అమల్లోకి ఎస్సీ వర్గీకరణ చట్టం

రాష్ట్ర ప్రభుత్వం తెలంగాణ షెడ్యూల్డ్‌ కులాలు (రిజర్వేషన్ల హేతుబద్దీకరణ) చట్టం-2025 పేరిట గెజిట్‌ విడుదల చేసింది. ఇది తక్షణం అమల్లోకి వచ్చినట్టు స్పష్టంచేసింది. ఎస్సీలకు ఇప్పటివరకు ఉమ్మడిగా అమలైన రిజర్వేషన్లు, ఇకపై గ్రూపులవారీగా అమలు కానున్నాయని తెలిపింది.

• గెజిట్‌, మార్గదర్శకాలు విడుదల చేసిన ప్రభుత్వం
• విద్య, ఉద్యోగ రంగాలకు మాత్రమే పరిమితం
• ఎస్సీ అభ్యర్థులు లేకుంటే పోస్టులు క్యారీఫార్వర్డ్‌
• గ్రూపుల వారీగా రోస్టర్‌ పాయింట్ల కేటాయింపు

హైదరాబాద్‌, ఏప్రిల్‌14 (నమస్తే తెలంగాణ): రాష్ట్ర ప్రభుత్వం తెలంగాణ షెడ్యూల్డ్‌ కులాలు (రిజర్వేషన్ల హేతుబద్దీకరణ) చట్టం-2025 పేరిట గెజిట్‌ విడుదల చేసింది. ఇది తక్షణం అమల్లోకి వచ్చినట్టు స్పష్టంచేసింది. ఎస్సీలకు ఇప్పటివరకు ఉమ్మడిగా అమలైన రిజర్వేషన్లు, ఇకపై గ్రూపులవారీగా అమలు కానున్నాయని తెలిపింది. రాష్ట్రంలో మొత్తం 59 షెడ్యూల్డ్‌ కులాలు ఉండగా ఇప్పటివరకు ఆ కులాలకు 15శాతం రిజర్వేషన్లను అమలు చేస్తున్నది.

ప్రస్తుతం మొత్తం షెడ్యూల్డ్‌ కులాలను వాటి జనాభా, ఆర్థిక వెనుకబాటు ఆధారంగా 3 గ్రూపులుగా ప్రభుత్వం విభజించింది. విద్యా, ఉద్యోగ నియామకాల్లో, స్థానిక సంస్థల్లో ఇతర వాటిల్లో సవరించిన రిజర్వేషన్లను మాత్రమే పాటించాలని గెజిట్‌లో వెల్లడించింది. గెజిట్‌తో పాటుగా రిజర్వేషన్ల అమలుకు మార్గదర్శకాలను, ప్రభుత్వ సర్వీస్‌ నియమకాల కోసం రోస్టర్‌ పాయింట్లను కూడా సవరిస్తూ ప్రభుత్వం ఉత్వర్వులు విడుదల చేసింది.

జనాభా లెక్కల తర్వాతనే రిజర్వేషన్‌ పెంపు: మంత్రి ఉత్తమ్‌

ఎస్సీ రిజర్వేషన్‌ ఉప వర్గీకరణ చట్టం గెజిట్‌ కాపీపై మంత్రివర్గ ఉపసంఘం సచివాలయంలో సోమవారం చర్చించింది. గెజిట్‌ తొలి కాపీని ముఖ్యమంత్రి రేవంత్‌రెడ్డికి అందజేసింది. అనంతరం ఉపసంఘం చైర్మన్‌ ఉత్తమ్‌కుమార్‌రెడ్డి మాట్లాడుతూ 2026 జనాభా లెక్కల ఆధారంగా రాష్ట్రంలో ఎస్సీలకు అమలు చేస్తున్న రిజర్వేషన్‌ శాతాన్ని పెంచుతామని తెలిపారు.

సుప్రీంకోర్టు తీర్పును అనుసరించి విద్యా, ఉద్యోగ అవకాశాలు, సామాజిక, ఆర్థిక, రాజకీయ స్థితిగతులను పరిగణనలోకి తీసుకుని ఎస్సీ రిజర్వేషన్లను వర్గీకరించామని, ప్రభుత్వం చేపట్టిన వర్గీకరణ ఏ కులానికీ వ్యతిరేకంకాదని చెప్పారు. వర్గీకరణ కోసం పోరాడి అసువులు బాసిన అమరవీరులకు నివాళి అర్పించారు.

చట్టం నూతన మార్గదర్శకాలు

• ప్రభుత్వ ఉద్యోగాలను తొలుత గ్రూప్‌-1లోని కులాలతో, అకడ మిగిలితే గ్రూప్‌-2, ఆ తర్వాత గ్రూప్‌-3లోని కులాలతో భర్తీ చేస్తారు. 3 గ్రూపుల్లోనూ అర్హత కలిగిన అభ్యర్థులు లేకపోతే ఆ ఖాళీలను క్యారీ ఫార్వర్డ్‌ చేస్తారు.
• గ్రూప్‌-1లోని కులాలకు 7వ రోస్టర్‌ పాయింట్‌ను, గ్రూప్‌-2 కులాలకు 16, 27, 47, 52, 66, 72, 87, 97, గ్రూప్‌-సీలోని కులాలకు 22, 41, 62, 77, 91 రోస్టర్‌ పాయింట్లను కేటాయించారు.
• ఎస్సీ మహిళలకు సంబంధించి 33.3 శాతం రిజర్వేషన్‌ కేటాయించారు.
• ఇప్పటికే జారీ అయిన ఉద్యోగ నోటిఫికేషన్లకు ఈ చట్టం వర్తించదు.
• ఎస్సీ రిజర్వేషన్లు రాష్ట్ర ప్రభుత్వ నియామకాలు, విద్యా సంస్థల్లోనే అమలవుతాయి. కేంద్ర ప్రభుత్వ ఉద్యోగాలు, విద్యాసంస్థల్లోని సీట్ల భర్తీకి ఈ చట్టం వర్తించదు.
• చట్టం ద్వారా ఎదురయ్యే అన్ని అంశాలను నివృత్తి చేయాల్సిన బాధ్యత ప్రభుత్వానిదే.