పిల్లల్లో పఠనాసక్తి పెంచేలా..

విద్యార్థుల చదువులపై కరోనా తీవ్ర ప్రభావం చూపింది. రెండేండ్లు విద్యాసంస్థలు సక్రమంగా తెరుచుకోకపోవడంతో పిల్లల్లో పఠనా సామర్థ్యం దెబ్బతిన్నది. విద్యార్థుల్లో పఠనాసక్తి తిరిగి పెంపొందించేందుకు రాష్ట్ర సర్కారు ప్రత్యేక కార్యక్రమానికి శ్రీకారం చుట్టింది

చదువు-ఆనందించు-అభివృద్ధి చెందు
పేరుతో ప్రభుత్వం ప్రత్యేక కార్యాచరణ
నేటినుంచే అన్ని పాఠశాలల్లో అమలు.. విద్యాశాఖ మార్గదర్శకాలు జారీ

 

హైదరాబాద్‌, ఫిబ్రవరి 4 : విద్యార్థుల చదువులపై కరోనా తీవ్ర ప్రభావం చూపింది. రెండేండ్లు విద్యాసంస్థలు సక్రమంగా తెరుచుకోకపోవడంతో పిల్లల్లో పఠనా సామర్థ్యం దెబ్బతిన్నది. విద్యార్థుల్లో పఠనాసక్తి తిరిగి పెంపొందించేందుకు రాష్ట్ర సర్కారు ప్రత్యేక కార్యక్రమానికి శ్రీకారం చుట్టింది. ‘చదువు-ఆనందించు-అభివృద్ధి చెందు’ పేరుతో పఠనా సామర్థ్యం పెంచేందుకు ప్రత్యేక మార్గదర్శకాలు రూపొందించింది. శనివారం నుంచి అన్ని విద్యాసంస్థల్లో, మాధ్యమాల్లో వీటిని అమలుచేయాలని ఆదేశాలు జారీ చేసింది. కొవిడ్‌ నిబంధనలు పాటిస్తూనే విద్యార్థులు తమ స్థాయికి అనుగుణంగా ధారాళంగా చదివేలా తీర్చిదిద్దాలని సూచించింది. పూర్వ ప్రాథమిక తరగతులతోపాటు 9వ తరగతి వరకు ప్రత్యేక కార్యాచరణను అమలుచేయాలని తెలిపింది.

పాఠశాల విద్య బలోపేతానికే..
పాఠశాల విద్యను బలోపేతం చేసేందుకే ప్రభుత్వం పఠనాభివృద్ధి కార్యక్రమాన్ని తలపెట్టిందని నోడల్‌ అధికారి సువర్ణ వినాయక్‌ తెలిపారు. శుక్రవారం చదువు- ఆనందించు- అభివృద్ధి చెందు కార్యక్రమంపై జిల్లా బృందాలకు శిక్షణ ఇచ్చారు. మన ఊరు- మన బడితో పాఠశాలల రూపురేఖలను మార్చేస్తున్న ప్రభుత్వం.. మరో సరికొత్త కార్యక్రమానికి శ్రీకారం చుట్టిందని పేర్కొన్నారు. ఈ విద్యాసంవత్సరం పూర్తయ్యేనాటికి పిల్లలందరూ ధారాళంగా చదివేలా సిద్ధం చేయాలని సూచించారు. కార్యక్రమంలో సమగ్ర శిక్ష అడిషనల్‌ ప్రాజెక్టు డైరెక్టర్‌ రమేశ్‌, తాజ్‌బాబు పాల్గొన్నారు.

 

మార్గదర్శకాలివే…

1. గ్రంథాలయ పుస్తకాలు చదివేందుకు ప్రతిరోజూ ఒక పీరియడ్‌ కేటాయించాలి. మూడురోజులు మాతృభాషలో, రెండురోజులు ఆంగ్లభాషలో, ఒకరోజు ద్వితీయభాషలోని కథల పుస్తకాలను చదివించాలి.
2. ప్రాథమిక పాఠశాలల్లో ఐదుగురు విద్యార్థులతో, ప్రాథమికోన్నత పాఠశాలల్లో 6 నుంచి తొమ్మితో తరగతి వరకు ఒక్కో తరగతికి ఒక గ్రంథాలయ కమిటీని ఏర్పాటు చేయాలి.
3. వారికి ఆసక్తి కలిగిన పుస్తకాలు చదివేలా విద్యార్థులను ప్రోత్సహించాలి. తల్లిదండ్రులకు అవగాహన కల్పించి ఇంటి దగ్గర సైతం ఆ పుస్తకాలు చదివించేలా కృషి చేయాలి.
4. ప్రతి శనివారం పఠన పోటీలు నిర్వహించాలి. కథలు చెప్పించడం, చదివిన దాని గురించి మాట్లాడించడం వంటి పోటీలతో విద్యార్థుల్లో పఠన సామర్థ్యాన్ని పెంచాలి.
5. నెలకు ఒకసారి విద్యార్థుల తల్లిదండ్రులు, ఎస్‌ఎంసీ సభ్యులను పాఠశాలలకు ఆహ్వానించాలి. వారి నేతృత్వంలో విజేతలకు బహుమతులు అందజేయాలి.
6. రూమ్‌ టు రీడ్‌, సేవ్‌ ద చిల్డ్రన్‌, యూనిసెఫ్‌, బ్రెడ్‌ వంటి స్వచ్ఛంద సంస్థల సేవలను సద్వినియోగం చేసుకోవాలి.
7. అన్ని పాఠశాలల్లో ఫిబ్రవరి 2 నుంచి 21వ తేదీ వరకు గ్రంథాలయ వారోత్సవాలు నిర్వహించాలి. 21న అన్ని పాఠశాలల్లో మాతృభాషా దినోత్సవాన్ని నిర్వహించాలి.
8. మండలస్థాయిలో ఎంఈవో ఐదుగురు విషయ నిపుణులతో కోర్‌ టీంను ఏర్పాటుచేయాలి. ఈ కమిటీ వారానికి ఒక సారి పఠనాభివృద్ధి నివేదికను డీఈవోకు సమర్పించాలి.
9. జిల్లాలోని సెక్టోరల్‌ ఆఫీసర్లకు మండలాలవారీగా బాధ్యతలు అప్పగించాలి. జిల్లాస్థాయిలో ఈడీవో ప్రత్యేకంగా సమీక్షలు నిర్వహించి, సూచనలు, సలహాలు ఇవ్వాలి.
10. ఆయా గ్రామాల్లో విరాళాలు ఇచ్చేవారిని ప్రోత్సహించాలి. ఆ నిధులతో పఠనాభివృద్ధి కార్యక్రమాన్ని పటిష్ఠం చేయాలి.