పుస్తకాల్లేని చదువులు!.. పాఠాలు సాగక విద్యార్థుల ఇక్కట్లు

బడులు ప్రారంభమయ్యే తొలిరోజే విద్యార్థులకు ఉచిత పాఠ్యపుస్తకాలు ఇస్తామన్న విద్యాశాఖ మాటలు నీటిమూటలయ్యాయి. బడులు ప్రారంభమై వారం గడిచినా పాఠ్యపుస్తకాలు పూర్తిస్థాయిలో విద్యార్థులకు అందనేలేదు. అరకొర, అసమగ్రంగా పుస్తకాలను అందజేశారు.

• విద్యార్థులకు అందని అన్ని పుస్తకాలు
• జిల్లా కేంద్రాల నుంచి మండల, గ్రామ పాఠశాలలకు చేరని వైనం
• బాలలకు చేరవేయడంలో నిర్లక్ష్యం

హైదరాబాద్‌, జూన్‌ 17 (నమస్తే తెలంగాణ): బడులు ప్రారంభమయ్యే తొలిరోజే విద్యార్థులకు ఉచిత పాఠ్యపుస్తకాలు ఇస్తామన్న విద్యాశాఖ మాటలు నీటిమూటలయ్యాయి. బడులు ప్రారంభమై వారం గడిచినా పాఠ్యపుస్తకాలు పూర్తిస్థాయిలో విద్యార్థులకు అందనేలేదు. అరకొర, అసమగ్రంగా పుస్తకాలను అందజేశారు. దీంతో ఉచిత పాఠ్యపుస్తకాల లక్ష్యం నెరవేరడం లేదు. పాఠ్యపుస్తకాలు జిలా కేంద్రాలకు చేరినా, అక్కడి నుంచి బడులకు చేరవేయడంలో తీరని నిర్లక్ష్యం కనిపిస్తున్నది. ఈ నెల 12న స్కూళ్లు తెరుచుకున్నాయి. చాలా జిల్లాల్లో కొన్ని పుస్తకాలిచ్చి, మిగతా పుస్తకాలను ఇవ్వనేలేదు. క్షేత్రస్థాయి నుంచి అందిన సమాచారం ప్రకారం 1.32 కోట్ల పుస్తకాలకు గాను 91.45 లక్షల పుస్తకాలు మండలాలకు చేరినట్టు తెలిసింది. వీటిలో పూర్తిస్థాయిలో పుస్తకాలు బడులకు చేరలేదని తెలిసింది. దీంతో బడులు ప్రారంభమైనా చదువులు ముందుకు సాగడంలేదు.

జిల్లాల్లో పరిస్థితులు ఇవీ..

• కరీంనగర్‌ ఉమ్మడి జిల్లాలో ఒకటి నుంచి ఐదో తరగతి వరకు వర్క్‌బుక్స్‌ ఇవ్వలేదు. మూడు, ఐదో తరగతి తెలుగు, ఇంగ్లిష్‌, ఒకటో తరగతి గణితం వర్క్‌బుక్స్‌ ఇంకా అందలేదు.
• ఖమ్మం జిల్లాలో 5వ తరగతి తెలుగు, 6,7, 8, 9 హిందీ పుస్తకాలు ఇంకా బడులకు చేరనేలేదు. 9వ తరగతి హిందీ పుస్తకాలు ఎప్పుడు వస్తాయో తెలియని పరిస్థితి నెలకొన్నది.
• నాగర్‌కర్నూల్‌ జిల్లాలో 9వ తరగతి ఇంగ్లిష్‌ పుస్తకాలు, మహబూబ్‌నగర్‌లో హిందీ, ఆదిలాబాద్‌లో ఇంకొన్ని పుస్తకాలు అందలేదని తెలుస్తున్నది.
• కొన్ని జిల్లాల్లో మొదటి విడుతలో కొన్ని పుస్తకాలు అందించారు. ఆ తర్వాత రెండో విడుతలో మరికొన్ని పుస్తకాలను చేరవేశారు.
• భద్రాద్రి కొత్తగూడెం జిల్లాలో పాఠశాలలకు 50శాతం లోపు పుస్తకాలే చేరినట్టు సమాచారం. సూర్యాపేట జిల్లాలో 53శాతమే పుస్తకాలు అందాయి.

జిల్లాలకు చేరని పుస్తకాల టైటిల్స్‌: ఉపాధ్యాయ సంఘాలు

విద్యార్థులకు అందించే పాఠ్యపుస్తకాలు ఇంకా జిల్లాలకు చేరలేదని ఉపాధ్యాయ సంఘాల నేతలు పాఠశాల విద్యాశాఖ డైరెక్టర్‌ నవీన్‌ నికోలస్‌ దృష్టికి తీసుకెళ్లాయి. కొన్ని పుస్తకాల టైటిళ్లు జిల్లాలకే చేరలేదని ఆయా పుస్తకాలను వెంటనే జిల్లాలకు చేర్చాలని ఎస్టీయూ టీఎస్‌ రాష్ట్ర అధ్యక్షుడు ఎం పర్వత్‌రెడ్డి, జాక్టో చైర్మన్‌ జీ సదానందంగౌడ్‌, ప్రధాన కార్యదర్శి కృష్ణుడు వినతిపత్రాన్ని సమర్పించారు.

ఒకట్రెండు రోజుల్లో స్కూళ్లకు చేర్చుతాం

విద్యార్థులకు అందించే పాఠ్యపుస్తకాలను నూరుశాతం జిల్లాలకు చేర్చాం. పుస్తకాల సరఫరాపై ఎప్పటికప్పుడు సమీక్షిస్తున్నాం. నివేదికలు తెప్పించుకుంటున్నాం. జిల్లా కేంద్రాలకు చేరిన పుస్తకాలను పాఠశాలలకు చేర్చే బాధ్యతను డీఈవోలు చూస్తున్నారు. ఎక్కడైనా అందకపోతే ఒకట్రెండు రోజుల్లో చేర్చేందుకు చొరవ తీసుకుంటాం.

– రమణకుమార్‌, ముద్రణా సంస్థ డైరెక్టర్‌