CCE | సీసీఈ ఉన్నట్టా? లేనట్టా?.. సాగదీతలతో కాలం వెళ్లదీస్తున్న విద్యాశాఖ!

పాఠశాల విద్యలో నిరంతర సమగ్ర మూల్యాంకనం(సీసీఈ) ఉన్నట్టా? లేనట్టా? అంటే అధికారులు స్పష్టత ఇవ్వడంలేదు. ఇంతకీ ఈ విధానం రాష్ట్రంలో అమలు చేస్తారా? లేక ముగింపు పలుకుతారా? అన్న అంశంపై క్లారిటీ ఇవ్వడంలేదు.

• ఈ సంవత్సరం ఒక్క పదో తరగతికే గ్రేడింగ్‌ విధానం రద్దు
• ఒకటి నుంచి 9వ తరగతులపై ఇప్పటికీ కానరాని స్పష్టత
• సమీపిస్తున్న కొత్త విద్యాసంవత్సరం
• ప్రతిపాదనలు పంపినా ఇప్పటికీ స్పందించని రాష్ట్ర ప్రభుత్వం

CCE | హైదరాబాద్‌, ఏప్రిల్‌ 23 (నమస్తే తెలంగాణ) : పాఠశాల విద్యలో నిరంతర సమగ్ర మూల్యాంకనం(సీసీఈ) ఉన్నట్టా? లేనట్టా? అంటే అధికారులు స్పష్టత ఇవ్వడంలేదు. ఇంతకీ ఈ విధానం రాష్ట్రంలో అమలు చేస్తారా? లేక ముగింపు పలుకుతారా? అన్న అంశంపై క్లారిటీ ఇవ్వడంలేదు. పదో తరగతిలో ఈ విద్యాసంవత్సరం గ్రేడింగ్‌ విధానాన్ని రద్దుచేశారు. ఈ స్థానంలో మార్కుల విధానాన్ని తీసుకొచ్చారు. వాస్తవానికి గ్రేడింగ్‌ విధానానికి సీసీఈయే మూలం. కానీ రాష్ట్ర ప్రభుత్వం ఒక్క గ్రేడింగ్‌ విధానాన్ని మాత్రమే రద్దు చేసినట్టు ప్రకటించింది. సీసీఈ విధానం రద్దు అయినట్టు గానీ.. కొనసాగిస్తున్నట్టు గానీ చెప్పలేదు. ఇప్పటికైతే ఈ ఏడాది గడిచిపోయింది. జూన్‌ నుంచి కొత్త విద్యాసంవత్సరం ప్రారంభంకానుంది. ఇప్పటికిప్పుడు దీనిపై ఓ నిర్ణయం తీసుకుంటేనే జూన్‌ వరకు సన్నద్ధం కావొచ్చు. విద్యాశాఖ ఏదీ తేల్చడంలేదు. స్పష్టత ఇవ్వడంలేదు. పైగా సాగదీతలు, సస్పెన్స్‌లతో కాలం వెల్లదీస్తున్నది.

వీటిపై స్పష్టతేదీ..

• ఈ విద్యాసంవత్సరం పదో తరగతి విద్యార్థులకేమో మార్కులు, 1-9 తరగతులకేమో గ్రేడింగ్‌ విధానాన్ని అనుసరించారు. ఇలా ఒక తరగతికి ఒక పద్ధతి, మిగతా తరగతులకు మరో పద్ధతి అనుసరించడంతో గందరగోళానికి దారితీయనున్నది. ఇప్పుడు కాకపోయినా భవిష్యత్తులో దీని ప్రభావం చూపుతుందన్న ఆందోళనలు వ్యక్తమవుతున్నాయి. అయినా ఇంకా 1-9 తరగతులపై క్లారిటీ లేదు.
• గ్రేడింగ్‌ విధానం రద్దుతో పది విద్యార్థులకు మెమోలు ఎలా ముద్రించాలన్న అంశంపై స్పష్టతలేదు. మెమోల్లో పాస్‌, ఫెయిల్‌ అని ముద్రించాలా? లేక మార్కులను బట్టి ప్రథమ, ద్వితీయ, తృతీయశ్రేణి అని ముద్రించాలా..? అన్నది తేల్చడం లేదు. దీనిపై ఎస్సీఈఆర్టీ ప్రతిపాదనలు పంపించినా సర్కారు నుంచి స్పందన లేదు.
• పదో తరగతి మెమోలపై పర్సనల్‌ పెన్‌ను నిరుటి నుంచి ముద్రిస్తున్నారు. ఈ సంవత్సరం నుంచి అపార్‌ ఐడీలను జనరేట్‌ చే స్తున్నారు. మెమోలపై పెన్‌ నంబర్‌ ముద్రిస్తారా? లేక అపార్‌ ఐడీ ముద్రిస్తారా? అనేదీ సందేహాస్పదంగానే మిగిలింది.
• బాసర ఆర్జీయూకేటీలోని సీట్లను ఇప్పటి వరకు పదో తరగతి మార్కుల ఆధారంగా భర్తీ చేస్తున్నారు. గ్రేడింగ్‌ విధానంతో ఈ సీట్లను సర్కారు స్కూల్‌ విద్యార్థులే ఎక్కువగా కైవసం చేసుకున్నారు. కొత్తమార్కుల విధానంతో ప్రైవేట్‌, కార్పొరేట్‌ స్కూల్‌ విద్యార్థులు ఎగరేసుకుపోయే ప్రమాదముంది. ఈ సీట్లను ఎలా భర్తీ చేయాలన్న అంశంపైనా సర్కారు స్పష్టత ఇవ్వలేదు.

పన్నెండేండ్ల తర్వాత..

విద్యాహక్కు చట్టం ప్రకారం 2012-13 విద్యాసంవత్సరం నుంచి రాష్ట్రంలో నిరంతర సమగ్ర మూల్యాంకనాన్ని(సీసీఈ) అమలు చేస్తున్నారు. మార్కులు ముఖ్యం కాదు.. బాలల సర్వతోముఖాభివృద్ధి ముఖ్యమని విద్యాశాఖ ఈ విధానానికి జైకొట్టింది. బడుల్లో ఆటలు, నైతిక విలువలు, పని అనుభవం, కళలకు ప్రాధాన్యం ఇచ్చింది. త్రైమాసిక, అర్ధవార్షిక, వార్షిక పరీక్షల స్థానంలో నిర్మాణాత్మక, సంగ్రహణాత్మక మూల్యాంకనాలు అమల్లోకి వచ్చాయి. పన్నెండేండ్ల తర్వాత పదో తరగతిలో ఈ సంవత్సరం గ్రేడింగ్‌ విధానాన్ని రద్దుచేశారు. ఇంటర్నల్‌ మార్కులుండవని ప్రకటించారు. 80 మార్కులకే వార్షిక పరీక్షలు నిర్వహిస్తామని విద్యాసంవత్సరం మధ్యలో ప్రకటించడం గందరగోళానికి దారితీసింది. అప్పటికే ఫార్మేటివ్‌ పరీక్షలు, సమ్మేటివ్‌ పరీక్షలు నిర్వహించారు. చివరికి తప్పిదాన్ని గ్రహించి ఈ ఒక్క ఏడాది ఇంటర్నల్స్‌ను కొనసాగిస్తున్నారు. 1-9 తరగతుల విద్యార్థులకు గ్రేడింగ్‌ పద్ధతిలోనే మార్కులేస్తున్నారు. దీంతో ఆందోళనకర పరిస్థితులు నెలకొన్నాయి.