Telangana Cabinet | క్యాబినెట్‌లో ఖాళీలు 6.. పోటీలో 30 మంది! ఇదీ మంత్రివర్గ విస్తరణ పరిస్థితి!

రాష్ట్ర మంత్రివర్గ విస్తరణకు దాదాపు ముహూర్తం ఖరారైనట్టు తెలిసింది. మంత్రివర్గ విస్తరణను 14 నెలలుగా పెండింగ్‌లో పెట్టిన కాంగ్రెస్‌ అధిష్ఠానం తుది కసరత్తు మొదలుపెట్టింది. మంత్రివర్గ కూర్పుపై చర్చించేందుకు ముఖ్యమంత్రి రేవంత్‌రెడ్డి, డిప్యూటీ సీఎం భట్టి విక్రమార్క, మంత్రి ఉత్తమ్‌కుమారెడ్డి, ఇతర సీనియర్‌ నేతలకు ఢిల్లీ నుంచి పిలుపొచ్చింది.

• మీనాక్షి డైరెక్షన్‌లో అధిష్ఠానం
• పదవి కోసం పట్టువీడని సీనియర్లు
• ఢిల్లీ స్థాయిలో తమదైన లాబీయింగ్‌
• వరంగల్‌ నుంచి ఎక్కువమంది పోటీ

Telangana Cabinet | హైదరాబాద్‌, మార్చి 24 ( నమస్తే తెలంగాణ ) : రాష్ట్ర మంత్రివర్గ విస్తరణకు దాదాపు ముహూర్తం ఖరారైనట్టు తెలిసింది. మంత్రివర్గ విస్తరణను 14 నెలలుగా పెండింగ్‌లో పెట్టిన కాంగ్రెస్‌ అధిష్ఠానం తుది కసరత్తు మొదలుపెట్టింది. మంత్రివర్గ కూర్పుపై చర్చించేందుకు ముఖ్యమంత్రి రేవంత్‌రెడ్డి, డిప్యూటీ సీఎం భట్టి విక్రమార్క, మంత్రి ఉత్తమ్‌కుమారెడ్డి, ఇతర సీనియర్‌ నేతలకు ఢిల్లీ నుంచి పిలుపొచ్చింది. దీంతో అసెంబ్లీ సమావేశాలు కొనసాగుతున్నప్పటికీ, సీఎం రేవంత్‌రెడ్డి సోమవారం హుటాహుటిన ఢిల్లీకి వెళ్లారు. ఇవాళో, రేపో ఏ క్షణమైనా జాబితా విడుదల చేసే అవకాశముంది. రాష్ట్రంలో 18 మందితో మంత్రివర్గాన్ని ఏర్పాటుచేసుకొనే వెసులుబాటు ఉండగా, ప్రస్తుతం ముఖ్యమంత్రితో కలిపి 12 మంది ఉన్నారు. ఇంకో ఆరుగురికి అవకాశం ఉన్నది. ఈ ఆరు పదవులకు 30 మంది పోటీ పడుతున్నట్టు కాంగ్రెస్‌ వర్గాలు చెప్తున్నాయి. మంత్రి పదవి ఆశిస్తున్నవారంతా ఢిల్లీ స్థాయిలో లాబీయింగ్‌ మొదలుపెట్టారు. పోటీలో కోమటిరెడ్డి రాజగోపాల్‌రెడ్డి, వివేక్‌ వెంకటస్వామి, వాకిటి శ్రీహరి, విజయశాంతి, అమీర్‌అలీఖాన్‌, సుదర్శన్‌రెడ్డి, ప్రేమ్‌సాగర్‌రావు పేర్లు ముందు వరుసలో ఉన్నట్టు తెలిసింది. మంత్రి పదవులతోపాటు డిప్యూటీ స్పీకర్‌, చీఫ్‌ విప్‌, పార్టీ వర్కింగ్‌ ప్రెసిడెంట్ల ఎంపికను కూడా అధిష్ఠానం పూర్తి చేసే అవకాశం ఉన్నదని భావిస్తున్నారు. మంత్రి పదవులతోపాటు పార్టీ పదవుల భర్తీలో రాష్ట్ర ఇన్‌చార్జి మీనాక్షి నటరాజన్‌ నివేదికల ఆధారంగానే అధిష్ఠానం భర్తీలు చేపడుతున్నట్టు తెలిసింది.

జిల్లాలవారీగా ఆశావహులు

• ఉమ్మడి నిజామాబాద్‌ జిల్లాకు ప్రస్తుత మంత్రివర్గంలో ప్రాతినిధ్యం లేదు. దీంతో జిల్లా నుంచి సీనియర్‌ నేతలు ఎమ్మెల్యే సుదర్శన్‌రెడ్డి, షబ్బీర్‌ అలీ, మానాల మోహన్‌రెడ్డి మంత్రి పదవి ఆశిస్తున్నారు. షబ్బీర్‌ అలీ మైనార్టీ కోటాలో ఎమ్మెల్సీ, మంత్రి పదవికి ప్రయత్నాలు చేస్తున్నారు.
• అదిలాబాద్‌ జిల్లా నుంచి ప్రేమ్‌సాగర్‌రావు, వివేక్‌ వెంకటస్వామి, వినోద్‌, వెడ్మ బొజ్జు పోటీలో ఉన్నారు. పార్టీకి చేసిన సేవలను గుర్తించి తనకు మంత్రి పదవి ఇవ్వాల్సిందేనని ప్రేమ్‌సాగర్‌రావు పట్టుబడుతున్నట్టు తెలిసింది. కష్టకాలంలో పార్టీని ఆదుకున్నానంటూ వివేక్‌ వెంకటస్వామి పదవి అడుగుతున్నట్టు తెలిసింది. ఆదివాసీ కోటాలో వెడ్మ బొజ్జు ప్రయత్నం చేస్తున్నారు.
• కరీంనగర్‌ నుంచి మంత్రి పదవి ఆశిస్తున్నవారిలో అడ్లూరి లక్ష్మణ్‌, ఆది శ్రీనివాస్‌, మక్కన్‌సింగ్‌ఠాకూర్‌ ఉన్నారు.
• వరంగల్‌ జిల్లా నుంచి మంత్రి పదవి కో సం పోటీ తీవ్రంగా ఉన్నది. రేవూరి ప్రకాశ్‌రెడ్డి, కడియం శ్రీహరి, దొంతి మాధవరెడ్డి, నాయిని రాజేందర్‌రెడ్డి పోటీలో ఉన్నారు. మొదటినుంచి పార్టీలో ఉన్నది తానొక్కడినేనని, తాను అన్ని విధాలుగా మంత్రి పదవికి అర్హుడినని రాజేందర్‌రెడ్డి చెప్తున్నట్టు తెలిసింది.
• ఖమ్మం నుంచి ఇప్పటికే డిప్యూటీ సీఎం మల్లు భట్టివిక్రమార్క, పొంగులేటి శ్రీనివాస్‌రెడ్డి, తుమ్మల నాగేశ్వరరావు మంత్రివర్గంలో ఉన్నారు. ఇక్కడ కాంగ్రెస్‌ నుంచి కాకుండా మిత్రపక్షం సీపీఐ నుంచి ఒత్తిడి వస్తున్నట్టు తెలిసింది.
• నల్లగొండ నుంచి ఇప్పటికే కోమటిరెడ్డి వెంకట్‌రెడ్డి, ఉత్తమ్‌కుమార్‌రెడ్డి మంత్రులుగా ఉన్నారు. జిల్లా నుంచి కోమటిరెడ్డి రాజగోపాల్‌రెడ్డి, ఉత్తమ్‌ పద్మావతి, బాలూనాయక్‌, బీర్ల ఐలయ్య పోటీలో ఉన్నట్టు తెలిసింది. రాజగోపాల్‌రెడ్డి ఎప్పుడో తాను మంత్రి అయిపోయానని చెప్పుకొన్నారు. మంత్రి ఉత్తమ్‌ తన భార్య పద్మావతికి మంత్రి పదవి ఇవ్వాలని పట్టుపడుతున్నట్టు తెలిసింది. బీసీ-యాదవ కోటాలో మంత్రి పదవి దక్కించుకునేందుకు బీర్ల ఐలయ్య తన ప్రయత్నాలు చేస్తున్నారు. మరోవైపు, సీనియర్‌ నేత జానారెడ్డి సైతం తన కొ డుకు జైవీర్‌రెడ్డికి యువ కోటాలో మంత్రి పదవి ఇప్పించేలా ప్రయత్నాలు చేస్తున్నట్టు తెలిసింది. ఎస్సీ వర్గానికి చెందిన అద్దంకి దయాకర్‌ సైతం మంత్రి పదవి కోసం పోటీ పడుతున్నారు.
• మహబూబ్‌నగర్‌ నుంచి మంత్రి పదవి కోసం పెద్ద సంఖ్యలో పోటీదారులున్నారు. ముఖ్యంగా ముదిరాజ్‌ వర్గానికి చెందిన వాకిటి శ్రీహరి, యెన్నం శ్రీనివాస్‌రెడ్డి పోటీలో ఉన్నారు. మహబూబ్‌నగర్‌లో జరిగిన సభలో ముదిరాజ్‌ ముద్దుబిడ్డ వాకిటి శ్రీహరిని మంత్రిని చేసి చూపిస్తానని ఇప్పటికే సీఎం రేవంత్‌రెడ్డి మాట ఇచ్చారు. మరోవైపు తాను సీనియర్‌ నేతనని, పార్టీ కోసం ఎన్నో ఏం డ్లుగా పని చేస్తున్నానని చెప్తున్న యెన్నం శ్రీనివాస్‌రెడ్డి తనకూ మంత్రి పదవి కావాల్సిందేనని పట్టుపడుతున్నారు. పర్ణికరెడ్డి సైతం పోటీలో ఉన్నారు.
• రంగారెడ్డి జిల్లాకు ప్రస్తుత మంత్రివర్గంలో ప్రాతినిధ్యం లేదు. మంత్రి పదవి కోసం మల్‌రెడ్డి రంగారెడ్డి తీవ్ర ప్రయత్నాలు చేస్తున్నారు. ఇప్పటికే ఆయన జిల్లా నుంచి కచ్చితంగా మంత్రి పదవి ఇవ్వాలంటూ అధిష్ఠానాన్ని డిమాండ్‌ చేశారు. ఫిరాయింపు ఎమ్మెల్యేలు కాలె యాదయ్య, ప్రకాశ్‌గౌడ్‌ కూడా పోటీలో ఉన్నప్పటికీ, కేసు సుప్రీంకోర్టులో ఉండటంతో వీరిపై డైలమా నెలకొన్నది. కమ్మ సామాజికవర్గానికి చెందిన అరికెపూడి గాంధీకి మంత్రి పదవి ఇవ్వడం ద్వారా ఆ సామాజిక వర్గాన్ని దగ్గర చేసుకోవచ్చనే ఆలోచనలో ఉన్నట్టు తెలిసింది.
• హైదరాబాద్‌ నుంచి కూడా ప్రస్తుత మంత్రివర్గంలో ప్రాతినిధ్యం లేదు. అయితే ఇక్కడి నుంచి అసలైన కాంగ్రెస్‌ ఎమ్మెల్యేలు ఎవరూ లేకపోవడంతో ఎవరికి ఇవ్వాలనే చర్చ జరుగుతున్నట్టు తెలిసింది. ఇక్కడ ఎమ్మెల్యేగా ఓడిపోయిన మైనార్టీ నేతలు ఫిరోజ్‌ఖాన్‌, అజాహరుద్దీన్‌ మంత్రి పదవి కోసం పోటీపడుతున్నట్టు తెలిసింది.
• మెదక్‌ జిల్లా నుంచి ప్రస్తుతం దామోదర రాజనర్సింహ ఒక్కరే మంత్రిగా ఉండగా, సీనియర్‌ నేత జగ్గారెడ్డి కూడా మంత్రి పదవిని ఆశిస్తున్నారు. తనను ఎమ్మెల్సీని చేసి మంత్రి పదవి ఇవ్వాలని ఆయన అధిష్ఠానాన్ని కోరుతున్నట్టు తెలిసింది. మెదక్‌ ఎమ్మెల్యే మైనంపల్లి రోహిత్‌ను మంత్రిని చేసేందుకు ఆయన తండ్రి మై నంపల్లి హన్మంతరావు తీవ్ర ప్రయత్నాలు చేస్తున్నారు. నారాయణఖేడ్‌ ఎమ్మెల్యే సంజీవరెడ్డి సైతం మంత్రి పదవి కోసం ప్రయత్నాలు చేస్తున్నట్టు తెలిసింది.

ఉగాదిలోగా మంత్రివర్గ విస్తరణ

హైదరాబాద్‌, మార్చి 24(నమస్తే తెలంగాణ): మంత్రివర్గ విస్తరణకు అధిష్ఠానం గ్రీన్‌సిగ్నల్‌ ఇచ్చినట్టు తెలిసింది. ఈ మేరకు సోమవారం ఢిల్లీలో ఆ పార్టీ కీలక నేతలైన ఖర్గే, రాహుల్‌, కేసీ వేణుగోపాల్‌తో సీఎం రేవంత్‌రెడ్డి, డిప్యూటీ సీఎం భట్టి విక్రమార్క, మంత్రి ఉత్తమ్‌, పీసీసీ చీఫ్‌ మహేశ్‌కుమార్‌గౌడ్‌ భేటీ అయ్యారు. భేటీలో మంత్రివర్గ కూర్పు అంశం కొలిక్కి వచ్చినట్టు తెలిసింది. అయితే మంత్రివర్గంలో ఉన్న ఆరు ఖాళీలను భర్తీ చేయాలా? లేక నాలుగింటినే భర్తీ చేయాలా? అనే అంశంపై స్పష్టత రాలేదు. ఈ భేటీకి ఆలస్యంగా హాజరైన ఉత్తమ్‌కుమార్‌రెడ్డి అందరికన్నా ముందే బయటకు వెళ్లడం చర్చనీయాంశంగా మారింది. ఆ తర్వాత 20 నిమిషాలకు రేవంత్‌, మరో అర్ధగంట తర్వాత భట్టి బయటకు వచ్చినట్టు సమాచారం. క్యాబినెట్‌ విస్తరణ, పీసీసీ కార్యవర్గం, కార్పొరేషన్‌ చైర్మన్ల నియామకంపై పార్టీ అధిష్ఠానంతో చర్చినట్టు టీపీసీసీ అధ్యక్షుడు మహేశ్‌కుమార్‌గౌడ్‌ వెల్లడించారు.