BRS | మరాఠ్వాడ రాజకీయాల్లో గులాబీ గుబులు.. బీఆర్‌ఎస్‌ దెబ్బకు దిగొచ్చిన మహా సర్కార్‌
మహారాష్ట్రలో గులాబీ పార్టీ ప్రభంజనం సృష్టిస్తున్నది. తమ రాష్ట్రంలోనూ తెలంగాణ మాడల్‌ను అమలు చేయాలని రైతులు, ప్రజలు డిమాండ్‌ చేస్తున్నారు.
- రైతులకు రూ.6 వేల పంట పెట్టుబడి
- బీఆర్‌ఎస్‌ పార్టీలోకి ‘మహా’నేతల క్యూ
హైదరాబాద్‌, మార్చి 26 (నమస్తే తెలంగాణ): మహారాష్ట్రలో గులాబీ పార్టీ ప్రభంజనం సృష్టిస్తున్నది. తమ రాష్ట్రంలోనూ తెలంగాణ మాడల్‌ను అమలు చేయాలని రైతులు, ప్రజలు డిమాండ్‌ చేస్తున్నారు. బీఆర్‌ఎస్‌ అధినేత, ముఖ్యమంత్రి కేసీఆర్‌ గత నెల 5న నాందేడ్‌లో నిర్వహించిన సభతో ‘మహా’ సర్కారులో గుబులు మొదలైంది. బీఆర్‌ఎస్‌ దెబ్బకు మహారాష్ట్ర సర్కారు దిగొచ్చింది. రైతుబంధు తరహాలో రైతులకు ఏడాదికి ఎకరానికి రూ. 6 వేల పంటపెట్టుబడి సాయం అందిస్తామని ఆ రాష్ట్ర అసెంబ్లీలో ప్రకటించింది. నాందేడ్‌ సమావేశంలో సీఎం కేసీఆర్‌ ప్రసంగం మహారాష్ట్ర బుద్ధిజీవులను తట్టిలేపింది. రాష్ట్రస్థాయి నుంచి తాలూకాస్థాయికి విస్తరించిన శంభాజీ బ్రిగేడ్‌ అనే స్వచ్ఛంద సంస్థ ప్రతినిధులు సీఎం కేసీఆర్‌ను ప్రగతిభవన్‌లో కలిసి, తాము బీఆర్‌ఎస్‌తో పనిచేస్తామని ప్రకటించారు.
నాందేడ్‌, ఔరంగాబాద్‌, షోలాపూర్‌, యావత్మాల్‌, రాజురా, చంద్రాపూర్‌ వంటి ప్రాంతాల నుంచి ప్రజలు.. ప్రత్యేకించి రైతులు, మహిళలు స్వచ్ఛందంగా బీఆర్‌ఎస్‌తో కలిసి అడుగేస్తున్నారు. మహారాష్ట్ర రైతాంగం నుంచి వస్తున్న ఆదరణను గుర్తించిన పార్టీ అధినేత, సీఎం కేసీఆర్‌ ముందుగా పార్టీ రైతు విభాగాన్ని (బీఆర్‌ఎస్‌ కిసాన్‌ సెల్‌) ఏర్పాటు చేశారు. రాష్ట్ర అధ్యక్షుడిగా మాణిక్‌ కదంను నియమించారు. దీంతోపాటు మరో ఐదుగురిని ప్రాంతీయ కో-ఆర్డినేటర్లుగా ప్రకటించారు. మహారాష్ట్ర రైతాంగంలో పార్టీ కిసాన్‌ సెల్‌ విస్తృత కార్యాచరణను చేపట్టింది. గ్రామ గ్రామాన రైతు సమావేశాలు నిర్వహిస్తూ తెలంగాణ మాడల్‌ కావాలని మహారాష్ట్రవ్యాప్తంగా కార్యాచరణ రూపొందించింది.
ఫలితంగా ఆయా ప్రాంతాల నుంచి బీఆర్‌ఎస్‌లో చేరేందుకు మహారాష్ట్ర మాజీ ఎంపీ, మాజీ ఎమ్మెల్యేలుసహా ప్రస్తుత ఎన్సీపీ ఎమ్మెల్యే ప్రకాశ్‌ సోలంకీ సైతం ముందుకొచ్చారు. నాందేడ్‌ జిల్లా కేంద్రంతోపాటు పలు ప్రాంతాల్లో స్వచ్ఛందంగా యువకులు కదిలివచ్చి బీఆర్‌ఎస్‌ పార్టీ కార్యాలయాలను ప్రారంభించుకొన్నారు. ఈ పరిణామాల నేపథ్యంలో మహారాష్ట్ర కిసాన్‌ సెల్‌ బహిరంగసభను నిర్వహించాలని పార్టీ అధినేత కేసీఆర్‌ను కోరింది. మహారాష్ట్ర రైతుల కోరిక మేరకు కంధార్‌-లోహలో బహిరంగ సభను నిర్వహించాలని మార్చి 15న సీఎం కేసీఆర్‌ నిర్ణయం తీసుకొన్నారు. అప్పటి నుంచి కేవలం 11 రోజుల అనంతరం ఆదివారం బహిరంగ సభ నిర్వహించగా, మహారాష్ట్ర ప్రజలు బ్రహ్మరథం పట్టారు. ‘అబ్‌ కీ బార్‌ కిసాన్‌ సర్కార్‌’ అంటూ నినదించారు.
బీఆర్‌ఎస్‌పై ‘మహా’ ఆసక్తి
- మార్చి 3న మహారాష్ట్రలోని ప్రగతిశీల సామాజిక సంస్థ శంభాజీ బ్రిగేడ్‌ పదాధికారుల (రాష్ట్రస్థాయి నుంచి బ్లాక్‌స్థాయి వరకు విస్తరించిన సామాజిక సైన్యం) బృందం హైదరాబాద్‌లోని ప్రగతిభవన్‌కు వచ్చి సీఎం కేసీఆర్‌ను కలిసింది. బీఆర్‌ఎస్‌తో కలిసి పనిచేస్తామని ప్రకటించింది.
- మార్చి 4న మాజీ ఎంపీ, ఆమ్‌ ఆద్మీ పార్టీ మహారాష్ట్ర ఉపాధ్యక్షుడు హరిభావు రాథోడ్‌, బీడ్‌ జిల్లా మజల్‌గావ్‌ ఎన్సీపీ ఎమ్మెల్యే ప్రకాశ్‌ సోలంకీ (నాలుగోసారి ఎమ్మెల్యేగా ప్రాతినిధ్యం వహిస్తున్న నేత) ప్రగతిభవన్‌లో సీఎం కేసీఆర్‌ను కలిసి సుదీర్ఘ చర్చలు జరిపారు. ఇదేరోజు చంద్రాపూర్‌ జడ్జి మాజీ చైర్మన్‌ సందీప్‌ కరపే, గోండ్‌ పిప్రీ నగర్‌ సేవక్‌, బీజేపీ తాలూకా అధ్యక్షుడు బాబన్‌ నికోడే, శివసేన తాలూకా కో-ఆర్డినేటర్‌ ఫిరోజ్‌ఖాన్‌, బీజేపీ నాయకులు శైలేశ్‌సింగ్‌ భైసే తదితరులు సీఎం కేసీఆర్‌తో చర్చలు జరిపారు.
- మార్చి 10న మహారాష్ట్ర ప్రభుత్వం రైతులకు ఎకరాకు రూ.6 వేల పంట పెట్టుబడి సాయాన్ని ప్రకటించింది. ఇది బీఆర్‌ఎస్‌ తొ లి విజయంగా పార్టీ జాతీయ ప్రధాన కార్యదర్శి హిమాన్షు తివారీ ప్రకటించారు. బీఆర్‌ఎస్‌ కిసాన్‌ సెల్‌ మహారాష్ట్ర రాష్ట్ర అధ్యక్షుడి గా మాణిక్‌ కదం, ఔరంగాబాద్‌ ప్రాంతీయ కో-ఆర్డినేటర్‌గా సోమనాథ్‌ థోరట్‌ తదితరులు నాందేడ్‌లో మీడియా సమావేశం నిర్వహించి, రైతులను చైతన్యపరిచారు
- మార్చి 11న నాందేడ్‌లో బీఆర్‌ఎస్‌ పార్టీ కార్యాలయం ప్రారంభించారు. నాందేడ్‌తోపాటు ఐదు ప్రాంతాల్లో పార్టీ కార్యాలయాలను ప్రారంభించుకొన్నారు.
- మార్చి 11న రాష్ట్ర దేవాదాయ, న్యాయశాఖ మంత్రి అల్లోల ఇంద్రకరణ్‌రెడ్డి కిన్వట్‌ తాలూకా దయాళ్‌ ధనోరా గ్రామంలో పర్యటించారు.
- మార్చి 12న ఔరంగాబాద్‌లో ఎంపీ బీబీ పాటిల్‌, పార్టీ జాతీయ ప్రధాన కార్యదర్శి హిమాన్షు తివారీ ఆధ్యర్యంలో శంభాజీ బ్రిగేడ్‌ నుంచి వందలాదిమంది బీఆర్‌ఎస్‌లో చేరారు. కాంగ్రెస్‌, బీజేపీ, ఆమ్‌ ఆద్మీ పార్టీ, ఎన్సీపీకి చెందిన దాదాపు 700 మంది గులాబీ కండువా కప్పుకొన్నారు.
- 13న ఎన్సీపీ నేత, మాజీ ఎమ్మెల్యే శంకరన్న దొంగ్డే ఆ పార్టీకి రాజీనామా చేశారు.
- మార్చి 15న మహారాష్ట్రలోని కంధార్‌-లోహలో బహిరంగ సభ నిర్వహించాలని పార్టీ అధినేత, సీఎం కేసీఆర్‌ నిర్ణయించారు. ఇదే రోజు మాజీ ఎమ్మెల్యే, ఎన్సీపీ నేత శంకరన్న దోంగ్డే, ఎన్సీపీ నాందేడ్‌ జిల్లా అధ్యక్షుడు దత్తాపవార్‌ సీఎం కేసీఆర్‌ను కలిశారు.
- మార్చి 22న మహారాష్ట్ర ఔరంగాబాద్‌ జిల్లా కన్నాడ్‌ మాజీ ఎమ్మెల్యే హర్షవర్ధన్‌ జాదవ్‌, సీనియర్‌ నాయకులు, సామాజిక ఉద్యమకారులు సురేశ్‌ జ్ఞానోబా గైక్వాడ్‌, యశ్‌పాల్‌ బింగే తదితరులు కేసీఆర్‌తో భేటీ అయ్యారు.
Read Today's Latest Telangana News in Telugu and Telugu News
- Follow Us :
-
