Gruha Jyothi | ఆంక్షలు గ్యారెంటీ.. ‘గృహజ్యోతి’కి సవాలక్ష నిబంధనలు.. ‘మహాలక్ష్మి’కి కొరకరాని కొర్రీలు

Gruha Jyothi | గృహజ్యోతి పథకం పేరు గొప్ప.. ఊరు దిబ్బలా కనబడుతున్నది. గృహజ్యోతి పథకం కింద ప్రతి ఇంటికి 200 యూనిట్ల వరకు ఉచితంగా విద్యుత్తు అందిస్తామని కాంగ్రెస్‌ ప్రభుత్వం ఎంతో అట్టహాసంగా ప్రకటించుకున్నది.

• కుటుంబంలో ఒక్కరికే ‘గృహజ్యోతి’ వర్తింపు
• సొంతిల్లు లేకపోతే కరెంటు బిల్లు కట్టాల్సిందే
• కిరాయి ఇంట్లో ఉంటే జీరో బిల్లుకు దూరం
• 200 యూనిట్ల ఫ్రీ కరెంటుకు మార్గదర్శకాలు
• నగరాల్లో అత్యధికంగా ఉన్నవి కిరాయి ఇండ్లే

హైదరాబాద్‌, ఫిబ్రవరి 27 (నమస్తే తెలంగాణ): గృహజ్యోతి పథకం పేరు గొప్ప.. ఊరు దిబ్బలా కనబడుతున్నది. గృహజ్యోతి పథకం కింద ప్రతి ఇంటికి 200 యూనిట్ల వరకు ఉచితంగా విద్యుత్తు అందిస్తామని కాంగ్రెస్‌ ప్రభుత్వం ఎంతో అట్టహాసంగా ప్రకటించుకున్నది. కానీ.. మార్గదర్శకాలకు వచ్చేసరికి పేదలెవరూ ఈ పథకం కిందికి రాకుండా అడ్డుకట్ట వేసినట్టుగా కనబడుతున్నది. సొంత ఇల్లు లేనివారు, కిరాయి ఇంట్లో ఉంటున్నవారు రాష్ట్రవ్యాప్తంగా లక్షల్లో ఉంటారు.

ఇప్పుడు వీరందరూ ‘జీరో బిల్లు’కు అనర్హులని మార్గదర్శకాలు స్పష్టం చేస్తున్నాయి. తెల్లరేషన్‌ కార్డు ఉన్న ఒక కుటుంబానికి ఎన్ని విద్యుత్తు కనెక్షన్లు ఉన్నా.. అందులో ఒక్క కనెక్షన్‌కు మాత్రమే ఈ పథకం వర్తిస్తుందని ప్రభుత్వం విడుదల చేసిన మార్గదర్శకాల్లో స్పష్టంగా పేర్కొన్నది. విద్యుత్తు శాఖ లెక్కల ప్రకారం రాష్ట్రంలో 200 యూనిట్లలోపు విద్యుత్తు వాడే వినియోగదారుల సంఖ్య 1.05 కోట్లు. ఇందులో కనీసం పావుశాతం మందికి కూడా జీరో బిల్లు వస్తుందా? లేదా? అనే అనుమానాలు మొదలయ్యాయి. ఇందుకు అనేక కారణాలు ఉన్నాయి.

• తెల్లరేషన్‌ కార్డులు ఉన్నవారికి మాత్రమే పథకం వర్తిస్తుందని ప్రభుత్వం తేల్చి చెప్పింది. కాబట్టి 1.05 కోట్ల మందిలో కొంత మందికి కోత పడుతున్నట్టే.
• సొంతిల్లు లేక అద్దెకు ఉంటున్న తెల్ల రేషన్‌కార్డుదారులెవరికీ ఈ పథకం వర్తించదనే చెప్పవచ్చు. అంటే లక్షల మంది జీరో బిల్లుకు దూరం కానున్నారు.
• నగరాల్లో సొంత ఇండ్లు ఉన్నవారికంటే ఉద్యోగం కోసమో, ఉపాధి కోసమో వలస వచ్చి కిరాయికి ఉంటున్న కుటుంబాలే ఎక్కువ సంఖ్యలో ఉంటాయి. వారంతా కరెంటు బిల్లుల భారం మోయాల్సిందేనని మార్గదర్శకాలను బట్టి స్పష్టమవుతున్నది. హైదరాబాద్‌, వరంగల్‌ వంటి నగరాలతోపాటు మున్సిపాలిటీల్లోనూ ఇలాంటి పరిస్థితే ఉండనున్నది. అక్కడ సొంత ఇండ్లు ఉన్నవారికంటే అందులో కిరాయికి ఉండే కుటుంబాలే ఎక్కువగా ఉంటాయి. ఉదాహరణకు ఒక ఇంట్లో నాలుగు అంతస్థుల్లో ఎనిమిది పోర్షన్లు ఉంటే.. ఎనిమిది కనెక్షన్లు ఉంటాయి. కానీ ఒక్క కనెక్షన్‌కు మాత్రమే గృహజ్యోతి వర్తిస్తుంది. మిగతా 7 కనెక్షన్లలో ఉండే కిరాయిదారులకు తెల్లరేషన్‌ కార్డు ఉన్నా విద్యుత్తు బిల్లుల మోత తప్పదు. ఈ లెక్కన కోటి కనెక్షన్లలో దాదాపు సగం కుటుంబాలకు గృహజ్యోతి అందక కరెంటు బిల్లుల భారం తప్పదన్నమాట.
• చాలా కుటుంబాల్లో అన్నదమ్ములు వేర్వేరుగా ఉన్నా .. ఇప్పటికీ రేషన్‌కార్డు ఉమ్మడిగానే ఉన్నది. అనేక రేషన్‌ కార్డుల దరఖాస్తులు పెండింగ్‌లో ఉన్నాయి. నిబంధనలను బట్టి వీరిలో ఒక్కరికే గృహజ్యోతి అందుతుందని స్పష్టమవుతున్నది.
• చాలా కుటుంబాల్లో అన్నదమ్ముల కుటుంబాలకు వేర్వేరుగా రేషన్‌ కార్డులు ఉన్నా.. ఒకే ఇంట్లో ఉంటున్నవారు ఉన్నారు. వారిలో ఒక్క రేషన్‌కార్డుకు మాత్రమే జీరో బిల్లు వస్తుందన్నమాట.
  గృహజ్యోతి మార్గదర్శకాలు
• రాష్ట్రంలోని ప్రతి ఇంటికి ఒక కనెక్షన్‌కు ఈ పథకం వర్తిస్తుంది.
• ప్రజాపాలన లేదా ఇతర అధికారిక మార్గాల ద్వారా స్వీకరించిన దరఖాస్తుల్లో ఆధార్‌తో అనుసంధానమైన తెల్ల రేషన్‌కార్డు, గృహ విద్యుత్తు కనెక్షన్‌ నంబర్‌ ఉన్నవాటికి ఈ పథకం వర్తిస్తుంది.
• అర్హులైన ఇంటికి 200 యూనిట్ల వరకు ‘0’ బిల్లు అందజేయాలి.
• జీరో బిల్లు కోసం డిస్కంలు ప్రత్యేకంగా వినియోగదారుల పేర్లను మార్చాల్సిన అవసరం లేదు. ఇప్పుడున్న పేర్లతోనే బిల్లులు మంజూరు చేయాలి.
• డిస్కంలు జీరో బిల్లులను ప్రభత్వానికి పంపిస్తే, ప్రతి నెలా 20వ తేదీనాటికి ప్రభుత్వం ఆ రాయితీ మొత్తాన్ని డిస్కంలకు చెల్లిస్తుంది.
• గృహజ్యోతి కనెక్షన్‌ను వ్యాపార అవసరాలకు వినియోగించినట్టు తేలితే చట్ట ప్రకారం చర్యలు తీసుకుంటారు.
• ఒకవేళ ఎవరైనా అన్ని అర్హతలు ఉండి, ఈ పథకం కింద జీరో బిల్లు రాకపోతే సంబంధిత ఎంపీడీవో కార్యాలయంలో లేదా మున్సిపల్‌ కమిషనర్‌ కార్యాలయంలో లేదా సర్కిల్‌ కార్యాలయంలో సంప్రదించాలి. రేషన్‌కార్డు, విద్యుత్తు కనెక్షన్‌కు సంబంధించిన యూఎస్‌సీ వివరాలతో ప్రజాపాలన పోర్టల్‌ ద్వారా మరోసారి దరఖాస్తు చేసుకోవాలి. అధికారుల నుంచి రసీదు తీసుకోవాలి.
• పరిశీలన అనంతరం అర్హులని తేలితే.. ఆ మరుసటి నెల నుంచి జీరో బిల్లు మంజూరు చేస్తారు. అప్పటికే కట్టిన బిల్లులు తిరిగి ఇవ్వడం కుదరదు.