Telangana | టీచర్లే ఏఐ బోధకులు.. గణితంలో ఆర్టిఫీషియల్‌ ఇంటెలిజెన్స్‌ పాఠాలు

ఆర్టిఫీషియల్‌ ఇంటెలిజెన్స్‌(ఏఐ) సరికొత్త సాంకేతిక విప్లవం. ఇలాంటి ఏఐ పాఠాలను విద్యాశాఖ సర్కారు బడుల్లోని విద్యార్థులకు పరిచయం చేయనున్నది. సంబంధించిన పాఠాలను టీచర్ల చేత చెప్పించనున్నది.

• 1- 5 తరగతుల పాఠ్యపుస్తకాల్లో స్వల్పమార్పులు
• 2,3 తేదీల్లో టీచర్లకు శిక్షణ

Telangana | హైదరాబాద్‌, మార్చి 28 (నమస్తే తెలంగాణ) : ఆర్టిఫీషియల్‌ ఇంటెలిజెన్స్‌(ఏఐ) సరికొత్త సాంకేతిక విప్లవం. ఇలాంటి ఏఐ పాఠాలను విద్యాశాఖ సర్కారు బడుల్లోని విద్యార్థులకు పరిచయం చేయనున్నది. సంబంధించిన పాఠాలను టీచర్ల చేత చెప్పించనున్నది. ఏప్రిల్‌ 2, 3 తేదీల్లో టీచర్లకు ఏఐపై శిక్షణ ఇవ్వనున్నది. రాష్ట్రంలో 1-5 తరగతుల్లో ఏఐని బోధించాలని విద్యాశాఖ నిర్ణయించింది. గణితంలో ఏఐ పాఠాలను అంతర్భాగం చేయనున్నది.

పాఠ్యపుస్తకాలను స్వల్పంగా మారుస్తున్నారు. ఇప్పటికే రాష్ట్రంలోని 513 పాఠశాలల్లో పైలట్‌ పద్ధతిలో ఏఐ బోధనను ప్రవేశపెట్టారు. 2025-26 విద్యాసంవత్సరంవరకు దశలవారీగా అన్ని పాఠశాలలకు విస్తరించనున్నారు. ఏప్రిల్‌ 2న వర్చువల్‌, ఏప్రిల్‌ 3న టీచర్లకు వ్యక్తిగత శిక్షణ ఇవ్వాలని నిర్ణయించింది. పాఠశాల విద్యలో ఏఐని ప్రవేశపెట్టడంలో కలెక్టర్లు భాగస్వామ్యం కావాలని ప్రభుత్వం ఆదేశించింది. విద్యాశాఖ కార్యదర్శి డాక్టర్‌ యోగితారాణా అన్ని జిల్లాల కలెక్టర్లకు లేఖలు రాశారు.

యాక్షన్‌ ప్లాన్‌..

• 1, 2 తరగతుల్లోని విద్యార్థులకు కంప్యూటర్‌ నేర్పిస్తారు. కంప్యూటర్‌ ప్రాథమిక జ్ఞానంపై అవగాహన కల్పిస్తారు.
• 4, 5 తరగతుల్లోని వారికి ఆర్టిఫీషియల్‌ ఇంటెలిజెన్స్‌ ప్రాథమిక అంశాలను పరిచయం చేస్తారు.
• ఏప్రిల్‌ 3, 4 తేదీల్లో రా్రష్ట్రంలోని 100 ప్రాథమిక పాఠశాలల టీచర్లు, రిసోర్స్‌పర్సన్లకు శిక్షణ ఇస్తారు.
• ఏప్రిల్‌ 21, 22న సంబంధిత పాఠశాలల్లో ఏఐ అభ్యాస సెషన్లను నిర్వహిస్తారు.
• జూన్‌ 1 వరకు 50 కంటే ఎక్కువ ఎన్‌రోల్‌మెంట్‌ పాఠశాలలకు ఐదు కంప్యూటర్లు, బ్రాడ్‌బాండ్‌ కనెక్షన్‌ సౌకర్యం కల్పిస్తారు. పాఠశాల్లో ఏఐ బోధన, అభ్యాసాలు చేయిస్తారు.