Group-1 Mains | హైకోర్టులో పెండింగ్‌లో కేసులు.. గ్రూప్‌ 1 మెయిన్స్‌ పరీక్షలు ఆపండి!

‘గ్రూప్‌ 1పై 14కు పైగా కేసులు హైకోర్టులో పెండింగ్‌లో ఉన్నాయి. అక్టోబర్‌ 21 నుంచి 27 వరకు మెయిన్స్‌ పరీక్షలు ఉన్నాయి. పరీక్షల అనంతరం కోర్టు తీర్పులొస్తే ఎలా అమలు చేస్తారు. అందుకే తీర్పుల అనంతరమే పరీక్షలు నిర్వహించాలి’ అని అభ్యర్థులు కోరుతున్నారు.

• గ్రూప్‌-1పై హైకోర్టులో 14కు పైగా కేసులు
• కేసులు తేలాకే నిర్వహించాలి
• మెయిన్స్‌ తర్వాత తీర్పులొస్తే అమలు ఎలా?
• రాష్ట్ర ప్రభుత్వానికి అభ్యర్థుల వినతి
• ఎన్టీఆర్‌ స్టేడియంలో సమావేశం
• హైకోర్టు సీజే అలోక్‌ అరాధేకు లేఖలు రాయాలని నిర్ణయం

Group-1 Mains | హైదరాబాద్‌, సెప్టెంబర్‌ 21 (నమస్తే తెలంగాణ): ‘గ్రూప్‌ 1పై 14కు పైగా కేసులు హైకోర్టులో పెండింగ్‌లో ఉన్నాయి. అక్టోబర్‌ 21 నుంచి 27 వరకు మెయిన్స్‌ పరీక్షలు ఉన్నాయి. పరీక్షల అనంతరం కోర్టు తీర్పులొస్తే ఎలా అమలు చేస్తారు. అందుకే తీర్పుల అనంతరమే పరీక్షలు నిర్వహించాలి’ అని అభ్యర్థులు కోరుతున్నారు. కేసులు కొలిక్కి వచ్చేవరకు పరీక్షలను నిర్వహించొద్దని కోరుతున్నారు. ఈ అంశంపై శుక్రవారం అభ్యర్థులు ఎన్టీఆర్‌ స్టేడియంలో పెద్ద ఎత్తున సమావేశమయ్యారు. తమకు న్యాయం చేయాలని కోరుతూ సంతకాలు సేకరించి హైకోర్టు చీఫ్‌ జస్టీస్‌ అలోక్‌ అరాధేకు విన్నవించుకోవాలని అభ్యర్థులు నిర్ణయించారు. గ్రూప్‌-1పై పెండింగ్‌లో ఉన్న కేసులు హైకోర్టు ధర్మాసనం ముందు విచారణ జరుగుతుండగా పరీక్షలెలా నిర్వహిస్తారని అభ్యర్థులు అభ్యంతరం తెలుపుతున్నారు.

ఒకవేళ మెయిన్స్‌ పరీక్షలు నిర్వహించిన తర్వాత తీర్పులొస్తే అమలు ఎలా అంటూ ప్రశ్నల వర్షం కురిపిస్తున్నారు. ఈ ఏడాది జూన్‌ 9న జరిగిన గ్రూప్‌-1 ప్రిలిమ్స్‌ పరీక్షకు 3.02 లక్షల మంది హాజరయ్యారు. వీరిలో మెయిన్స్‌ పరీక్షలకు 31,382 మంది అర్హత సాధించారు. వీరికి అక్టోబర్‌ 21 నుంచి 27 వరకు మెయిన్స్‌ పరీక్షలను నిర్వహించాల్సి ఉన్నది. గ్రూప్‌-1పై ప్రస్తుతం పలు కేసులు హైకోర్టులో విచారణ జరుగుతున్నాయి. హారిజాంటల్‌ రిజర్వేషన్లపై వేసిన పిటిషన్‌ నవంబర్‌ 7న, ఫైనల్‌ కీపై, జీవో-29పై వేసిన కేసులు ఈ నెల 27 విచారణకు రానున్నాయి. స్థానికతపై వేసిన పిటిషన్‌ కేసు అక్టోబర్‌ 3న విచారణకు రానున్నది. ఆయా కేసులు తేలాకే మెయిన్స్‌ పరీక్షలను నిర్వహించాలన్నది అభ్యర్థుల ప్రధాన డిమాండ్‌.

గ్రూప్‌-1పై వివిధ కేసుల వివరాలు?

• ప్రాథమిక కీపై 1,712 మంది అభ్యర్థుల నుంచి 6,417 అభ్యంతరాలు వచ్చాయి. నిపుణుల కమిటీ సూచనల మేరకు మాస్టర్‌ క్వశ్చన్‌ పేపర్‌లో 56, 59 ప్రశ్నలను తొలగించారు. 115వ ప్రశ్నకు సమాధానంగా ఆప్షన్‌ 2 నుంచి 1 సరైన సమాధానంగా మార్చారు. అయితే అభ్యర్థులు మొత్తం 13 ప్రశ్నల సమాధానాలపై అభ్యంతరాలు లేవదీశారు. 35, 41, 45, 59, 64, 66, 67, 79, 95, 106, 116, 119, 139వ ప్రశ్నలపై అభ్యంతరాలను వ్యక్తంచేస్తూ కోర్టులో పిటిషన్‌ను దాఖలు చేశారు. ఈ అంశంపై కోర్టులో విచారణ జరుగుతున్నది.
• గ్రూప్‌-1 నోటిఫికేషన్‌లో తొలుత 503 పోస్టులను విడుదల చేయగా, కొత్తగా వచ్చిన రేవంత్‌రెడ్డి సర్కారు మరో 60 పోస్టులను కలిపి కొత్త నోటిఫికేషన్‌ను జారీచేసింది. దీంతో కొత్తగా 1.71 లక్షల మంది రెండోసారి దరఖాస్తు చేసుకున్నారు. దీనిపై అభ్యర్థులు అభ్యంతరం వ్యక్తంచేస్తున్నారు. తొలుత దరఖాస్తు చేసిన వారికి 503, రెండోసారి నోటిఫికేషన్‌ జారీచేసిన 60 పోస్టులకు కొత్త, పాత వారందరికీ వర్తింపజేయాలని హైకోర్టును ఆశ్రయించారు.
• జీవో 29ని సవాల్‌ చేస్తూ మరో కేసు కోర్టులో నడుస్తున్నది. ట్రాన్స్‌జెండర్లకు రిజర్వేషన్ల వర్తింపు సహా పలు రిజర్వేషన్లపై వివిధ కేసులు ఉన్నాయి. జీవో 55 కేసుపై తుది తీర్పు రానేలేదు.
• ఎస్టీ రిజర్వేషన్లు 6 నుంచి 10 శాతానికి పెంచడంపైనా కోర్టులో కేసు నడుస్తున్నది. ఈ అంశంపై అక్టోబర్‌ 14న తీర్పు వచ్చే అవకాశం ఉన్నది.
• పాత నోటిఫికేషన్‌ను రద్దు చేసే అవకాశం లేదని, ఎలా రద్దు చేస్తారని అభ్యంతరం వ్యక్తం చేస్తూ కోర్టులో మరో కేసు వేశారు.
• మొత్తం పోస్టులకు కాకుండా ఓపెన్‌ క్యాటగిరీ పోస్టుల్లోనే 10 శాతం ఈడబ్ల్యూఎస్‌ రిజర్వేషన్‌ను వర్తింపజేయాలని హైకోర్టులో కేసు నడుస్తున్నది. మధ్యప్రదేశ్‌ హైకోర్టు సింగింగ్‌ బెంచ్‌ ఇదే తీర్పు ఇవ్వగా ఈ తీర్పును మన రాష్ట్రంలోనూ అమలు చేయాలని అభ్యర్థులు పిటిషన్‌ దాఖలు చేశారు.
• స్పోర్ట్స్‌ కోటా పోస్టులకు జాతీయస్థాయిలో ఆడిన క్రీడాకారులను సైతం అనుమతించాలని ఇటీవలే హైకోర్టు తీర్పునిచ్చింది. ఈ పోస్టులకు 198 మందిని పికప్‌ చేయాల్సి ఉండగా, 8 వేల మంది సర్టిఫికెట్లు వెరిఫికేషన్‌ చేసుకోవాల్సి ఉంటుంది. ఇది ఇప్పట్లో సాధ్యమా? అని అభ్యర్థులు ప్రశ్నిస్తున్నారు.