విద్యుత్తు చార్జీలు పెంచం

రాష్ట్ర ప్రజలకు, వినియోగదారులకు ఉపశమనం కలిగిస్తూ విద్యుత్తు పంపిణీ సంస్థలు (డిస్కంలు) కీలక నిర్ణయం తీసుకున్నాయి. వచ్చే సంవత్సరానికి చార్జీల భారం మోపమని, పాత చార్జీలనే కొనసాగిస్తామని ప్రకటించాయి

• 2023-24 ఏడాదికి పాత చార్జీలే
• పాత టారిఫ్‌నే కొనసాగించాలని ఈఆర్సీ ముందు డిస్కంల ప్రతిపాదన

హైదరాబాద్‌, నవంబర్‌ 30 (నమస్తే తెలంగాణ): రాష్ట్ర ప్రజలకు, వినియోగదారులకు ఉపశమనం కలిగిస్తూ విద్యుత్తు పంపిణీ సంస్థలు (డిస్కంలు) కీలక నిర్ణయం తీసుకున్నాయి. వచ్చే సంవత్సరానికి చార్జీల భారం మోపమని, పాత చార్జీలనే కొనసాగిస్తామని ప్రకటించాయి. ఈ మేరకు 2023-24 సంవత్సరానికి వార్షిక ఆదాయ అవసరాల నివేదిక (అగ్రిగేట్‌ రెవెన్యూ రిక్వైర్‌మెంట్‌)ను బుధవారం తెలంగాణ విద్యుత్తు నియంత్రణ మండలి (ఏఆర్సీ)కి సమర్పించాయి. 2022-23 సంవత్సరంలో కొనసాగుతున్న ప్రస్తుత టారిఫ్‌ను యాథావిధిగా కొనసాగించాలని కోరుతూ ఈఆర్సీ చైర్మన్‌ తన్నీరు శ్రీరంగారావుకు ఏఆర్‌ఆర్‌ ప్రతిపాదనలను సమర్పించాయి. దీంతో వచ్చే ఏడాది చార్జీలు పెంచకుండా, ప్రస్తుత టారిఫ్‌నే కొనసాగించే అవకాశమున్నది.

ప్రజాభిప్రాయసేకరణ జరుపుతాం
పాత టారిఫ్‌నే కొనసాగించాలని డిస్కంలు ప్రతిపాదించాయని ఈఆర్సీ చైర్మన్‌ శ్రీరంగారావు చెప్పారు. రాష్ట్రంలోని రెండు డిస్కంలు ఎస్పీడీసీఎల్‌, ఎన్పీడీసీఎల్‌ వచ్చే ఆర్థిక సంవత్సరానికి ఏఆర్‌ఆర్‌ ప్రతిపాదనలు సమర్పించిన సందర్భంగా బుధవారం ఆయన మీడియాతో మాట్లాడారు. కేంద్రం వెల్లడించిన నిబంధనల ప్రకారం డిస్కంలు యూనిట్‌కు 30 పైసలు పెంచుకొనే అవకాశమున్నదని, యూనిట్‌కు 50 పైసలకు పెంచాలంటే ఈఆర్సీ అనుమతి అవసరమవుతుందని పేర్కొన్నారు. డిస్కంల ప్రతిపాదనలు చార్జీల పెంపు, తగ్గింపు అంశంపై ప్రజాభిప్రాయ సేకరణ జరుపుతామని చెప్పారు. వ్యవసాయానికి విద్యుత్తు అందించే డిస్ట్రిబ్యూషన్‌ ట్రాన్స్‌ఫార్మర్ల వద్ద మీటర్లు పెట్టాలని, 500 యూనిట్ల వినియోగదారులు ప్రీపెయిడ్‌ మీటర్లు పెట్టుకోవాలని డిస్కంలకు సూచించామని చెప్పారు.

నివేదికలోని ముఖ్యాంశాలు

• రాష్ట్రంలో గరిష్ఠ విద్యుత్తు డిమాండ్‌ 14,160 మెగావాట్లు 2022 మార్చి 29న నమోదైంది. గతేడాది 13,688 మెగావాట్లను అధిగమించింది.
• తలసరి విద్యుత్తు వినియోగం ప్రగతి సూచికగా పరిగణిస్తుండగా, 2021-22లో రాష్ట్రంలో తలసరి వినియోగం 2,126 యూనిట్లుగా ఉన్నది. అదే జాతీయ సగటు తలసరి విద్యుత్తు వినియోగం 1,255 యూనిట్లు మాత్రమే.
• 2021-22 సంవత్సరంలో జెన్‌కో ప్లాంట్‌ లోడ్‌ ఫ్యాక్టర్‌ (పీఎల్‌ఎఫ్‌) దేశంలోనే అత్యధికంగా 73.87 శాతంగా ఉన్నది. జాతీయ సగటు 56.5 శాతం మాత్రమే.
• తెలంగాణ విద్యుత్తు పంపిణీ సంస్థలు 24 గంటలపాటు నాణ్యమైన విద్యుత్తునందిస్తూ వినియోగదారులకు ఉత్తమ సేవలందిస్తున్నాయి. మొబైల్‌యాప్‌లను అందుబాటులోకి తీసుకొచ్చి కంజ్యూమర్‌ ఫ్రెండ్లీ విధానాలను అనుసరిస్తున్నాయి.
• రాష్ర్టానికి పెద్ద ఎత్తున పెట్టుబడులు, పరిశ్రమలు తరలివస్తుండటంతో 2023-24లో ఇండస్ట్రియల్‌, కమర్షియల్‌ విద్యుత్తు వినియోగం 13.75 శాతం నుంచి 15.07 శాతానికి పెరిగే అవకాశాలున్నాయి.
• వ్యవసాయంతోపాటు రాష్ట్రంలోని అన్ని రకాలైన వినియోగదారులకు 24గంటల విద్యుత్తునందిస్తున్న ఏకైక రాష్ట్రం తెలంగాణ మాత్రమే. వ్యవసాయానికి ఉచిత విద్యుత్తుతో రాష్ట్రంలో 27.62 లక్షల రైతులకు లాభం జరుగుతున్నది.
• ఎస్సీ, ఎస్టీ గృహ వినియోగదారులకు నెలకు 101 యూనిట్ల వరకు, నాయీబ్రాహ్మణుల క్షౌరశాలలు, సెలూన్లు, రజకుల లాండ్రీషాపులకు 250 యూనిట్ల వరకు, పవర్‌లూమ్స్‌, పౌల్ట్రీరైతులు, స్పిన్నింగ్‌ మిల్స్‌కు ఒక్కో యూనిట్‌పై రూ.2 రాయితీ లభిస్తున్నది.