నిరుద్యోగుల గొంతుకైన ‘నమస్తే తెలంగాణ’

బాధితులు, కష్టజీవులు, సామాన్యుల పక్షాన నిలబడే ‘నమస్తే తెలంగాణ’ గ్రూప్‌-1 విషయంలో నిరుద్యోగుల గొంతుకైంది. నిరుద్యోగులకు జరుగుతున్న అన్యాయాన్ని ఎలుగెత్తింది. లొసుగులను బయటపెట్టింది.

• గ్రూప్‌ -1 పరీక్షల్లో లొసుగుల వెలికితీత
• ఫలితాల వెల్లడి తర్వాత పరిశోధనాత్మక కథనాలు
• ఫలితంగా లీగల్‌ నోటీసులు పంపించిన టీజీపీఎస్సీ
• ఇప్పుడు హైకోర్టుకూ నోటీసులిస్తారా?

హైదరాబాద్‌, సెప్టెంబర్‌ 10 (నమస్తే తెలంగాణ): బాధితులు, కష్టజీవులు, సామాన్యుల పక్షాన నిలబడే ‘నమస్తే తెలంగాణ’ గ్రూప్‌-1 విషయంలో నిరుద్యోగుల గొంతుకైంది. నిరుద్యోగులకు జరుగుతున్న అన్యాయాన్ని ఎలుగెత్తింది. లొసుగులను బయటపెట్టింది. అక్రమాలను వెలికితీసింది. వరుస కథనాలతో గ్రూప్‌-1 మెయిన్స్‌లో జరిగిన తప్పిదాలను వెలుగులోకి తీసుకొచ్చింది. నిరుద్యోగుల వాదనలను బలంగా వినిపించింది. గ్రూప్‌-1 జనరల్‌ ర్యాంకింగ్‌ లిస్టు (జీఆర్‌ఎల్‌) విడుదలైన తర్వాత వరుసగా పరిశోధనాత్మక కథనాలను ప్రచురించింది. ఎప్పటికప్పుడు నిరుద్యోగుల గొంతుకగామారి, వారి వాదనలను ప్రజల్లోకి తీసుకెళ్లింది. ప్రధాన స్రవంతి మరే పత్రిక కానీ, మీడియా కానీ ఈ సాహసం చేయలేదు. ఒక్క ‘నమస్తే తెలంగాణ’ మాత్రమే నిరుద్యోగుల పక్షాన నిలిచింది. ఇక జీఆర్‌ఎల్‌ విడుదల తర్వాత అనేక లొసుగులు పొడచూపాయి. వాటిని పక్కా వివరాలతో ‘నమస్తే తెలంగాణ’ మాత్రమే ప్రచురించింది.

• ఈ ఏడాది మార్చి 10న గ్రూప్‌-1 ఫలితాలను టీజీపీఎస్సీ విడుదల చేసింది. తెలుగు మీడియం వారికి అన్యాయం జరిగిందని, తెలుగులో రాసిన వారికి తక్కువ మార్కులేశారని, ఇంగ్లిష్‌ మీడియం వారికి ఎక్కువ మార్కులేశారన్న ఆరోపణలొచ్చాయి. రీ వాల్యుయేషన్‌ చేయించాలని అభ్యర్థులు డిమాండ్‌ చేశారు. తెలుగు మీడియం అభ్యర్థులకు అన్యాయం జరిగిన విషయాన్ని ‘నమస్తే తెలంగాణ’ వెలుగులోకి తీసుకొచ్చింది.
• గ్రూప్‌-1 ఫలితాల వెల్లడిలో భాగంగా టాపర్ల వివరాలను టీజీపీఎస్సీ ప్రకటించలేదు. కేవలం అభ్యర్థుల లాగిన్‌ ఐడీతో ఎవరికి వారుగా సొంతంగా మార్కులు తెలుసుకునే అవకాశం కల్పించింది. టాపర్ల వివరాలపై ఆరా తీస్తే ఇప్పుడే ఇవ్వలేం.. రీ కౌంటింగ్‌ తర్వాత వివరాలిస్తామని కమిషన్‌ చెప్పింది. మరోవైపు, రీకౌంటింగ్‌కు దరఖాస్తులు స్వీకరిస్తూనే మార్చి 13న టాప్‌-100లో 59 మంది పురుషులు, 41 మంది స్త్రీలు ఉన్నట్టు కమిషన్‌ వెల్లడించింది. టాప్‌-500లో 296 మంది పురుషులు, 204 మంది మహిళలున్నట్టు ప్రకటించింది. కులాల వారీగా వివరాలను సైతం కమిషన్‌ ప్రకటించింది. రీ కౌంటింగ్‌కు ముందు టాపర్ల వివరాలను ఎలా ప్రకటిస్తారని ‘నమస్తే తెలంగాణ’ ప్రశ్నించింది.
• టాపర్ల జాబితాలో కేవలం రెండు సెంటర్ల నుంచే 74 మంది ఉన్నారు. మొత్తం 46 సెంటర్లు ఏర్పాటుచేయగా, 10-15 సెంటర్ల నుంచి మాత్రమే టాపర్లున్నారు. మిగతా సెంటర్ల నుంచి ఒక్కరంటే ఒక్కరు కూడా లేరు. టాప్‌ వెయ్యి మందిలో మూడు సెంటర్ల నుంచి ఒక్కరంటే ఒక్కరు కూడా లేరు. ఒక సెంటర్‌ నుంచి 970-950 మంది రాస్తే టాప్‌-500లో ఒక్కరూ లేకపోవడం గమనార్హం. ఈ విషయాన్ని ‘నమస్తే తెలంగాణ’నే బయటపెట్టింది.
• టీజీపీఎస్సీ మార్కుల రీకౌంటింగ్‌కు అవకాశానిచ్చింది. తొమ్మిది వేల మంది పేపర్‌కు వెయ్యి రూపాయలు చెల్లించి దరఖాస్తు చేసుకున్నారు. కేవలం ఆరు రోజుల్లోనే తొమ్మిది వేల పేపర్లను ఎలా రీ కౌంటింగ్‌ చేస్తారని ‘నమస్తే తెలంగాణ’ ప్రశ్నించింది.
• ఒకే గదిలో పరీక్ష రాసిన వారిలో టాపర్లుండటాన్ని కూడా ‘నమస్తే తెలంగాణ’ వెలుగులోకి తీసుకొచ్చింది. 591,593,594 హాల్‌టికెట్‌ నంబర్‌ గల అభ్యర్థులకు వరుసగా 506,481,510 మార్కులొచ్చాయి. ఇలా ఒకరు కాదు ఇద్దరు కాదు.. వందలాది మందికి జరిగింది. ఈ తప్పిదాలను ‘నమస్తే తెలంగాణ’ ఆధారాలు సహా బయటపెట్టింది. మధ్యలో ఒక హాల్‌టికెట్‌ నంబర్‌ వదిలి వేస్తే మిగిలిన ఇద్దరికి సేమ్‌ మార్కులొచ్చాయి. 563,565 హాల్‌టికెట్‌ నంబర్‌ అభ్యర్థులిద్దరికీ 348.5 మార్కులొచ్చాయి. ఇలా వందలాది మందికి మార్కులేశారు.
• గ్రూప్‌-1 మెయిన్స్‌లో ఒకే మార్కు వచ్చిన వారు వేల మంది ఉన్నారు. పక్కపక్క బెంచీల్లో రాసిన 654 మందికి సేమ్‌ మార్కులొచ్చాయి. మధ్యలో ఒకరిని మినహాయించి సేమ్‌ మార్కులొచ్చినవారు 702 మంది ఉన్నారు. మధ్యలో ఇద్దరిని మినహాయించి సేమ్‌ మార్కులొచ్చిన వారు 64 మంది, మధ్యలో ముగ్గురిని మినహాయించి సేమ్‌ మార్కులొచ్చిన వారు 52 మంది ఉన్నారు. ఇలాంటి వివరాలను ‘నమస్తే తెలంగాణ’ వెలుగులోకి తెచ్చింది.

మరిప్పుడు.. హైకోర్టుకు లీగల్‌ నోటీసులిస్తారా?

గ్రూప్‌-1 మెయిన్స్‌ స్కాం ఒక్కొక్కటిగా బయటికిరావడంతో టీజీపీఎస్సీ ఉక్కిరిబిక్కిరయ్యింది. సందర్భం చిక్కిన ప్రతిసారీ నిరుద్యోగుల నోరు మూయించాలని ప్రయత్నించింది. నిరుద్యోగులకు అండగా ఉన్న వారందరిపైనా లీగల్‌ నోటీసులు, పరువునష్టం దావా పేరిట బెదిరింపులకు దిగింది. వాస్తవానికి అభ్యర్థుల్లోని అనుమానాలను, సందేహాలను నివృత్తిచేయాల్సిన బాధ్యతాయుతమైన స్థానంలో ఉన్న సంస్థ అలా చేయలేదు. ఆఖరుకు ఒక వివరణను పంపించింది. ఇది కూడా ‘నమస్తే తెలంగాణ’ కథనాల్లో ప్రస్తావించిన అంశాలపై వివరణ ఇవ్వకుండా ఇతర అంశాలతో సమర్ధించుకునేందుకు ప్రయత్నించింది. తప్పులు, తప్పిదాలను కప్పిపుచ్చే ప్రయత్నం చేసింది.

గ్రూప్‌-1 అక్రమాలపై మాట్లాడినందుకు హుజూరాబాద్‌ ఎమ్మెల్యే పాడి కౌశిక్‌రెడ్డిపై పోలీసులు ఎస్సీ, ఎస్టీ అట్రాసిటీ కేసు పెట్టారు. తెలంగాణభవన్‌లోకి వచ్చి పోలీసులు ‘సీన్‌ ఆఫ్‌ అఫెన్స్‌’ చేసేందుకు ప్రయత్నించారు. ఆఖరుకు పోలీసులను ప్రశ్నిస్తే వెనక్కి తగ్గారు. బీఆర్‌ఎస్‌ నేత రాకేశ్‌రెడ్డికి కమిషన్‌ ఏకంగా లీగల్‌ నోటీసు పంపించింది. పరువునష్టం నోటీసులు పంపించింది. పోటీ పరీక్షల శిక్షకుడు అశోక్‌కుమార్‌పై కేసుపెట్టింది. కోర్టు నోటీసులు జారీచేశారు. కోటి రూపాయల పరువునష్టం దావా వేశారు. లీగల్‌ నోటీసులతో భయపెట్టాలని చూసిన కమిషన్‌కు హైకోర్టు తీర్పుతో శృంగభంగం అయ్యింది. మరీ కమిషన్‌ ఇప్పుడేమంటది? హైకోర్ట్‌కు కూడా లీగల్‌ నోటీసులిస్తుందా? పరువునష్టం దావా వేస్తుందా? అన్న ప్రశ్నలు నిరుద్యోగుల నుంచి వస్తున్నాయి. మొత్తంగా హైకోర్టు తీర్పు నిరుద్యోగులకు ఊరటనిచ్చింది.