Telangana | రాష్ట్ర వ్యవసాయ రంగంలో సువర్ణాధ్యాయం.. తొమ్మిదేండ్లలో 3 రెట్లకుపైగా పెరిగిన ధాన్యం ఉత్పత్తి

ముఖ్యమంత్రి కేసీఆర్‌ అమలుచేస్తున్న రైతు అనుకూల విధానాలతో రాష్ట్ర వ్యవసాయ రంగంలో సువర్ణాధ్యాయం నడుస్తున్నది. తెలంగాణ రాష్ట్రం దేశానికే అన్నపూర్ణగా వర్ధిల్లుతున్నది.

• తొమ్మిదేండ్లలో అద్భుత ప్రగతి
• రెట్టింపయిన సాగు విస్తీర్ణం
• 3 రెట్లకుపైగా పెరిగిన ధాన్యం ఉత్పత్తి
• సాగునీటి ప్రాజెక్టులతో సమృద్ధిగా నీళ్లు
• ఎటుచూసినా పచ్చని పొలాలు
• స్వరాష్ట్రంలో తీరిన రైతుల కడగండ్లు
• కేసీఆర్‌ విధానాలతో సువర్ణాధ్యాయం
• తాజా నివేదికలో వెల్లడి

Telangana | హైదరాబాద్‌, ఆగస్టు 13 (నమస్తే తెలంగాణ): ముఖ్యమంత్రి కేసీఆర్‌ అమలుచేస్తున్న రైతు అనుకూల విధానాలతో రాష్ట్ర వ్యవసాయ రంగంలో సువర్ణాధ్యాయం నడుస్తున్నది. తెలంగాణ రాష్ట్రం దేశానికే అన్నపూర్ణగా వర్ధిల్లుతున్నది. స్వరాష్ట్రంలో రైతుల కడగండ్లు తీరాయి. ఒకనాటి బంజరు భూములు నేడు పచ్చని పంటలతో కళకళలాడుతున్నాయి. కాళేశ్వరం వంటి భారీప్రాజెక్టుల నిర్మాణం, రైతుబంధు, రైతుబీమా, 24 గంటలు ఉచితవిద్యుత్తు వంటి పథకాలు వ్యవసాయ రంగం రూపురేఖలను మార్చేశాయి. స్వరాష్ట్రంలో సాగు విస్తీర్ణం, పంటల ఉత్పత్తులు భారీగా పెరిగాయి. రాష్ట్రం ఏర్పాటు నుంచి ఇప్పటివరకు వ్యవసాయరంగ అభివృద్ధి, ప్రభుత్వం అమలు చేసిన సంక్షేమ పథకాలపై వివరాలను ప్రభుత్వం ఆదివారం వెల్లడించింది.

సాగు నీటి గోసకు పరిష్కారం
ఉమ్మడి పాలనలో జరిగిన వివక్ష, తెలంగాణ రైతుల ఇబ్బందులపై లోతైన అవగాహన ఉన్న సీఎం కేసీఆర్‌.. పాలనా బాధ్యతలు స్వీకరించిన వెంటనే వ్యవసాయ రంగం పునరుజ్జీవం కోసం చర్యలు చేపట్టారు. వ్యవసాయరంగం రూపురేఖలు మార్చేందుకు సాగునీటి సమస్యను పరిష్కరించడమే ఏకైక మార్గమని గుర్తించి తెలంగాణకు కేటాయించిన గోదావరి, కృష్ణా జలాలను పూర్తిగా వినియోగించుకునేందుకు నడుంబిగించారు. అసంపూర్తిగా మిగిలిపోయిన ఎస్సారెస్సీ వరద కాలువ లాంటి ప్రాజెక్టులతోపాటు కాళేశ్వరం వంటి భారీ సాగునీటి ప్రాజెక్టుల నిర్మాణం చేపట్టారు. తాజాగా పాలమూరు-రంగారెడ్డికి కూడా పర్యావరణ అనుమతులొచ్చాయి. గత తొమ్మిదేండ్లలో సాగునీటి ప్రాజెక్టుల నిర్మాణం కోసం రూ.1.59 లక్షల కోట్లు ప్రభుత్వం వ్యయం చేసింది. కాళేశ్వరం ప్రాజెక్టును రికార్డు కాలంలో నిర్మించింది. మిషన్‌ కాకతీయ కింద రూ.5,249 కోట్లతో కాకతీయుల కాలం నాటి గొలుసుకట్టు చెరువులను పునరుద్ధరించింది.

సకాలంలో ఎరువులు, విత్తనాలు
రైతులకు వ్యవసాయశాఖ సేవలను చేరువ చేసేందుకు ప్రతి ఐదు వేల ఎకరాలకు ఒక ఏఈవోను నియమించింది. సీజన్‌కు ముందే రైతులకు సరిపడా విత్తనాలు, ఎరువులు సరఫరా చేస్తున్నది. దేశానికి అవసరమయ్యే పత్తి విత్తనాల్లో 50% తెలంగాణాలోనే ఉత్పత్తి అవుతున్నాయి. నకిలీ విత్తనాలు విక్రయించేవారిపై పీడీ యాక్టు అమలు చేస్తున్నది. పంటలకు గిట్టుబాటు ధర కోసం ఆహారశుద్ధి పరిశ్రమలు ఏర్పాటును ప్రోత్సహిస్తున్నది. క్రాప్‌ బుకింగ్‌ అవలంభిస్తున్న ఏకైక రాష్ట్రంగా తెలంగాణ దేశానికి ఆదర్శంగా నిలుస్తున్నది.

పెరిగిన గోడౌన్‌ల సామర్థ్యం
రాష్ట్రంలోని గోడౌన్‌ల సామర్థ్యం 2014-15లో 39.01 లక్షల టన్నులు ఉంటే, ప్రస్తుతం 73.82 లక్షల టన్నులకు పెరిగింది. 196 వ్యవసాయ మారెట్‌ కమిటీ చైర్మన్‌ పదవులను రిజర్వేషన్ల ద్వారా భర్తీ చేసున్నది. సీజన్‌కు ముందే ఏ పంటలు వేయాలో రైతులకు సూచించడానికి మారెట్‌ రీసెర్చ్‌ అండ్‌ అనాలసిస్‌ వింగ్‌ను ఏర్పాటు చేసింది.

సూక్ష్మసేద్యానికి భారీగా సబ్సిడీలు
సూక్ష్మసేద్యం ద్వారా రూ.2,186.14 కోట్ల సబ్సిడీతో 3.10 లక్షల మంది రైతులకు లబ్ధి చేకూర్చింది. రూ.291.66 కోట్ల సబ్సిడీతో 1,324 ఎకరాల్లో 1,190 రైతుల పాలీహౌజ్‌లను అభివృద్ధి చేసింది. పంట నష్ట పరిహారం కింద రూ.1490.15 కోట్ల ఇన్‌పుట్‌ సబ్సిడీ చెల్లించింది. ప్రత్యామ్నాయ పంటల ప్రోత్సాహంలో భాగంగా ఆయిల్‌పాం విస్తీర్ణం పెం పునకు కృషి చేస్తున్నది. 2022-23 లోనే 82,372 ఎకరాల్లో నూతనంగా ఆయిల్‌పాం సాగు చేశారు.

వ్యవసాయ యాంత్రీకరణకు పెద్దపీట
వ్యవసాయ యాంత్రీకరణలో భాగంగా ఇప్పటివరకు రాష్ట్ర ప్రభుత్వం రూ.963.26 కోట్లు వెచ్చించింది. దీంతో 6.66 లక్షల మంది రైతులకు లబ్ధి చేకూరింది. 2014-15లో ట్రాక్టర్లు 94,537 ఉంటే, ప్రస్తుతం 3.52 లక్షలకు పెరిగాయి. తెలంగాణ ఏర్పడిన తరువాత ట్రాక్టర్లపై రూ.273.5 కోట్ల రవాణా పన్నును మాఫీ చేయడమే కాకుండా రాష్ట్రం ఏర్పడక ముందు ఉన్న రూ.41.6 కోట్ల రవాణా పన్నును సైతం రద్దు చేసింది.

కొనుగోలు చేసిన ధాన్యం విలువరూ.1.33 లక్షల కోట్లు

వ్యవసాయరంగ బలోపేతానికి ప్రభుత్వం తీసుకున్న చర్యలు ఫలితానిచ్చాయి. రాష్ట్రంలో పంటల సాగు విస్తీర్ణం, ఉత్పత్తి భారీగా పెరిగింది. 2014లో సాగు విస్తీర్ణం 1.31 కోట్ల ఎకరాలు కాగా 2022-23 నాటికి 2.20 కోట్ల ఎకరాలకు పెరిగింది.

• 2014-15లో ధాన్యం ఉత్పత్తి 68 లక్షల టన్నులు ఉండగా, 2022-23లో సుమారు 2.70 కోట్ల టన్నులకు చేరుకున్నది.
• 2014-15లో పత్తి సాగు విస్తీర్ణం 41.83 లక్షల ఎకరాలు ఉండగా, 2020-21 నాటికి (44.70% వృద్ధి) 18.70 లక్షల ఎకరాలు పెరిగి 60.53 లక్షల
  ఎకరాలకు చేరుకున్నది.
•  2014-15లో పత్తి దిగుబడి 35.83 లక్షల బేళ్లు ఉండగా, 2020-21లో 63.97 లక్షల బేళ్లకు చేరుకున్నది.
• దేశంలో మొత్తంలో రైతులు పండించిన మొత్తం ధాన్యాన్ని కొనుగోలు చేస్తున్న ఏకైక ప్రభుత్వం తెలంగాణ మాత్రమే.
• ఇప్పటివరకు రూ.1.33 లక్షల కోట్ల విలువైన 722.92 లక్షల టన్నుల ధాన్యం సేకరించడం జరిగింది.మరో రూ.11,437.55 కోట్లతో ఇతర పంటలను కొనుగోలు చేసింది.

తెలంగాణ రైతు సంక్షేమంలో కొన్ని మైలురాళ్లు

• ఉచిత విద్యుత్తు పొందుతున్న వ్యవసాయ కనెక్షన్లు 27.49 లక్షలు
• ఉచిత విద్యుత్తుకు ఏటా చేస్తున్న వ్యయం రూ.10,500 కోట్లు
• విద్యుత్తురంగంలో మౌలిక సదుపాయాలకు వెచ్చించిన మొత్తం రూ.32,700 కోట్లు
• 10 విడతల్లో రైతుబంధు కింద అందజేసిన పెట్టుబడి సాయం రూ.65,190 కోట్లు
• 11వ విడతలో ఇప్పటివరకు అందజేసిన పెట్టుబడి సాయం రూ.5,854.16 కోట్లు
• రైతుబీమా కింద అందజేసిన పరిహారం రూ.5,402 కోట్లు
• రైతుబీమా పరిహారం పొందిన కుటుంబాలు 1,08,051
• ఇప్పటివరకు రెండు విడతల్లో చేసిన రుణమాఫీ రూ.17,351.47 కోట్లు
• వివిధ రకాల విత్తనాలకు ఇచ్చిన రాయితీలు రూ.928.68 కోట్లు
• రాయితీపై సరఫరా చేసిన వివిధ రకాల విత్తనాలు 39.98 లక్షల క్వింటాళ్లు
• 2,601 రైతు వేదికల నిర్మాణానికి వెచ్చించిన మొత్తం రూ.572 కోట్లు