కేంద్రంపై సమరమే

ప్రజావ్యతిరేక విధానాలను అవలంబిస్తున్న కేంద్రంలోని బీజేపీ ప్రభుత్వంపై సీఎం కేసీఆర్‌ సమరశంఖాన్ని పూరించనున్నారు. దేశంలో ప్రమాదంలో పడుతున్న ఫెడరల్‌, సెక్యులర్‌, ప్రజాస్వామిక విలువలను కాపాడాలనే తన ప్రయత్నాలకు మరింత పదును పెడుతున్నారు. దేశాన్ని ఆర్థిక సంక్షోభంలోకి నెట్టివేస్తున్న కేంద్రం వైఖరిని తేటతెల్లం చేసేందుకు కసరత్తు చేస్తున్నారు

• అప్రజాస్వామిక విధానాలపై పోరాటం
• పార్లమెంట్‌ వేదికగా రణగర్జనకు ప్లాన్‌
• సమాఖ్య, లౌకిక, ప్రజాస్వామ్య విలువలను కాపాడే ప్రయత్నాలకు మరింత పదును
• కలిసొచ్చే విపక్ష పార్టీలతో సమన్వయం
• పలు రాష్ర్టాల ముఖ్యమంత్రులు, విపక్ష నేతలతో ఫోన్‌లో సీఎం కేసీఆర్‌ చర్చలు
• దేశవ్యాప్తంగా భారీ నిరసనలకు పిలుపు!
• కేంద్రప్రభుత్వం అసలు స్వరూపాన్ని నగ్నంగా నడిబజారులో నిలబెట్టే ప్రణాళిక
• నేడు టీఆర్‌ఎస్‌ ఎంపీలతో కేసీఆర్‌ భేటీ
• 18 నుంచి ప్రారంభమయ్యే పార్లమెంట్‌ సమావేశాల్లో అనుసరించే తీరుపై దిశానిర్దేశం
• సభల్లో కేంద్రాన్ని నిలదీయాలని సూచన!
• బీజేపీని దోషిగా నిలబెట్టాలని మార్గదర్శనం!

ప్రజావ్యతిరేక విధానాలను అవలంబిస్తున్న కేంద్రంలోని బీజేపీ ప్రభుత్వంపై సీఎం కేసీఆర్‌ సమరశంఖాన్ని పూరించనున్నారు. దేశంలో ప్రమాదంలో పడుతున్న ఫెడరల్‌, సెక్యులర్‌, ప్రజాస్వామిక విలువలను కాపాడాలనే తన ప్రయత్నాలకు మరింత పదును పెడుతున్నారు. దేశాన్ని ఆర్థిక సంక్షోభంలోకి నెట్టివేస్తున్న కేంద్రం వైఖరిని తేటతెల్లం చేసేందుకు కసరత్తు చేస్తున్నారు.

హైదరాబాద్‌, జూలై 15 (నమస్తే తెలంగాణ): బీజేపీ అప్రజాస్వామిక విధానాలను ఖండిస్తూ దేశవ్యాప్తంగా నిరసనలతో కేంద్రం అసలు స్వరూపాన్ని నగ్నంగా నడిబజారులో నిలబెట్టేందుకు సీఎం కేసీఆర్‌ ప్రణాళిక రచిస్తున్నారు. పార్లమెంట్‌ సమావేశాలను వేదికగా చేసుకొని కలిసివచ్చే అన్నిరాష్ట్రాల విపక్ష పార్టీలతో సమన్వయం చేసుకొంటూ బీజేపీ దమననీతిపై పోరాటానికి సిద్ధమవుతున్నారు. ఈ నేపథ్యంలోనే దేశంలోని పలురాష్ట్రాల విపక్ష నేతలతో ఫోన్‌లో చర్చలు మొదలుపెట్టారు. శుక్రవారం పలువురు ముఖ్యమంత్రులతో మాట్లాడారు. జాతీయస్థాయి నేతలతోనూ చర్చలు కొనసాగించారు. శుక్రవారం ఉదయం నుంచి పశ్చిమబెంగాల్‌ సీఎం మమతా బెనర్జీ, ఢిల్లీ ముఖ్యమంత్రి అరవింద్‌ కేజ్రీవాల్‌, తమిళనాడు ముఖ్యమంత్రి స్టాలిన్‌ సన్నిహితులతో, బీహార్‌లో ఆర్జేడీ నేత తేజస్వీయాదవ్‌తో, యూపీ ప్రతిపక్షనేత అఖిలేశ్‌యాదవ్‌తో, ఎన్సీపీ అధినేత శరద్‌ పవార్‌ సహా ఇతర జాతీయ విపక్ష నేతలతో సీఎం కేసీఆర్‌ స్వయంగా ఫోన్‌లో మాట్లాడారు. కేంద్రంపై చేస్తున్న ప్రజాస్వామిక పోరాటంలో భాగంగా సీఎం కేసీఆర్‌ ప్రతిపాదనలకు పలురాష్ట్రాల ముఖ్యమంత్రులు, ప్రధాన ప్రతిపక్ష నేతలు సానుకూలంగా స్పందిస్తున్నారు. వరదల నుంచి రాష్ట్రాన్ని కాపాడేందుకు మంత్రులు, అధికార యంత్రాంగానికి ఆదేశాలు ఇస్తూనే, బీజేపీ అప్రజాస్వామిక విధానాల విపత్తు నుంచి దేశాన్ని కాపాడేందుకు పార్లమెంట్‌ వేదికలపై పోరాటానికి శ్రేణులను సీఎం కేసీఆర్‌ సిద్ధం చేస్తున్నారు.

పార్లమెంటు ఉభయసభల్లో తీవ్ర నిరసనలు
కేంద్ర ప్రభుత్వం అనుసరిస్తున్న ప్రజావ్యతిరేక విధానాలపై పోరాడాలని ఎంపీలకు సీఎం కేసీఆర్‌ పిలుపు ఇవ్వనున్నారు. లోక్‌సభ, రాజ్యసభల్లో టీఆర్‌ఎస్‌ ఎంపీలు ప్రస్తావించాల్సిన కీలక అంశాలు, కేంద్రాన్ని నిలదీసే అంశాలపై సీఎం కేసీఆర్‌ దిశానిర్దేశం చేయనున్నారు. 18 నుంచి ప్రారంభంకానున్న పార్లమెంటు సమావేశాల నేపథ్యంలో ఉభయ సభల్లో అనుసరించాల్సిన విధివిధానాలపై దిశానిర్దేశం చేసేందుకు టీఆర్‌ఎస్‌ ఎంపీలతో శనివారం మధ్యాహ్నం ఒంటిగంటకు ప్రగతిభవన్‌లో సీఎం కేసీఆర్‌ సమావేశం అవుతున్నారు. ముఖ్యంగా తెలంగాణకు అన్ని రంగాల్లో నష్టం చేసేలా కేంద్రం అనుసరిస్తున్న రాష్ట్ర వ్యతిరేక విధానాలను దనుమాడుతూ పార్లమెంటు ఉభయసభల్లో తీవ్ర నిరసన తెలిపి పార్లమెంటు వేదికగా పోరాడాలని ఎంపీలకు దిశానిర్దేశం చేయనున్నారు.

• ఆర్థిక క్రమశిక్షణను పాటిస్తూ అనతికాలంలో అభివృద్ధి పథంలో పయనిస్తున్న తెలంగాణను కేంద్రం ప్రోత్సహించాల్సింది పోయి, ఆర్థికంగా అనేక ఇబ్బందులకు గురిచేస్తున్నది. కుటిల ప్రయత్నాలు చేస్తున్న కేంద్రంలోని బీజేపీ ప్రభుత్వాన్ని ఉభయసభల్లో దోషిగా నిలబెట్టాలని ఎంపీలకు సీఎం కేసీఆర్‌ సూచించనున్నట్టు తెలిసింది.
• వ్యవసాయం, సాగునీరు, వ్యవసాయ అనుబంధ రంగాల్లో ప్రభుత్వం చేపట్టిన విప్లవాత్మక కార్యాచరణతో అనతికాలంలోనే అంచనాలను మించి ధాన్యం ఉత్పత్తిలో దేశంలోనే తెలంగాణ ముందంజలో నిలిచింది. తెలంగాణ రైతులు పండించిన ధాన్యాన్ని కొనుగోలు చేయకుండా, రైతులను, మిల్లర్లను, ప్రభుత్వాన్ని తీవ్ర ఇబ్బందులకు గురిచేస్తున్న కేంద్ర ప్రభుత్వ రైతు వ్యతిరేక విధానాలపై పోరాడాలని ఎంపీలకు, సీఎం పిలుపునివ్వనున్నట్టు సమాచారం.
• గ్రామీణ ఉపాధి హామీ పథకాన్ని పటిష్ఠంగా అమలుచేస్తున్న తెలంగాణ విషయంలో కేంద్రం ద్వంద్వ వైఖరిని, దుర్మార్గ విధానాన్ని నిలదీయాలని సీఎం నిర్ణయించారు. తెలంగాణలో ఉపాధి హామీ గొప్పగా అమలు జరుగుతున్న తీరును గుర్తిస్తూ, రాష్ట్రంలో సోషల్‌ ఆడిట్‌ను కేంద్రం పలుమార్లు ప్రశంసించి, అవార్డులు ఇచ్చింది. కానీ, నేడు కేంద్ర ప్రభుత్వం మాట మార్చి విరుద్ధంగా వ్యవహరిస్తున్నది. ఉపాధి హామీ అమలులో ఉద్దేశపూర్వకంగా ఇబ్బందులకు గురిచేయాలనే కేంద్రం కుట్రపూరిత ధోరణులపై పార్లమెంటు వేదికగా నిలదీయాలని ఎంపీలకు సీఎం కేసీఆర్‌ సూచించనున్నారు.
• ఇతర రంగాలతోపాటు ఆర్థికరంగంలో కూడా కేంద్రం అనుసరిస్తున్న అసంబద్ధ విధానాలతో రోజురోజుకూ దేశ ఆర్థిక వ్యవస్థ పతనమవుతున్నదని ఆర్థికవేత్తలు ఆందోళన వ్యక్తం చేస్తున్నారు. క్షీణిస్తున్న రూపాయి విలువే అందుకు నిదర్శనం. దేశ అభివృద్ధి సూచీలు పాతాళానికి పడిపోతున్న ప్రమాదకర పరిస్థితుల్లో.. దేశాన్ని ఆర్థిక సంక్షోభం బారిన పడకుండా కాపాడుకోవాల్సిన బాధ్యత పౌరులుగా తెలంగాణ ప్రజలకున్నదని సీఎం కేసీఆర్‌ భావిస్తున్నారు. అందులో భాగంగా ప్రజాభిప్రాయం ప్రతిబింబించేలా రూపాయి పతనంపై కేంద్రాన్ని ఉభయసభల సాక్షిగా నిలదీయాలని ఎంపీలకు సీఎం కేసీఆర్‌ చెప్పనున్నారు.
• ప్రజాస్వామిక విలువలు దిగజారుతున్న పరిస్థితులతోపాటు పాలనలోనే కాకుండా రాజకీయ, సామాజిక తదితర అన్నిరంగాల్లో కేంద్రం అనుసరిస్తున్న అప్రజాస్వామిక ఆధిపత్య ధోరణితో దేశంలో రోజురోజుకూ ప్రజాస్వామిక విలువలు దిగజారుతున్నాయి. పరమత సహనం, శాంతి, సౌభ్రాతృత్వం పరిఢవిల్లాల్సిన దేశంలో అశాంతి ప్రబలే ప్రమాదం పెరుగుతున్నది. రాజ్యాంగంలో పొందుపరిచిన ఫెడరల్‌ స్ఫూర్తికి, లౌకిక జీవన విధానానికి.. కేంద్రంలోని బీజేపీ ప్రభుత్వం అనుసరిస్తున్న దుర్మార్గ విధానాలు గొడ్డలిపెట్టుగా మారుతున్నాయి. ఈ నేపథ్యంలో కేంద్రంలోని బీజేపీ ప్రభుత్వ అప్రజాస్వామిక విధానాలను నిరసిస్తూ పార్లమెంట్‌ వేదికగా దేశ ప్రజల ఆకాంక్షలను చాటేలా గొంతు విప్పాలని, టీఆర్‌ఎస్‌ ఎంపీలకు సీఎం కేసీఆర్‌ దిశానిర్దేశం చేయనున్నారు.
• కేంద్రం అనుసరిస్తున్న ప్రజా వ్యతిరేక విధానాలపై టీఆర్‌ఎస్‌ చేస్తున్న పోరాటంలో భాగంగా కలిసివచ్చే ఇతర రాష్ట్రాల విపక్ష ఎంపీలను కలుపుకొనిపోతూ, కేంద్రం మెడలు వంచి ప్రజాస్వామిక విలువలు కాపాడాల్సి ఉన్నదని సీఎం కేసీఆర్‌ అభిప్రాయపడుతున్నారు. ఈ నేపథ్యంలో దేశ ప్రజల తరఫున టీఆర్‌ఎస్‌ రాజ్యసభ, లోక్‌సభ ఎంపీలు పార్లమెంటు ఉభయ సభల్లో బీజేపీ కేంద్ర ప్రభుత్వ అసంబద్ధ విధానాలను నిలదీస్తూ గళం విప్పాలని సీఎం కేసీఆర్‌ పిలుపునివ్వనున్నారు.