Telangana | కరెంటు కోతలు కాళరాత్రులు.. కాంగ్రెస్‌ పాలనలో కర్షకులకు కష్టాలు!

కర్షకులకు మళ్లీ కాళరాత్రులు వచ్చాయి. 24 గంటల నిరంతర కరెంటుతో పదేండ్ల పాటు గుండెలపై చెయ్యేసుకొని కంటి నిండా నిద్రపోయిన రైతులకు ఇప్పుడు కునుకు కరువైంది. రాష్ట్రంలో సమైక్య పాలన నాటి విద్యుత్తు కష్టాలు పునరావృతమవుతున్నాయి. పొలానికి నీళ్లు పెట్టేందుకు కరెంటు కోసం అర్ధరాత్రి పడిగాపులు మొదలయ్యాయి.

• కరెంటు కోసం రాత్రివేళ రైతుల పడిగాపులు
• అర్ధరాత్రి పూట బావుల వద్దకు పరుగులు
• కాలుతున్న బోరు మోటర్లు, ట్రాన్స్‌ఫార్మర్లు
• పదేండ్ల తర్వాత మళ్లీ పీడిస్తున్న పాత కష్టాలు
• కడుపుమండి రోడ్డెక్కుతున్న అన్నదాతలు
• కలెక్టరేట్లు, కరెంటు ఆఫీసుల వద్ద ధర్నాలు
• విద్యుత్తు సంక్షోభంతో అప్రకటిత కోతలు
• మార్చిలోనే ఇట్ల.. ఎండలు ముదిరితే ఎట్ల?

Telangana | హైదరాబాద్‌, మార్చి 7 ( నమస్తే తెలంగాణ) : కర్షకులకు మళ్లీ కాళరాత్రులు వచ్చాయి. 24 గంటల నిరంతర కరెంటుతో పదేండ్ల పాటు గుండెలపై చెయ్యేసుకొని కంటి నిండా నిద్రపోయిన రైతులకు ఇప్పుడు కునుకు కరువైంది. రాష్ట్రంలో సమైక్య పాలన నాటి విద్యుత్తు కష్టాలు పునరావృతమవుతున్నాయి. పొలానికి నీళ్లు పెట్టేందుకు కరెంటు కోసం అర్ధరాత్రి పడిగాపులు మొదలయ్యాయి. 14 నెలల్లోనే విద్యుత్తు రంగం అస్తవ్యస్తం కావడంతో అటు అన్నదాతలు, ఇటు ప్రజలకు ‘అప్రకటిత కోతల’ కష్టాలు ఎదురవుతున్నాయి. ఓవైపు భూగర్భ జలాలు అడుగంటి, మరోవైపు చాలీచాలని కరెంటుతో పంటలకు నీళ్లందక ఎండిపోతుంటే దిక్కుతోచని పరిస్థితుల్లో కడుపుమండిన రైతులు రోడ్డెక్కి ఆందోళన చేస్తున్నారు. సాగుకు సరిపడా కరెంట్‌ ఇవ్వని సర్కారుపై నిత్యం ఏదో ఒక చోట నిరసన గళం వినిపిస్తూనే ఉన్నారు.

అర్ధరాత్రి బావుల వద్దకు..

గ్రామాల్లో రాత్రి 12 గంటలకు త్రీఫేజ్‌ కరెంట్‌ ఇస్తున్నారు. ఉదయం 7 గంటలకే ఎండ మండిపోయి పొలాల్లో నీళ్లు ఎండిపోతున్నాయి. రాత్రిపూట నీళ్లు పారిస్తేనే పొలాల్లో జీవం ఉంటున్నది. ఇలా రాత్రిపూట ఇచ్చే కరెంట్‌ కోసం ఇప్పుడు అర్ధరాత్రి, అపరాత్రి రైతులు బావుల వద్దకు పరుగులు పెడుతూ పడిగాపులు కాస్తున్నారు. ఎప్పుడు వస్తుందో.. ఎప్పుడు పోతుందే తెలియని కరెంట్‌ కోసం బావుల వద్దే నిద్రకుండా నిరీక్షిస్తున్నారు. ఇది వరకు రైతు ఉదయం 5 గంటలకు పొలానికి వెళ్లి నీళ్లు పారించే పరిస్థితి ఉండగా ఇప్పుడు అర్ధరాత్రి అరిగోస పడుతున్నారు. టార్చిలైట్లు చేతబట్టి చిమ్మచీకట్లల్లో పంటలను కాపాడుకునేందుకు తమ ప్రాణాలను పణంగా పెడుతున్నారు. పాములు, తేళ్లు, విష పురుగులతో మళ్లీ సావాసం చేస్తున్నారు.

అప్రకటిత కోతలు షురూ

విద్యుత్తు రంగ నిర్వహణ అస్తవ్యస్తం కావడంతో రాష్ట్రంలో సంక్షోభానికి దారి తీసి ఎండలు ముదరకముందే అప్రకటిత కోతలు షురువయ్యాయి. దీంతో రైతులు, వినియోగదారులు తీవ్ర ఇబ్బందులు పడుతున్నారు. లోవోల్టేజీ సమస్యలు, మోటర్లు కాలిపోవడం, ట్రాన్స్‌ఫార్మర్లు పేలిపోవడం వంటివి పునరావృతమవుతున్నాయి. బీఆర్‌ఎస్‌ హయాంలో వెలుగులు విరజిమ్మిన తెలంగాణలో కాంగ్రెస్‌ రాగానే కారుచీకట్లు కమ్ముకుంటున్నాయి. గ్రామీణ ప్రాంతాల్లో కరెంటు పోయినా, ఫ్యూజు పోయినా పట్టించుకునేవారే కరువయ్యారు. విద్యుత్తు సరఫరా వ్యవస్థల మీద అవగాహన లేకుండా ఆపరేషన్‌ సిబ్బంది బదిలీలు చేపట్టారు. పంపిణీలో అత్యంత కీలకమైన టీజీఎస్పీడీసీఎల్‌ పరిధిలో 73 ఆపరేషన్‌ ఏఈ పోస్టులు ఖాళీగా ఉన్నాయి. గ్రామీణ ప్రాంత ఇంజినీర్లను బదిలీ చేసి పట్టణ ప్రాంతాల్లో పోస్టింగ్‌లు ఇచ్చారు. దీంతో రైతులే మరమ్మతులు చేసుకోవాల్సి వస్తున్నది. ఓవైపు భూగర్భ జలాలు అడుగంటి, మరోవైపు చాలీచాలని కరెంట్‌తో ఉన్న నీళ్లూ పారక రాష్ట్రవ్యాప్తంగా అన్ని జిల్లాల్లో పంటలు ఎండిపోతున్నాయి. సాగుకు సరిపడా కరెంట్‌ ఇవ్వాలని విన్నవించినా పట్టించుకునేవారే లేక రైతుల ఆందోళనలు నిత్యకృత్యమయ్యాయి.

సమ్మర్‌ ప్లాన్‌ ఫెయిల్‌!

నాగార్జునసాగర్‌, శ్రీశైలం, జూరాల వంటి జలాశయాల్లో నీళ్లు లేవు. జల విద్యుత్తు ఉత్పత్తి చేసే పరిస్థితులు కనిపించడంలేదు. ఉమ్మడి జిల్లాల వారీగా తీసుకుంటే కరీంనగర్‌, మహబూబ్‌నగర్‌, ఆదిలాబాద్‌ జిల్లాల్లో విద్యుత్తు డిమాండ్‌ పెరుగుతున్నది. ఈ జిల్లాల్లో వ్యవసాయం కాలువల కంటే ఎక్కవగా బోర్లు, బావుల మీదే ఆధారపడి నడుస్తున్నది. కొన్ని ప్రాంతాల్లో నాట్లు ఆలస్యమయ్యాయి. మే నెల వరకు పంటలకు నీళ్లందించాల్సి ఉన్నది. రాష్ట్రంలో పెరిగిన డిమాండ్‌కు తగినంతగా విద్యుత్తు అందుబాటులో లేదు. గరిష్ఠ డిమాండ్‌ రికార్డు స్థాయిలో నమోదవుతున్నది. ఫిబ్రవరి 10న 15998 మెగావాట్లు, 19న 16058 మెగావాట్లుగా నమోదైంది. మార్చిలో 17,500 మెగావాట్లకు చేరనున్నట్టు నిపుణులు అంచనా వేస్తున్నారు.

మన రాష్ట్రంలో విద్యుత్తు సరిపడా లేనందున రోజుకు దాదాపు రూ.10 కోట్లు వెచ్చించి పక్కరాష్ట్రాల నుంచి కొనుగోలు చేయాల్సి వస్తున్నది. ఉమ్మడి జిల్లాల వారీగా తీసుకుంటే కరీంనగర్‌, మహబూబ్‌నగర్‌, ఆదిలాబాద్‌ జిల్లాల్లోనే డిమాండ్‌ పెరుగుతున్నది. ఆ జిల్లాల్లో వ్యవసాయం కాలువల పారకం కంటే ఎక్కవగా బోర్లు, బావుల మీదే అధారపడి నడుస్తున్నది. పరిస్థితులను ముందుగా అంచనా వేయాల్సిన ప్రభుత్వం పట్టించుకోలేదని విమర్శలు వినిపిస్తున్నాయి. అందువల్లే సమ్మర్‌ యాక్షన్‌ ప్లాన్‌ పనులు నత్తనడకన సాగుతున్నాయని విద్యుత్తురంగ నిపుణులు మండిపడుతున్నారు. మార్చి 10లోగా పూర్తి చేయాలని కాగితాలపై గడువు పెట్టుకున్నప్పటికీ ఏవీ కూడా కొలిక్కిరాలేదని చెప్తున్నారు. ఫలితంగా సబ్‌స్టేషన్లపై ఓవర్‌లోడ్‌ పడుతున్నదని పరిస్థితి తీవ్రతను వివరిస్తున్నారు.

తరచూ కోతలు..

• కరెంట్‌ కోతల కారణంగా అటు రైతులు, ఇటు ప్రజలు తీవ్ర ఇబ్బందులు పడున్నారు. పంటలు ఎండిపోతుండడంతో అన్నదాతలు నిత్యం ఏదో ఒక చోట నిరసనలకు దిగుతున్నారు. ఎండిన వరి, మక్కను చూపుతూ కలెక్టరేట్లు, విద్యుత్తు కార్యాలయాల వద్ద ఆందోళనలు చేస్తున్నారు.
• జనవరి 18న మేడ్చల్‌ మల్కాజిగిరి జిల్లా దమ్మాయిగూడ మున్సిపల్‌ పరిధిలోని భోగారంలో వ్యవసాయ కనెక్షన్లకు విద్యుత్తు నిలిపివేశారు. బిల్లులు పెండింగ్‌లో ఉండటం, ఆయా బిల్లులు కట్టకపోవడంతో ట్రాన్స్‌ఫార్మర్‌కు విద్యుత్తు నిలిపివేసినట్లు డీఈ ప్రకటించారు.
• దమ్మాయిగూడ మున్సిపల్‌ పరిధిలోని భోగారంలో ట్రాన్స్‌ఫార్మర్లకు విద్యుత్తు నిలిపివేశారు. దీంతో వ్యవసాయ పొలాలకు సాగునీటినందించే మోటార్లు మూలనపడ్డాయి.
• ఫిబ్రవరి మొదటి వారంలో సైబరాబాద్‌లో 4 గంటల పాటు విద్యుత్తు సరఫరా నిలిచిపోయింది.
• ఫిబ్రవరి రెండో వారంలో ఖైరతాబాద్‌ ఆనంద్‌నగర్‌ కాలనీలో గంటల తరబడి విద్యుత్తు సరఫరా నిలిచిపోయింది. మెయింటెనెన్స్‌ వర్క్స్‌ వల్లేనని అధికారులు చెప్పారు.
• ఫిబ్రవరి 14న శేరిలింగంపల్లిలోని సుదర్శన్‌నగర్‌లో 11: 30 గంటలకు పోయిన కరెంట్‌ 4 గంటలైనా రాలేదు.
• ఫిబ్రవరి 28న మెదక్‌ జిల్లా చేగుంట మండలం కర్ణంపల్లి సబ్‌స్టేషన్‌ ముందు వందలాది మంది రైతులు ఆందోళనకు దిగారు. విద్యుత్తు సక్రమంగా రాకపోవడం, పంటలు పండే పరిస్థితి లేకపోవడంతో ఆగ్రహించిన గ్రామస్తులు సబ్‌స్టేషన్‌ ముందు నిరసన తెలిపారు.
• మార్చి 5న వరంగల్‌ నగరంలోని 3వ డివిజన్‌ కొత్తపేటలో గత ఐదు రోజులుగా విద్యుత్తు సరఫరా నిలిచిపోవడంతో పంటలు ఎండిపోతున్నాయని రైతులు రోడ్డుపై ధర్నా, ఆందోళన నిర్వహించారు. లోడ్‌ అధికమై ట్రాన్స్‌ఫార్మర్లు కాలిపోతున్నట్లు డీఈ తెలుపడం విశేషం.
• మార్చి 6న అల్వాల్‌ – వెంకటాపురం ప్రాంతంలో మధ్యాహ్నం 2 గంటల నుంచి సాయంత్రం 5గంటల వరకు కరెంట్‌ కట్‌ అయ్యింది. ఉక్కపోతలతో జనం అల్లాడిపోయారు.
• మెదక్‌ జిల్లాలో నెలకు సగటున 500 -600 వ్యవసాయ మోటర్లు కాలిపోతున్నాయి. ఇప్పటికే వరినాట్లు, పంట పెట్టుబడి కోసం అప్పులు చేసిన రైతులకు మెటర్లు కాలిపోవడంతో మరింత అప్పుల్లో కూరుకుపోతున్నారు.
• సంగారెడ్డి జిల్లాలో వ్యవసాయానికి 8- 16 గంటలే కరెంట్‌ ఇస్తున్నారు. ఈ జిల్లాలో బోరుబావులకు సంబంధించి కొన్ని మండలాల్లో లోవోల్టేజీ సమస్య ప్రారంభమైంది. భూగర్భ జలాలు తగ్గిపోవటం వల్ల బోరు మోటర్లు నిరంతరంగా నడుస్తుండటంతో ట్రాన్స్‌ఫార్మర్ల వద్ద ఫీజులు పోతున్నాయి.