Harish Rao | తెలంగాణకు ధోకా చేసినవ్‌.. భారత్‌ను మోసగిస్తున్నవ్‌: హరీశ్‌రావు

‘రుణమాఫీపై తెలంగాణలో చేసిన మోసాన్ని దేశమంతా చేయాలని కాంగ్రెస్‌ సిద్ధపడుతున్నది.. రుణమాఫీ అమలు చేయకున్నా చేసినట్టు పోజులు కొట్టుకోవడం దుర్మార్గం’ అంటూ మాజీ మంత్రి హరీశ్‌రావు మండిపడ్డారు.

• రైతులను నిండా ముంచి.. దేశాన్నే వంచించి
• రుణమాఫీపై ముఖ్యమంత్రి రేవంత్‌కు హరీశ్‌ ఘాటు లేఖ
• రుణమాఫీ అమలు చేయకున్నా చేసినట్టు పోజులు కొట్టడం దుర్మార్గం
• కాంగ్రెస్‌ నిలువునా తప్పుల చిట్టా.. రైతులపట్ల ఆ పార్టీది పచ్చిమోసం
• 2 లక్షల్లోపు మాఫీయే శుద్ధ అబద్ధం.. ఇకనైనా మాట నిలబెట్టుకోండి
• సీఎంకు హరీశ్‌ బహిరంగ లేఖ.. రుణమాఫీపై ఆధారాలతో నిలదీత
• డిసెంబర్‌ 9న రుణమాఫీ చేస్తానని ఓటర్లను మోసం చేసినవ్‌

పంద్రాగస్టున చేస్తానని ప్రజలను మోసగించినవ్‌. 31 రకాల కొర్రీలతో మాఫీ కాకుండా రైతుల్ని మోసం చేసినవ్‌. మాఫీ కాకుండానే అపోయిందని తెలంగాణను మోసగించినవ్‌. అబద్ధాలతో ఇప్పుడు దేశాన్నే మోసం చేస్తున్నవ్‌…

-సీఎంకు లేఖలో హరీశ్‌

Harish Rao | హైదరాబాద్‌, అక్టోబర్‌ 6 (నమస్తే తెలంగాణ) :‘రుణమాఫీపై తెలంగాణలో చేసిన మోసాన్ని దేశమంతా చేయాలని కాంగ్రెస్‌ సిద్ధపడుతున్నది.. రుణమాఫీ అమలు చేయకున్నా చేసినట్టు పోజులు కొట్టుకోవడం దుర్మార్గం’ అంటూ మాజీ మంత్రి హరీశ్‌రావు మండిపడ్డారు. రుణమాఫీ విషయంలో కాంగ్రెస్‌ పార్టీ దేశాన్నే తప్పుదారి పట్టిస్తున్నదని ఆయన ఆధారాలతో సహా వెల్లడించారు. ఈ మేరకు సీఎం రేవంత్‌రెడ్డికి ఆదివారం ఆయన బహిరంగ లేఖ రాశారు. రుణమాఫీ అమలుపై ప్రజలను రేవంత్‌రెడ్డి తప్పుదారి పట్టిస్తున్నారని ఆగ్రహం వ్యక్తంచేశారు. రాష్ట్రంలో కాంగ్రెస్‌ పార్టీ డొల్లతనాన్ని, మోసపూరిత వైఖరిని దేశమంతా గుర్తించాలని కోరారు. రాష్ట్ర ప్రభుత్వం ఎంతమంది రైతులకు ఎంతెం త రుణమాఫీ చేసింది? చేస్తున్న ప్రచారం ఏమిటి? వంటి విషయాలను లేఖలో ఉదహరించారు. రైతు రుణమాఫీ విషయంలో రేవంత్‌ సర్కార్‌ అనుసరిస్తున్న వైఖరిని సమాచార హక్కు చట్టం ద్వారా వెల్లడైన విషయాలను లేఖలో పేర్కొన్నారు.

రేవంత్‌రెడ్డీ.. ఇవిగో సాక్ష్యాలు..

• కాంగ్రెస్‌ పార్టీ 2023, డిసెంబర్‌ 9న పంట రుణ మాఫీ చేస్తామని హామీ ఇచ్చింది. రాహుల్‌గాంధీ కూడా తెలంగాణ రైతులకు 2023, డిసెంబర్‌ 9న పంట రుణమాఫీ పూర్తిచేస్తామని హామీ ఇచ్చారు.
• కాంగ్రెస్‌ ప్రభుత్వం ఇచ్చిన హామీని నిలబెట్టుకోలేకపోయింది. పార్లమెంట్‌ ఎన్నికల సమయంలో దాని గడువును పొడిగించింది. తెలంగాణ రైతుల నమ్మకం పొందడానికి ముఖ్యమంత్రి దైవసాక్షిగా 2024, ఆగస్టు 15 నాటికి పంట రుణమాఫీ పూర్తి చేస్తానని మరోసారి హామీ ఇచ్చారు.
• రూ.2 లక్షల వరకు రుణమాఫీ పూర్తి చేశామని ముఖ్యమంత్రి చేసిన ప్రకటన పూర్తి అవాస్తవం. 2024, సెప్టెంబర్‌ 25న నేను దాఖలు చేసిన ఆర్టీఐ ప్రకారం స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) అందించిన సమాచారం ఆధారంగా ఇది స్పష్టంగా తెలుస్తున్నది. లక్షలోపు రుణం ఉన్న రైతుల సంఖ్య 5,74,137 కాగా, 2,99,445 మంది రైతులకే రుణమాఫీ అయింది. లక్ష నుంచి 1.5 లక్షల మధ్య రుణ రైతుల సంఖ్య 2,62,341 కాగా, ఇప్పటివరకు 1,30,915 మందికే మాఫీ అయింది. రూ.1.5 లక్షల నుంచి 2లక్షల మధ్య రుణ రైతుల సంఖ్య 1,65,607 కాగా, ఇప్పటివరకు 65,231 మందికే మాఫీ అయింది. ఎస్‌బీఐ నుంచి అందిన డాటా ప్రకారం, సుమారు 5.5 లక్షల రైతులు అంటే సుమారు 50శాతం రైతుల రుణమాఫీ కాలేదు. ఇతర బ్యాంకులకూ దాదాపు ఇలాంటి పరిస్థితులే.
• రూ.2 లక్షలకు పైన ఉన్న రుణాలను రైతులు చెల్లించిన తర్వాత మాఫీ చేస్తామని ప్రకటించారు. చాలా మంది రైతులు పై మొత్తాన్ని చెల్లించారు. అయినా ఎస్‌బీఐ నివేదిక ప్రకారం రుణమాఫీ కాలేదు. దురదృష్టవశాత్తు చాలా మంది రైతులు ముఖ్యమంత్రి మాటలను నమ్మి వారి పంట రుణం మాఫీకి అర్హులు కావడానికి ప్రైవేట్‌ రుణాలను అధిక వడ్డీకి తెచ్చుకున్నారు.
• మాఫీకి 31 షరతులు పెట్టి చాలా మంది రైతులను అర్హత కోల్పోయేలా చేశారు.
• కేసీఆర్‌ ఆరేండ్లుగా రూ.72,000 కోట్లను రైతుబంధు ద్వారా రైతులకు అందించారు. కాంగ్రెస్‌ అధికారంలోకి వచ్చిన మొదటి దసరా ఇది. వానకాలం పంటకు పెట్టుబడి సాయం ఇప్పటికీ అందించలేదు. రుణమాఫీ చేసినట్టు దేశమంతా తప్పుడు ప్రచారం చేసే ముందు, రైతులకు ఇచ్చిన రుణమాఫీ హామీని పూర్తి చేయాలి.