Employee Transfers | రేపటి నుంచే బదిలీలు.. ఒకేచోట రెండేండ్లు పనిచేసినవారికి అవకాశం

రాష్ట్ర ప్రభుత్వ ఉద్యోగుల సాధారణ బదిలీలకు ప్రభుత్వం పచ్చజెండా ఊపింది. గతంలో ఉన్న నిషేధాన్ని ఎత్తివేసింది. బదిలీ ప్రక్రియను ఈ నెల 5వ తేదీన ప్రారంభించి, 20వ తేదీలోగా పూర్తి చేయాలని ఆదేశించింది.

• ఉద్యోగ బదిలీలపై నిషేధం ఎత్తివేత.. 15 రోజుల్లోగా ప్రక్రియ పూర్తి
• నాలుగేండ్లకు మించి ఎవరూ కొనసాగవద్దు
• త్వరలో రిటైరయ్యేవారికి, స్పౌజ్‌లకు సడలింపు

Employee Transfers | హైదరాబాద్‌, జూలై 3 (నమస్తే తెలంగాణ): రాష్ట్ర ప్రభుత్వ ఉద్యోగుల సాధారణ బదిలీలకు ప్రభుత్వం పచ్చజెండా ఊపింది. గతంలో ఉన్న నిషేధాన్ని ఎత్తివేసింది. బదిలీ ప్రక్రియను ఈ నెల 5వ తేదీన ప్రారంభించి, 20వ తేదీలోగా పూర్తి చేయాలని ఆదేశించింది. ఈ మేరకు ఆర్థిక శాఖ ప్రత్యేక ప్రధాన కార్యదర్శి రామకృష్ణారావు బుధవారం ఉత్తర్వులు జారీచేశారు. తిరిగి జూలై 21వ తేదీ నుంచి బదిలీలపై నిషేధం అమలవుతుందని పేర్కొన్నారు.

బదిలీలకు మార్గదర్శకాలు

• జూన్‌ 30 నాటికి ఒకేచోట కనీసం రెం డేండ్ల సర్వీస్‌ పూర్తి చేసినవారు మా త్రమే బదిలీకి అర్హులు. స్పౌజ్‌ కేసులకు మాత్రం ఈ నిబంధన మినహాయింపు.
• ఒకేచోట నాలుగేండ్లకు మించి పనిచేసిన ప్రతి ఒక్కరినీ బదిలీ చేయాలని ఆదేశించింది. అయితే మరో ఏడాదిలో (20 25 జూన్‌ 30) పదవీ విరమణ చేయబోయేవారికి మాత్రం సడలింపు ఇచ్చింది. అయితే వారు కోరుకుంటే మాత్రం బదిలీ చేయవచ్చని తెలిపింది.
• ఏ క్యాడర్‌లోనూ 40 శాతం మందికి మించి సిబ్బందిని బదిలీ చేయవద్దని స్పష్టం చేసింది.
• ఒక స్థానాన్ని ఒకరికంటే ఎక్కువ మంది ఉద్యోగులు కోరుకుంటే ఈ క్రమంలో ప్రాధాన్యం ఇవ్వాలని సూచించింది. 1) స్పౌజ్‌ కేసులు, 2) 2025 జూన్‌ 30వ తేదీలోగా రిటైర్‌ అయ్యేవారు, 3) 70 శాతం వైకల్యం కలిగిన ఉద్యోగులు, 4) బుద్ధిమాంద్యం కలిగిన చిన్నారుల తల్లిదండ్రులు, 5) వితంతువులు, 6) దీర్ఘకాలిక రోగాలతో బాధపడుతున్నవారు, 8) కఠిన ప్రదేశాల్లో (మారుమూల, గిరిజన ప్రాంతాలు, సమస్యాత్మక ప్రాంతా లు వంటివి) దీర్ఘకాలంగా పనిచేస్తున్నవారికి ప్రాధాన్యం ఇవ్వాలని పేర్కొన్నది.
• వ్యక్తిగత, వైద్య కారణాల బదిలీలను హెచ్‌వోడీలు నిశితంగా పరిశీలించాలి. ప్రభుత్వానికి నివేదిక అందించాలి.
• అన్ని విభాగాల్లో, అన్ని క్యాడర్ల ఉద్యోగులకు బదిలీలు వర్తిస్తాయి. బదిలీ కా లాన్ని గణించేటప్పుడు పనిచేసే గ్రామం /పట్టణాన్ని పరిగణనలోకి తీసుకుంటారు.
• గుర్తింపు పొందిన ఉద్యోగ సంఘాల ఆఫీస్‌ బేరర్ల బదిలీలకు సంబంధించిన నిబంధనలు పాటించాలి.
• హెచ్‌వోడీలు/అధీకృత ఉన్నతాధికారులు వారి పరిధిలో బదిలీకి అర్హులైన ఉద్యోగుల జాబితాను, ఖాళీల జాబితాను ప్రకటించాలి. అనంతరం ఉద్యోగుల నుంచి ఆప్షన్లు స్వీకరించాలి. ఒక్కో ఉద్యోగి 5 ఆప్షన్లు ఇవ్వవచ్చు.
• కచ్చితంగా బదిలీ కావాల్సిన ఉద్యోగుల జాబితాను రూపొందించాలి.
• బదిలీల సమయంలో తమ కార్యాలయంలో సరిపడా సిబ్బంది ఉండేలా హెచ్‌వోడీలు చర్యలు తీసుకోవాలి.
• కఠిన ప్రాంతాలకు వెళ్లేందుకు ఆప్షన్‌ ఇవ్వకుంటే లాటరీ పద్ధతిలో ఎంపిక చేయాలి.
• టీచర్లు, లెక్చరర్లు, ఆదాయాన్ని ఇచ్చే శాఖలు(వాణిజ్య పన్నులు, ఎక్సైజ్‌, స్టాంపులు, రిజిస్ట్రేషన్లు, రవాణా, అటవీ, పోలీస్‌ విభాగాలకు సంబంధించి ఆయా శాఖలకు గతంలో ఉన్న ప్రత్యేక మార్గదర్శకాలను పాటించాల్సి ఉంటుంది.
• రాష్ట్ర, మల్టీజోనల్‌, జిల్లా స్థాయిలో ఏర్పాటు చేసే కమిటీల ఆధ్వర్యంలో బదిలీలు జరుగుతాయి. రాష్ట్ర స్థాయి క్యాడర్‌కు సంబంధించి ఆయా శాఖల ప్రత్యేక కార్యదర్శి/ముఖ్యకార్యదర్శి/కార్యదర్శి, హెచ్‌వోడీ, అడిషనల్‌/జాయింట్‌/డిప్యూటీ సెక్రటరీతో కూడిన కమిటీ ఏర్పాటు చేస్తారు. మల్టీజోనల్‌ స్థాయి కమిటీలో హెచ్‌వోడీ, అడిషనల్‌/జాయింట్‌/డిప్యూటీ సెక్రటరీ, రీజినల్‌ ఆఫీసర్‌ లేదా అడిషనల్‌/జాయింట్‌ డైరెక్టర్‌ సభ్యులుగా ఉంటారు. జిల్లా స్థాయికి సంబంధించి జిల్లా కలెక్టర్‌, అదనపు కలెక్టర్‌/డీఆర్వో, ఆ శాఖ జిల్లా అధికారి సభ్యులుగా ఉంటారు.
• బదిలీ అయిన ఉద్యోగి మూడు రోజుల్లోగా రిలీవ్‌ కావాల్సి ఉంటుంది.
• మొత్తం బదిలీ ప్రక్రియను ఆయా శాఖల ప్రత్యేక ప్రధాన కార్యదర్శి/ముఖ్య కార్యదర్శి/కార్యదర్శి పర్యవేక్షించాలి.

బదిలీల షెడ్యూల్‌ ఇలా..

• జూలై 5-8 మధ్య బదిలీలకు అర్హులు, ఖాళీల జాబితాను రూపొందించి ప్రకటించడం.
• జూలై 9-12 మధ్య ఉద్యోగుల నుంచి ఆప్షన్లు స్వీకరించడం 
• జూలై 13-18 మధ్య దరఖాస్తుల పరిశీలన, మాస్టర్‌ లిస్ట్‌ రూపొందించడం
• జూలై 19-20 మధ్య బదిలీ ఉత్తర్వులు విడుదల. అక్కడి నుంచి మూడు రోజుల్లోగా రిలీవ్‌ చేయడం.

‘317’ ఉద్యోగుల పరిస్థితి ఏమిటి?
బదిలీలపై నిషేధం ఎత్తివేతను స్వాగతిస్తున్నామని, అయితే జీవో 317 బాధిత ఉద్యోగులపై స్పష్టత ఇవ్వలేదని పంచాయతీ కార్యదర్శుల అసోసియేషన్‌ పేర్కొన్నది. కమిటీకి సుమారు 50 వేల మంది ఉద్యోగులు దరఖాస్తు చేసుకున్నారని అధ్యక్ష కార్యదర్శులు మధుసూదన్‌ రెడ్డి, శ్రీనివాస్‌ గుర్తు చేశారు. కమిటీ త్వరగా సిఫారసులు ఇచ్చి, బాధిత ఉద్యోగులకు బదిలీల్లో సొంత జిల్లాలకు వెళ్లే అవకాశం కల్పించాలని కోరారు.

ఎన్నికలప్పుడు బదిలీ అయిన వారికి అవకాశమివ్వాలి: టీజీవో
ఇటీవలి అసెంబ్లీ, లోక్‌సభ ఎన్నికల సందర్భంగా ఎన్నికల కమిషన్‌ నిబంధనల మేరకు బదిలీ అయిన ఉద్యోగులకూ బదిలీల్లో అవకాశమివ్వాలని టీజీఓ కేంద్ర సంఘం విజ్ఞప్తి చేసింది. సాధారణ బదిలీలకు సంబంధించిన మార్గదర్శకాలను పాటించకుండా కేవలం ఎలక్షన్‌ కమిషన్‌ మార్గదర్శకాల ప్రకారం వారిని బదిలీ చేశారని సంఘం రాష్ట్ర అధ్యక్షుడు ఏలూరి శ్రీనివాసరావు, ప్రధానకార్యదర్శి సత్యనారాయణ ఒక ప్రకటనలో తెలిపారు. ఇలా బదిలీ అయినవారి ఇబ్బందులు గుర్తించాలని విజ్ఞప్తి చేశారు.

బదిలీలపై నిషేధం ఎత్తివేత హర్షణీయం
రాష్ట్రంలో ఉద్యోగుల బదిలీలపై నిషేధం ఎత్తివేత హర్షణీయమని తెలంగాణ పంచాయతీ కార్యదర్శి అసోసియేషన్‌ రాష్ట్ర అధ్యక్షుడు పీ మధుసూదన్‌రెడ్డి, ప్రధాన కార్యదర్శి శ్రీనివాస్‌ పేర్కొన్నారు. జూన్‌ 30 వరకు 317 జీవో సబ్‌ కమిటీకి సుమారు 50 వేల వరకు అన్ని శాఖల ఉద్యోగులు దరఖాస్తు చేసుకున్నారని, జూలై 20 వరకు రాష్ట్రవ్యాప్తంగా బదిలీలు ప్రక్రియ జరుగుతుందని వెల్లడించారు.