాయి. 2022-23 వానకాలం సీజన్‌లో రాష్ట్ర సర్కారు రూ.13,750 కోట్లు రైతులకు ఇచ్చి 64.30 లక్షల టన్నుల ధాన్యం సేకరించింది. యాసంగిలో రూ.13,838 కోట్లు వెచ్చించి 65.82 కోట్ల ధాన్యం సేకరించింది. ఒక్క ఏడాదిలోనే 1.30 కోట్ల టన్నుల ధాన్యం సేకరించగా, కొంతమాత్రమే ఎఫ్‌సీఐ తీసుకోగా ఇంకా 1.10 కోట్ల టన్నుల ధాన్యం మిల్లుల్లోనూ మూలుగుతున్నది. మరో మూడు నెలల్లో వానకాలం సీజన్‌ ధాన్యం రావడం ప్రారంభమవుతుంది. ఈ పరిస్థితుల్లో ధాన్యం వేలం వేసి విక్రయించడం వల్లే పలు సమస్యలకు పరిష్కారం లభిస్తుందని తెలంగాణ సర్కారు భావించింది.

కమిటీ బాధ్యతలు

1.మిల్లింగ్‌ కెపాసిటీ పెంచేందుకు..

• వరి ఉత్పత్తికి అనుగుణంగా మిల్లింగ్‌ సామర్థ్యం లేనటువంటి ప్రాంతాలను గుర్తించడం.
• ఫుడ్‌ ప్రాసెసింగ్‌ జోన్ల ఏర్పాటుకు అవసరమైన స్థలాలను అన్వేషించడం.
• మిల్లింగ్‌ రంగంలో పెద్ద పెట్టుబడులను ఆకర్షించేందుకుగానూ ఆకర్షణీయమైన ఇండస్ట్రియల్‌ రాయితీ పాలసీని రూపొందించడం.
• త్వరతిగతిన పరిశ్రమలను స్థాపించి ఏడాదిలోపే పరిశ్రమలను అందుబాటులోకి తీసుకొచ్చేలా అవసరమైన సాంకేతికతను గుర్తించడం.
• భారీ పెట్టుబడులు పెట్టే వారిని గుర్తించి, వారి సందేహాలను నివృత్తి చేసి ఫుడ్‌ ప్రాసెసింగ్‌ జోన్లలో పరిశ్రమలు పెట్టేలా వారిని ప్రోత్సహించడం.
• బియ్యం, వాటి ఉప ఉత్పత్తుల విక్రయానికి లాభదాయకమైన మార్కెటింగ్‌ మార్గాలను సృష్టించడం.
• సామర్థ్యం ఆధారంగా కచ్చితంగా మిల్లింగ్‌ చేసేలా ప్రస్తుతం ఉన్నటువంటి కస్టమ్‌ మిల్లింగ్‌ పాలసీలో మార్పులు చేయడం.

2. మిగులు ధాన్యం వేలం వేసేందుకు

• ధాన్యం నాణ్యతను అంచనా వేయడం.
• ధాన్యం నాణ్యత, ధర ఆధారంగా ధాన్యం వేలం వేసేందుకు గల అనుకూలతలపై మార్కెట్‌లో అధ్యయనం చేయడం.
• రెండు సీజన్లకు సంబంధించిన ఎంత ధాన్యంను వేలం వేయగలమో గుర్తించడం.
• ధాన్యం వేలం వేసేందుకు కనీస ధర (బేస్‌ ప్రైజ్‌)ను నిర్ణయించడం.
• ధాన్యం వేలం వేసేందుకు అవసరమైన పద్ధతులను ప్రతిపాదించడం.