Telangana | కాంగ్రెస్‌ పాలనలో పంచాయతీలు నిర్వీర్యం.. కేంద్రం, ఆర్థిక సంఘం నుంచి నిలిచిన నిధులు

కాంగ్రెస్‌ పాలనలో గ్రామ పంచాయతీలు నిర్వీర్యమవుతున్నాయి. పంచాయతీలు పటిష్టంగా ఉంటేనే గ్రామ స్వరాజ్యం సిద్ధిస్తుందన్న గాంధీజీ మాటలు నీటి మూటలవుతున్నాయి. దేశానికి పట్టుగొమ్మలుగా ఉండాల్సిన పల్లెలు ప్రగతిలో పడకేశాయి. అడ్డగోలు హామీలు ఇచ్చి అధికారంలోకి వచ్చిన కాంగ్రెస్‌ నేతలు వాటిలో ఒక్కదాన్ని కూడా అమలు చేయలేకపోతున్నారు.

• ఎన్నికలు నిర్వహించకపోవడంతో కేంద్రం, ఆర్థిక సంఘం నుంచి ఆగిపోయిన నిధులు
• ఏ పనికైనా గ్రామ కార్యదర్శి సొంత సొమ్ము వెచ్చించాల్సిందే
• ఉపాధి పనిదినాలు 150కి పెంచుతామన్న కాంగ్రెస్‌ హయాంలో కనీసం 100 పనిదినాలకే దిక్కు లేదు
• నేడు పంచాయతీరాజ్‌ దినోత్సవం

Telangana | హైదరాబాద్‌, ఏప్రిల్‌ 23 (నమస్తే తెలంగాణ) : కాంగ్రెస్‌ పాలనలో గ్రామ పంచాయతీలు నిర్వీర్యమవుతున్నాయి. పంచాయతీలు పటిష్టంగా ఉంటేనే గ్రామ స్వరాజ్యం సిద్ధిస్తుందన్న గాంధీజీ మాటలు నీటి మూటలవుతున్నాయి. దేశానికి పట్టుగొమ్మలుగా ఉండాల్సిన పల్లెలు ప్రగతిలో పడకేశాయి. అడ్డగోలు హామీలు ఇచ్చి అధికారంలోకి వచ్చిన కాంగ్రెస్‌ నేతలు వాటిలో ఒక్కదాన్ని కూడా అమలు చేయలేకపోతున్నారు. రాష్ట్రంలో కాంగ్రెస్‌ పార్టీ అధికారం చేపట్టి 15నెలలు అవుతున్నా స్థానిక సంస్థలకు సకాలంలో ఎన్నికలు నిర్వహించకపోవడంతో కేంద్ర ప్రభుత్వంతోపాటు, 15వ ఆర్థిక సంఘం నుంచి రావాల్సిన నిధులు ఆగిపోయాయి.

ఫలితంగా గ్రామాల్లో కనీస వసతులు కల్పించేందుకు పంచాయతీ కార్యదర్శులు తమ సొంత డబ్బును వెచ్చించాల్సిన పరిస్థితి ఏర్పడింది. గతంలో బీఆర్‌ఎస్‌ పదేండ్ల పాలనలో పల్లెలు ప్రగతిపథంలో పరుగులు తీస్తే.. ఇప్పుడు కాంగ్రెస్‌ ఏడాదిన్నర పాలనలోనే అభివృద్ధి ఆగిపోయింది. పంచాయతీరాజ్‌ వ్యవస్థను బలోపేతం చేయాలన్న ధ్యేయంతో కేంద్ర ప్రభుత్వం ఏటా ఏప్రిల్‌ 24న దేశవ్యాప్తంగా ఈ దినోత్సవాన్ని నిర్వహిస్తున్నది. అందులో భాగంగా గురువారం తెలంగాణలోనూ ఈ దినోత్సవాన్ని నిర్వహించబోతున్నప్పటికీ రేవంత్‌రెడ్డి సర్కారు వైఫల్యాల వల్ల అభివృద్ధి పడకేయడంతో రాష్ట్రంలోని ఏ గ్రామంలోనూ ఉత్సాహం కనిపించలేదు.

‘అభయ హస్తం’ మ్యానిఫెస్టోలో కాంగ్రెస్‌ పార్టీ ఇచ్చిన హామీలు

• అసెంబ్లీ ఎన్నికల సందర్భంగా ‘అభయ హస్తం’ పేరిట విడుదల చేసిన మ్యానిఫెస్టోలో కాంగ్రెస్‌ పార్టీ అనేక హామీలు గుప్పించింది. రాష్ట్రంలో తాము అధికారంలోకి వస్తే గ్రామాల అభివృద్ధికి చేపట్టే చర్యలను అందులో ప్రకటించింది. ఆ హామీలు ఇవీ..
• ‘దివంగత ప్రధాని రాజీవ్‌ గాంధీ ప్రవేశపెట్టిన 73, 74వ రాజ్యాంగ సవరణ ప్రకారం మూడంచెల స్థానిక సంస్థలకు పూర్తిస్థాయిలో నిధులు, విధులు అప్పగిస్తామని చెప్పింది. కానీ, నిరుడు ఫిబ్రవరిలో గ్రామ పంచాయతీలు, జూన్‌లో మండల, జిల్లా పరిషత్తుల పాలకర్గాల పదవీకాలం ముగిసినా రేవంత్‌రెడ్డి సర్కారు నేటికీ ఎన్నికలు నిర్వహించలేదు.
• మహాత్మాగాంధీ జాతీయ గ్రామీణ ఉపాధి హామీ పథకం పని దినాలను 150 రోజులకు, కనీస వేతనాన్ని రూ.350కి పెంచుతామని కాంగ్రెస్‌ ప్రకటించినప్పటికీ గత ఆర్థిక సంవత్సరం రాష్ట్రంలో ఒక్కో కూలీకి సగటున దక్కింది రూ.271 మాత్రమే. పనిదినాల సంఖ్యను కూడా దాదాపు సగానికి తగ్గించారు. తెలంగాణలో గత ఆర్థిక సంవత్సరం 12 కోట్ల పనిదినాలు ఉండగా.. ప్రస్తుత ఆర్థిక సంవత్సరంలో కేంద్ర ప్రభుత్వం 6.5 కోట్ల పని దినాలకు మాత్రమే అనుమతి ఇచ్చింది.
• గ్రామ పంచాయతీల్లోని సిబ్బందికి కనీస వేతనాన్ని అందజేయడంతోపాటు ఉద్యోగ భద్రత కల్పిస్తామన్న హామీని కాంగ్రెస్‌ పార్టీ తుంగలో తొక్కింది. గత 2-3 నెలలుగా గ్రామ పంచాయతీల సిబ్బందికి అసలు వేతనాలే రావడం లేదు. కొన్నిచోట్ల డిసెంబర్‌ నెల వేతనానికి సంబంధించి కార్మికులకు చెక్కులు ఇచ్చినప్పటికీ ఆయా గ్రామ పంచాయతీల ఖాతాల్ల్లో డబ్బులు లేకపోవడంతో ఆ చెక్కులు చెల్లడం లేదు. ఒక్కో కార్మికుడు తన కుటుంబాన్ని పోషించుకోవాలంటే నెలకు కనీసం రూ.26 వేల వేతనం ఇవ్వాలని సుప్రీంకోర్టు స్పష్టం చేసింది. కానీ, పంచాయతీ కార్మికులకు నెలవారీగా ఇస్తున్న వేతనం రూ.9,500 మాత్రమే. అది కూడా రెగ్యులర్‌గా అందడం లేదు. ఎలాంటి ఉద్యోగ భద్రత లేని వారిని ఎప్పుడు తొలగిస్తారో తెలియదు.
• గిరిజన ప్రాంతాల్లోని పీఈఎస్‌ఏ చట్టాన్ని సవరణలతో అమలుచేస్తామని కాంగ్రెస్‌ పార్టీ చెప్పినప్పటికీ పంచాయతీ నిబంధనల (షెడ్యూల్డ్‌ ప్రాంతాలకు విస్తరణ) చట్టం-1996 ఎక్కడా అమలు కావడంలేదు. షెడ్యూల్డ్‌ ప్రాంతాల్లో నివసించే ప్రజలకు సంప్రదాయ గ్రామసభల ద్వారా స్వయం పాలన సదుపాయాన్ని కల్పించేందుకు కేంద్ర ప్రభుత్వం ఈ చట్టాన్ని తీసుకొచ్చింది. దోపిడీ నుంచి గిరిజనులను కాపాడటం ఈ చట్టం ప్రధాన ఉద్దేశం. ఆ చట్టాన్ని సవరించకపోగా రాష్ట్రంలో ఎక్కడా అమలు చేయడం లేదు.
• మాజీ సర్పంచ్‌లు, ఎంపీటీసీలు, జెడ్పీటీసీ సభ్యులకు గౌరవ పెన్షన్‌ అందజేస్తామని కాంగ్రెస్‌ పార్టీ ఎంతో ఘనంగా ప్రకటించింది. కానీ, గత ఏడాదిన్నర కాలంగా గ్రామాల అభివృద్ధికి చేపట్టిన పనుల బిల్లులనే రేవంత్‌రెడ్డి సర్కారు ఇప్పటివరకు చెల్లించలేదు. దీంతో తమ పెండింగ్‌ బిల్లులు చెల్లించాలని డిమాండ్‌ చేస్తూ మాజీ సర్పంచ్‌లు రోజుకో రూపంలో ఆందోళనకు దిగుతున్నారు.
• ఇటీవలి కాలంలో నియమించిన పంచాయతీ కార్యదర్శుల సర్వీసులను వెంటనే క్రమబద్ధీకరించడంతోపాటు వారికి పూర్తిస్థాయి వేతనాలు చెల్లిస్తామని ప్రకటించిన కాంగ్రెస్‌ ప్రభుత్వం అసలు పంచాయతీలకు నిధులే విడుదల చేయడం లేదు. దీంతో పంచాయతీల గ్రామ కార్యదర్శులు తమ సొంత డబ్బును వెచ్చించాల్సి వస్తున్నది. మరోవైపు వారు అధికార పార్టీ నేతల వేధింపులకు తాళలేకపోతున్నారు. ‘అధికార పార్టీ నేతలతో ఇబ్బందులు పడుతున్నా. నిజాయితీగా విధులు నిర్వర్తించలేకపోతున్నా’ అంటూ రాజన్న సిరిసిల్ల జి ల్లా తంగళ్లపల్లి మండలం బద్దెనపల్లి గ్రామ కార్యదర్శి లేఖసంచలనంగా మారింది.

మాకు ఉద్యోగ భద్రత లేదు

పంచాయతీ కార్మికులు క్యాటగిరీలవారీగా కారోబార్‌, బిల్‌ కలెక్టర్‌, వాటర్‌మెన్‌ ఉండాలి. కానీ, జీవో 51 తీసుకొచ్చి కలగూరగంపలా మార్చారు. అందరూ అన్ని పనులు చేయాల్సిందేనని చెప్పారు. ఎవరిని ఎప్పుడు తొలగిస్తరో తెలియదు. మాకు ఎలాంటి ఉద్యోగ భద్రత లేదు. బ్యాంకు ఖాతాల ద్వారా ఆన్‌లైన్‌లో వేతనాలు చెల్లిస్తామని చెప్పిన ఉన్నతాధికారులు.. ఇప్పుడు కొత్తగా మే నుంచి ఖాతాల్లో వేతనాలు వేస్తామంటున్నారు. జీపీ ఖాతాల్లో బడ్జెట్‌ లేదు. గ్రామ పంచాయతీలకు ఎలాంటి నిధులు రావడం లేదు.

– గ్యార పాండు, గ్రామ పంచాయతీ వర్కర్ల యూనియన్‌ రాష్ట్ర అధ్యక్షుడు