డబుల్‌ ఖుషీ!.. పండుగలా డబుల్‌ ఇండ్ల పంపిణీ

నిరుపేదల ఆత్మగౌరవ ప్రతీకలు... డబుల్‌ బెడ్రూం ఇండ్ల పంపిణీ కార్యక్రమం గ్రేటర్‌ హైదరాబాద్‌లో శనివారం పండుగ వాతావరణంలో మొదలైంది. గ్రేటర్‌ పరిధిలోని 24 నియోజకవర్గాలకు చెందిన 11,700 మంది లబ్ధిదారులకు తొమ్మిది ప్రాంతాల్లో మంత్రులు, మేయర్‌, డిప్యూటీ స్పీకర్‌ భారీ ఏర్పాట్లు చేసి.. పత్రాలను అందజేశారు.

• రూ.9 వేల కోట్లతో లక్ష డబుల్‌ బెడ్రూం ఇండ్లు శనివారం ఒక్క రోజే 11,700 మందికి పత్రాలు
• నెరవేరుతున్న సీఎం కేసీఆర్‌ సంకల్పం
• హైదరాబాద్‌లో 9 కీలక ప్రాంతాల్లో అందజేత.. ఓవైపు కోటీశ్వరులు, పక్కనే పేదోళ్ల డబుల్‌ ఇండ్లు
• పట్టరాని సంతోషంలో ‘కొల్లూరు’ లబ్ధిదారులు.. కేసీఆర్‌ వల్లే పేదల సొంతింటి కల సాకారం: హరీశ్‌
• ఇండ్ల పండుగతో విపక్షాల మైండ్‌ బ్లాంక్‌.. కిషన్‌రెడ్డి పార్లమెంట్‌ పరిధిలో 3,500 ఇండ్ల పంపిణీ

హైదరాబాద్‌ సిటీబ్యూరో ప్రధాన ప్రతినిధి, సెప్టెంబర్‌ 2 (నమస్తే తెలంగాణ): నిరుపేదల ఆత్మగౌరవ ప్రతీకలు… డబుల్‌ బెడ్రూం ఇండ్ల పంపిణీ కార్యక్రమం గ్రేటర్‌ హైదరాబాద్‌లో శనివారం పండుగ వాతావరణంలో మొదలైంది. గ్రేటర్‌ పరిధిలోని 24 నియోజకవర్గాలకు చెందిన 11,700 మంది లబ్ధిదారులకు తొమ్మిది ప్రాంతాల్లో మంత్రులు, మేయర్‌, డిప్యూటీ స్పీకర్‌ భారీ ఏర్పాట్లు చేసి.. పత్రాలను అందజేశారు.

దశలవారీగా మిగిలిన ఇండ్లను అర్హులందరికీ పంపిణీ చేస్తామని మంత్రులు భరోసా ఇచ్చారు. గ్రేటర్‌ హైదరాబాద్‌ పరిధిలో లక్ష డబుల్‌ బెడ్రూం ఇండ్లను పంపిణీ చేయాలన్నది ప్రభుత్వం లక్ష్యం. ఇటీవల 68,632 ఇండ్ల నిర్మాణం పూర్తి కాగా… మిగిలిన వాటి పనులు చివరి దశలో ఉన్నా యి. లబ్ధిదారులను ఎంపిక చేసేందుకు డ్రా నిర్వహించారు. తొలి విడతలో భాగంగా 11,700 మంది లబ్ధిదారులను ఎంపికచేశారు. ఈ మేరకు శనివారం గ్రేటర్‌ పరిధిలో తొమ్మిది చోట్ల వేదికలను ఏర్పాటు చేశారు. మంత్రులు హరీశ్‌రావు, తలసాని శ్రీనివాస్‌యాదవ్‌, మహేందర్‌రెడ్డి, సబితా ఇంద్రారెడ్డి, మహమూద్‌అలీ, మల్లారెడ్డి, డిప్యూటీ స్పీకర్‌ పద్మారావు, మేయర్‌ గద్వాల్‌ విజయలక్ష్మి చేతుల మీదుగా లబ్ధిదారులకు పత్రాలు పంపిణీ చేశారు. గ్రేటర్‌ హైదరాబాద్‌ పరిధిలోని సనత్‌నగర్‌, కూకట్‌పల్లి, గోషామహల్‌, నాంపల్లి, కార్వాన్‌, ఖైరతాబాద్‌, జూబ్లీహిల్స్‌, శేరిలింగంపల్లి, పటాన్‌చెరు, రాజేంద్రనగర్‌, మల్కాజిగిరి, ముషీరాబాద్‌, సికింద్రాబాద్‌, ఉప్పల్‌, ఎల్బీనగర్‌, అంబర్‌పేట, మలక్‌పేట, యాఖత్‌పుర, ముషీరాబాద్‌, చాంద్రాయణగుట్ట, బహదూర్‌పుర నియోజకవర్గాలకు చెందిన 500 మంది చొప్పున లబ్ధిదారులతోపాటు సికింద్రాబాద్‌ కంటోన్మెంట్‌ పరిధిలోని 200 మంది లబ్ధిదారులకు వీటిని కేటాయించారు.

గత చరిత్రకు భిన్నంగా..

ప్రభుత్వ పక్కా ఇల్లు పొందడం అంటేనే పైరవీల రాజ్యం అనేది గత అనుభవాలసారం. లబ్ధిదారుడు జేబు నుంచి వేల రూపాయలు చెల్లించడంతోపాటు ఎప్పుడూ రుణం పేరిట కత్తి వేలాడుతూనే ఉంటుంది. ఆ చరిత్రకు భిన్నంగా గ్రేటర్‌లో శనివారం జరిగిన డబుల్‌బెడ్రూం ఇండ్ల పంపిణీ పండుగ నిరుపేదల మోములో నిజమైన ఆనందాన్ని నింపింది. పారదర్శకంగా ఇండ్ల కేటాయింపు ప్రక్రియ పూర్తయింది. లబ్ధిదారులను అధికారులు గౌరవంగా బస్సుల్లో తరలించి, ప్రజాప్రతినిధుల చేతుల మీదుగా కేటాయింపు పత్రాలను ఇప్పించారు. వారికి భోజనం పెట్టి, అంతే గౌరవంగా బస్సుల్లో వారిని గమ్యస్థానాలకు చేర్చారు.

గత ప్రభుత్వాల హయాంలో నిరుపేదలకు ఇచ్చిన పక్కా ఇండ్లు, ఇప్పుడు బీఆర్‌ఎస్‌ ప్రభుత్వ హయాంలో ఇస్తున్న డబుల్‌ బెడ్రూం గృహాల తీరు ఇలా..

బీఆర్‌ఎస్‌ డబుల్‌ బెడ్రూం గృహాలు

విస్తీర్ణం: 560 చదరపు అడుగుల ప్లింత్‌ ఏరియా
ప్రభుత్వపరంగా ఒక్కో గృహ నిర్మాణానికి వెచ్చించిన వ్యయం: రూ.7.90 లక్షలు
మౌలిక వసతుల కల్పనకు వెచ్చించిన వ్యయం: రూ.75 వేలు
ఒక్కో డబుల్‌ బెడ్రూం ఇంటిపై ప్రభుత్వం వెచ్చించిన వ్యయం: రూ.8.65 లక్షలు
లబ్ధిదారుడి వాటా : సున్నా. ఇంటిపై రుణం: సున్నా

కాంగ్రెస్‌ వాంబే గృహాలు

విస్తీర్ణం :300 చదరపు అడుగులు
ఒక్కో యూనిట్‌ (గృహం) విలువ: రూ.2 లక్షలు
లబ్ధిదారుడి వాటా: రూ.36 వేలు
రాష్ట్ర ప్రభుత్వ వాటా: రూ.36 వేలు
కేంద్ర ప్రభుత్వ వాటా : రూ.1.28 లక్షలు

కాంగ్రెస్‌ రాజీవ్‌ గృహకల్ప

విస్తీర్ణం: 218.82 చదరపు అడుగులు
ఒక్కో యూనిట్‌ (గృహం) విలువ: రూ.లక్ష
బ్యాంకు రుణం: రూ.72,250
లబ్ధిదారుడి తొలి వాటా: రూ.వెయ్యి రిజిస్ట్రేషన్‌ ఫీజు, రూ.9,800 బ్యాంకు డిపాజిట్‌
లబ్ధిదారుడి మలి వాటా : రూ.20,613

చరిత్ర ఆద్యంతం పక్కా ఇంటికి నిరుపేద గోసనే…

• ఇప్పుడే కాదు.. దశాబ్దాలుగా ప్రభుత్వాలు పక్కా ఇంటిని కట్టించడమంటే నిరుపేదలను గోస తీయించినాయి. బీఆర్‌ఎస్‌ ప్రభుత్వం లక్షల రూపాయల విలువైన డబుల్‌బెడ్రూం ఇండ్లను ఉచితంగా అందిస్తున్నది. కానీ చరిత్రలో ఏనాడు చూసినా లబ్ధిదారుడు వాటాను చెల్లించక తప్పలేదు. దీనిపై గతంలో సీఎం కేసీఆర్‌ శాసనసభ వేదికగా ఆ పరంపరను ప్రజల ముందుంచారు. దానిలో ప్రధానాంశాలు ఇలా..
• బలహీనవర్గాల గృహ నిర్మాణం విషయంలో ఇప్పటివరకు ప్రభుత్వాలు అనుసరించిన విధానాన్ని లోతుగా విశ్లేషిస్తే.. పేదలకు ఒరిగిందేమీ లేదు.
• పేరుకు ప్రభుత్వం ఇండ్లు కట్టించి ఇచ్చిందన్నదేగానీ భారం బలహీన వర్గాలపైనే పడింది.
• 1974 ప్రాంతంలో హట్టింగ్‌ స్కీమ్‌ (గుడిసెల పథకం) అమలులో ఉండేది. అప్పుడు గుడిసె నిర్మాణం కోసం ప్రభుత్వం ఇచ్చిన మొత్తం రూ.400.
• 1978 వచ్చే నాటికి సెమీ పర్మనెంట్‌ హౌస్‌స్కీమ్‌ కింద రూ.1,000 ఇచ్చారు.
• 1983లో పక్కా ఇండ్ల నిర్మాణ పథకం ప్రారంభమైంది. ఇక్కడి నుంచి ప్రభుత్వం కొంత సబ్సిడీగా ఇస్తే, మిగతా ఖర్చంతా లబ్ధిదారుడే భరించే పద్ధతి అమల్లోకి వచ్చింది.
• 1983లో గ్రామీణ ప్రాంతంలో ఒక్కో ఇంటి నిర్మాణానికి నిర్ణయించిన ఖర్చు రూ. 6 వేలు. ఇందులో రూ.2,750 ప్రభుత్వం సబ్సిడీ ఇస్తుంది. బ్యాంకురుణం రూ.3 వేలు, వాటాధనం కింద రూ.250 మొత్తం రూ.3,250 లబ్ధిదారుడు భరించాలి. ఇంటి నిర్మాణ ఖర్చులో 54 శాతం లబ్ధిదారుడు భరిస్తే, ప్రభుత్వం భరించింది 46 శాతం.
• రానురాను లబ్ధిదారుడి మీద భారం పెరుగుతూ వచ్చింది. 2004లో యూనిట్‌ కాస్ట్‌ రూ.22,500. ఇందులో ప్రభుత్వం ఇచ్చిన సబ్సిడీ రూ.7 వేలు. లబ్ధిదారుడు భరించింది 68.8 శాతం కాగా, ప్రభుత్వం భరించింది 31.2 శాతం.
• 2014లో నిర్ణయించిన యూనిట్‌ కాస్ట్‌ రూ.70 వేలు. ఇందులో ప్రభుత్వ సబ్సిడీ రూ.20,500. లబ్ధిదారుడు భరించింది రూ.49,500. లబ్ధిదారుడి మీద పడిన భారం 70.7 శాతమైతే, ప్రభుత్వం భరించింది 29.3 శాతమే.
• ఇక ఎస్సీలకు రూ.లక్షతో, ఎస్టీలకు లక్షా 5వేలతో ఇండ్లు కట్టించామని గత ప్రభుత్వం గొప్పగా చెప్పుకున్నది. కానీ ఎక్కువ భారం లబ్ధిదారుల మీదే పడింది. ఎస్సీల విషయం లో ఇంటికి రూ.లక్ష యూనిట్‌ కాస్ట్‌ అయితే, అందులో ప్రభుత్వం భరించింది 20,500 మాత్రమే. మిగతా రూ.79,500 భారం లబ్ధిదారుడి మీదే పడింది. అంటే ఎస్సీ లబ్ధిదారులు 79.5% భరిస్తే, ప్రభుత్వం ఇచ్చిన సబ్సిడీ 20.5 శాతం మాత్రమే.
• ఎస్టీల విషయంలోనూ ఇదే విధానం అమలైంది. రూ.1.05 లక్షల యూనిట్‌ కాస్ట్‌లో లబ్ధిదారుడి మీద వేసిన భారం రూ.84,500, ప్రభుత్వం ఇచ్చిన సబ్సిడీ రూ.20,500. అంటే 80.47 శాతం భారం ఎస్టీ లబ్ధిదారుడి మీద పడితే, ప్రభుత్వం పంచుకున్న భారం 19.53 శాతం.
• 1983 నుంచి 2014 వరకు గ్రామీణ ప్రాంతాల్లో బలహీనవర్గాల ప్రజలు తమ ఇంటి కోసం అయిన ఖర్చులో 72 శాతం తామే భరిస్తే, సబ్సిడీ రూపంలో ప్రభుత్వం ఇచ్చింది 28 శాతమే.
• పట్టణ ప్రాంతాల్లో లబ్ధిదారులపై పడిన భారం మరింత ఎక్కువ. 1983 నుంచి 2014 వరకు పట్టణ ప్రాంతాల్లో లబ్ధిదారులపై పడిన భారం 90 శాతం కాగా, ప్రభుత్వం ఇచ్చిన సబ్సిడీ 10 శాతమే.

పైసా తీసుకోకుండానే..

కేసీఆర్‌ మాట అంటే మాకు ఎంతో గురి.. పింఛన్‌ పెంచుతా అన్నడు.. పెంచి చూపించారు.. ఆడపిల్లల పెండ్లికి కల్యాణలక్ష్మి ఇస్తా అన్నడు ఇస్తున్నరు.. డబుల్‌ బెడ్‌రూం ఇండ్లు ఇస్తామన్నడు.. ఈ రోజు ఒక్క పైసా తీసుకోకుండా నాకు డబుల్‌ బెడ్రూం ఇల్లు ఇచ్చారు. ఇన్నేండ్లు కిరాయి ఇంట్లో ఉన్న నాకు ఇక్కడి ఇండ్లు చూస్తే నోట మాట వస్తలేదు.
– పార్వతమ్మ. కార్మికనగర్‌, రహ్మత్‌నగర్‌ డివిజన్‌, హైదరాబాద్‌

కేసీఆర్‌ సారు సల్లగుండాలె..

కర్ధనూరులో నాకు డబుల్‌ బెడ్‌రూం ఇల్లు అందజేసిన సీఎం కేసీఆర్‌ సారు సల్లగ ఉండాలి. 20 ఏండ్ల నుంచి కిరాయి ఇంట్ల ఉంటున్నం. నా భర్త కూలీ. ఇద్దరు పిల్లలు బడికి పోతున్నరు. అధికారులు ఫోన్‌ చేసినప్పుడు నేను నమ్మలేదు. డబుల్‌ బెడ్రూం ఇల్లు ఇస్తున్నమని చెప్పంగనే చాలా సంతోషం అనిపించింది. సీఎం కేసీఆర్‌ మా దేవుడు.
– మాధవి, మైలార్‌దేవర్‌పల్లి, రాజేంద్రనగర్‌

పైసా ఖర్చులేకుండా50 లక్షల ఇల్లు

నాలుగేండ్ల క్రితం డబుల్‌ బెడ్‌రూం ఇంటి కోసం దరఖాస్తు చేసుకున్నం. పదేండ్ల నుంచి కేసీఆర్‌కే ఓటు వేస్తున్నం. తప్పకుండా ఇల్లు వస్తుందని నమ్మకం ఉండేది. డబుల్‌ బెడ్‌రూం ఇండ్లకు డబ్బులు ఇవ్వాలని కొంతమంది మాట్లాడుకునే వాళ్లు. ఎవరికీ పైసా ఇవ్వవద్దని మా ఎమ్మెల్యే మాగంటి సార్‌ మీటింగ్స్‌లో చెప్పేవారు. అందుకే ఎవరికీ డబ్బులు ఇవ్వలేదు. పైసా ఖర్చులేకుండా 50 లక్షల విలువైన ఇంటిని కేసీఆర్‌ మాకు ఇచ్చాడంటే నమ్మలేకుండా ఉన్నం. నాతోపాటు మా బంధువులందరూ ఫోన్లు చేస్తూ కంగ్రాట్స్‌ అంటుంటే ఎంతో సంతోషంగా ఉన్నది. ఇరుకైన కిరాయి ఇంట్లో ఉంటున్న మాకు సొంతిల్లు రావడం కలలాగానే అనిపిస్తున్నది.
– సల్మాబేగం, బోరబండ, హైదరాబాద్‌

కేసీఆర్‌ పుణ్యం కట్టుకున్నడు

పాతబస్తీల 30 ఏండ్లుగా కిరాయికి ఉంటున్నం. నాకు ఏడుగురు పిల్లలు. పిల్లల పెండ్లిలు మొత్తం కిరాయి ఇంట్లోనే చేసిన. బట్టలు కుట్టి ప్రతి నెలా కిరాయి కడుతున్న. ఎన్నో ఏండ్లుగా సొంత ఇల్లు ఉండాలని ఆ అల్లాను కోరుకున్నం. అర్జీ పెట్టుకున్నా ఏనాడు మాకు ఇల్లు రాలేదు. ఏ పార్టీ అయినా ఓట్లు వేయించుకున్నాయి. కానీ మా బతుకులను పట్టించుకోలేదు. ఇన్నాళ్లుకు సీఎం కేసీఆర్‌ మాకు సొంత ఇల్లు ఇచ్చి పుణ్యం కట్టుకున్నడు. సొంతిటి కల నేరవేరింది. చాలా సంతోషంగా ఉన్నం.
– ఫాతిమా బేగం (పూల్‌బాగ్‌)

మా తల్లిదండ్రుల కల

మా అమ్మపేరిట డబుల్‌ బెడ్‌రూం ఇల్లు మంజూరు కావడం సంతోషంగా ఉన్నది. ఈ అనందాన్ని ఎక్స్‌ప్లెయిన్‌ చేయలేకపోతున్న. సొంతిల్లు అనేది మా తల్లిదండ్రుల కల. అది ఇప్పుడు నెరవేరడం చెప్పలేని ఆనందాన్ని ఇస్తున్నది. సీఎం కేసీఆర్‌ సార్‌కు కృతజ్ఞతలు.
-కల్యాణి, లబ్ధిదారు, కూతురు

ఊహించని బహుమతి

డబుల్‌ బెడ్‌రూం రావడం కలలో కూడా ఊహించని బహుమతి. అద్దె ఇంట్లో ఉంటూ జీవనం గడుపుతున్న మాకు సీఎం కేసీఆర్‌ సార్‌ ఆ బాధను తప్పించారు. డబుల్‌ బెడ్‌రూంకు దరఖాస్తు చేసుకునేటప్పుడు వస్తదో, రాదో అనుకున్నం. కానీ ఇంటి సర్టిఫికెట్‌ను అందుకోవడం జీవితంలో మరువలేని అనుభూతిని పొందుతున్నం.
– మల్తుంకార్‌ దీపిక

పిల్లల భవిష్యత్తు కోసం సీఎం కేసీఆర్‌ను గెలిపిద్దాం

నేను కొన్నేండ్లుగా కిరాయికి ఉంటున్నా. నాకు డబుల్‌ బెడ్‌రూం ఇల్లు వచ్చింది. ప్రభుత్వం పేదలకు డబుల్‌ బెడ్‌రూం ఇండ్లను అన్ని సౌకర్యాలతో కట్టించి ఇవ్వడం సంతోషంగా ఉన్నది. ఏండ్లుగా ఎదురుచూస్తున్న సొంతింటి కల నెరవేరింది. ఈ ప్రభుత్వం హయాంలో సంతోషంగా ఉన్నాం. మన భవిష్యత్తు, పిల్లల భవిష్యత్తు బాగుండాలంటే మరోమారు సీఎం కేసీఆర్‌ను గెలిపించుకుందాం. మన అందరి భవిష్యత్తు కేసీఆర్‌ చేతిలో పెడితే బంగారు భవిష్యత్తు ఉంటుంది. దానం నాగేందర్‌ అన్న మా కుటుంబ సభ్యుని లాంటి వారు. మా సమస్యలన్నీ తెలుసుకుని వెంటనే పరిష్కరిస్తారు. మంత్రి హరీశ్‌రావు, తలసాని శ్రీనివాస్‌, దానం నాగేందర్‌కు ధన్యవాదాలు.
-నిఖిత, ఖైరతాబాద్‌