Road Network | రోడ్‌ నెట్‌వర్క్‌లో తెలంగాణ భేష్‌.. రాష్ట్రంలో ఎన్‌హెచ్‌ల సగటు 4.41 శాతమే!

రోడ్‌ నెట్‌వర్క్‌లో తెలంగాణ ఎంతో ప్రగతి సాధించింది. రాష్ట్రంలో రోడ్ల డెన్సిటీ ప్రతి 100 చ.కి.మీలకు 99.29 కిలోమీటర్లు ఉండడమే అందుకు నిదర్శనం. ఈ రహదారుల్లో గత బీఆర్‌ఎస్‌ సర్కారు హయాంలో నిర్మించిన రహదారులే ఎక్కువగా కావడం విశేషం.

• రాష్ట్రంలో ప్రతి 100 చ.కి.మీ.లకు 99.29 కిలోమీటర్ల డెన్సిటీ
• బీఆర్‌ఎస్‌ పాలనలో అత్యధిక రోడ్లు

Road Network | హైదరాబాద్‌, మార్చి 30 (నమస్తే తెలంగాణ): రోడ్‌ నెట్‌వర్క్‌లో తెలంగాణ ఎంతో ప్రగతి సాధించింది. రాష్ట్రంలో రోడ్ల డెన్సిటీ ప్రతి 100 చ.కి.మీలకు 99.29 కిలోమీటర్లు ఉండడమే అందుకు నిదర్శనం. ఈ రహదారుల్లో గత బీఆర్‌ఎస్‌ సర్కారు హయాంలో నిర్మించిన రహదారులే ఎక్కువగా కావడం విశేషం. జాతీయ రహదారుల సగటు డెన్సిటీ 4.41 శాతం మాత్రమే.

సామాజిక, ఆర్థిక సర్వే ప్రకారం…

ప్రభుత్వం విడుదల చేసిన సామాజిక, ఆర్థిక సర్వే వివరాల ప్రకారం.. ప్రస్తుతం తెలంగాణలో రోడ్‌ డెన్సిటీ(సాంద్రత) సగటున ప్రతి చదరపు కిలోమీటర్‌కు 99.29 కిలోమీటర్లుగా ఉంది. హైదరాబాద్‌లో ఇది ఇంకా ఎక్కువ. మహానగరంలో ప్రతి 100 చ.కి.మీ.ల వైశాల్యానికి 1,332.85 కిలోమీటర్లుగా ఉంది. మేడ్చల్‌ మల్కాజిగిరిలో 385.43 కిలోమీటర్లు, రంగారెడ్డిలో 158.36 కిలోమీటర్లు, అతి తక్కువగా ములుగులో 41.25 కిలోమీటర్లు, భద్రాద్రి కొత్తగూడెంలో 61.01 కిలోమీటర్లుగా ఉంది. రాష్ట్రంలో జాతీయ రహదారుల డెన్సిటీ ప్రతి 100 చ.కి.మీల వైశాల్యానికి కేవలం 4.45 కిలోమీటర్లు ఉండగా, జాతీయ సగటు 4.41 కిలోమీటర్లుగా ఉంది. తెలంగాణలో రోడ్ల డెన్సిటీ ఎంతో మెరుగ్గా ఉన్నట్టు దీనిబట్టి స్పష్టమవుతున్నది. తెలంగాణ ఏర్పాటయ్యాక పదేండ్ల పాటు బీఆర్‌ఎస్‌ సర్కారు అత్యధికంగా రోడ్లను నిర్మించడంతోనే ఈ ఘనత సాధ్యమైంది.

తెలంగాణ ఏర్పడే నాటికి రాష్ట్రంలో రహదారుల పరిస్థితి అత్యంత అధ్వానంగా ఉన్న విషయం విదితమే. జాతీయ రహదారులు కూడా చాలా తకువగా ఉండేవి. రోడ్లన్నీ గుంతలమయమే. ఈ నేపథ్యంలో రాష్ట్రంలో అధికారం చేపట్టిన బీఆర్‌ఎస్‌ రహదారులను పెద్దయెత్తున నిర్మించింది. గ్రామాల్లోని రోడ్లతోపాటు మండలాల నుంచి జిల్లా కేంద్రాలకు, జిల్లా కేంద్రాల నుంచి రాష్ట్ర రాజధానికి వెళ్లే రహదారులను అభివృద్ధి చేసింది. కొత్త జిల్లాలను ఏర్పాటు చేయడంతోపాటు వాటిని జాతీయ, రాష్ట్ర రహదారులతో అనుసంధానం చేసింది. ముఖ్యంగా గ్రామాల్లో పెద్దయెత్తున సీసీ రోడ్లను నిర్మించింది. ఫలితంగా రాష్ట్రంలో జాతీయ రహదారులు, ఆర్‌అండ్‌బీ, పంచాయతీరాజ్‌, జీహెచ్‌ఎంసీ తదితర శాఖల పరిధిలో అన్నిరకాల రహదారులు కలుపుకొని మొత్తం రోడ్‌ నెట్‌వర్క్‌ 1,11,730 కిలోమీటర్లకు చేరుకున్నది. ఇందులో సగానికిపైగా బ్లాక్‌టాప్‌ రోడ్లు ఉండగా, మిగిలినవి సీసీ, మెటల్‌ రోడ్లు.

బీఆర్‌ఎస్‌ సర్కారు అభివృద్ధి చేసిన రోడ్ల వివరాలు…

• రూ.17,360 కోట్లతో రాష్ట్రవ్యాప్తంగా 10,585 కిలోమీటర్ల మేర సింగిల్‌ లేన్‌ రోడ్లను డబుల్‌ లేన్‌ రోడ్లుగా అభివృద్ధి చేశారు.
• మండలాలను జిల్లా కేంద్రాలకు కలిపేందుకు రూ.2,727 కోట్లతో 1,875 కిలోమీటర్ల మేర డబుల్‌ లేన్‌ రోడ్ల నిర్మాణం చేపట్టగా.. అందులో 1,685 కిలోమీటర్లు పూర్తిచేశారు.
• రూ.11,191 కోట్లతో 4,517 కిలోమీటర్ల మేర ముఖ్యమైన ప్రాంతాలు, మార్కెట్లను కలిపేందుకు మేజర్‌ రోడ్లు, జిల్లా రోడ్ల విస్తరణ పనులు పూర్తిచేశారు.
• సెంట్రల్‌ రోడ్‌ ఫండ్‌(సీఆర్‌ఎఫ్‌) కింద రూ.3,442 కోట్లతో 3,061 కిలోమీటర్ల మేర రోడ్ల అభివృద్ధి, విస్తరణ పనులు చేపట్టి, అందులో 2,377 కిలోమీటర్లు పూర్తిచేశారు.
• రూ.3,134 కోట్లతో 717 వంతెనల పునరుద్ధరణ, విస్తరణ పనులు చేపట్టగా, అందులో 382 పూర్తయ్యాయి.
• తొమ్మిదేండ్లలో 8,218 కిలోమీటర్ల మేర రెండు లేన్ల రోడ్ల నిర్మాణం పూర్తిచేశారు. ఇది గత 56 ఏండ్లలో నిర్మించిన రెండు లేన్ల రోడ్ల కంటే అధికం.
• 321 కిలోమీటర్ల మేర నాలుగు లేన్ల రోడ్ల నిర్మాణం పూర్తి.
• 39 కిలోమీటర్ల మేర ఆరు లేన్ల రోడ్ల నిర్మాణం పూర్తి.
• రాష్ట్ర ఏర్పాటు తర్వాత రూ.4,603 కోట్లతో 13,000 కిలోమీటర్ల మేర రోడ్ల పునరుద్ధరణ పనులు పూర్తిచేశారు.
• 184 బ్రిడ్జ్‌ కమ్‌ చెక్‌డ్యామ్‌ల నిర్మాణం చేపట్టగా, 141 పూర్తయ్యాయి.
• రూ.865 కోట్లతో 28 రైల్వే క్రాసింగ్‌ల వద్ద ఆర్‌వోబీలు/ఆర్‌యూబీల నిర్మాణం పూర్తిచేశారు. తెలంగాణ ఏర్పాటుకు ముందు రాష్ట్రంలో మొత్తం ఆర్‌వోబీలు/ఆర్‌యూబీలు 32 మాత్రమే ఉండగా, తొమ్మిదేండ్లలోనే 28 నిర్మించడం విశేషం.
• తెలంగాణ ఏర్పాడే నాటికి రాష్ట్రంలో 2,511 కిలోమీటర్ల జాతీయ రహదారులు ఉండగా, ఆ తర్వాత 2,472 కిలోమీటర్ల మేర జాతీయ రహదారులను నిర్మించారు.

రాష్ట్రంలో రోడ్‌ నెట్‌వర్క్‌ వివరాలు (కిలోమీటర్లు)

ఆర్‌అండ్‌బీ రోడ్లు 29,240.28 (26.16%)

పంచాయతీరాజ్‌ ఇంజినీరింగ్‌ శాఖ (పీఆర్‌ఈడీ, గ్రామీణ రోడ్లు) 68,539.27 (61.32%)

జీహెచ్‌ఎంసీ రోడ్లు 9,013.01 (8.06 %)

జాతీయ రహదారులు 4,983 (4.46%)

మొత్తం – 1,11,730.56

బీఆర్‌ఎస్‌ హయాంలో ఆర్‌అండ్‌బీ శాఖ నిర్మించిన రోడ్లు (కిలోమీటర్లు)