Gruha Jyothi | గృహజ్యోతి అలజడి రేపి.. నమస్తే తెలంగాణ కథనంతో షాక్‌లో విద్యుత్తు శాఖ!

‘ఆరిపోయిన గృహజ్యోతి పథకం’ శీర్షికన నమస్తే తెలంగాణలో శనివారం ప్రత్యేక కథనం ప్రచురితమైంది. జగిత్యాల జిల్లా కేంద్రానికి చెందిన మౌనికకు గృహజ్యోతి పథకం వర్తించకపోగా, ఒకేసారి 6 నెలల బిల్లలు చెల్లించాలన్న ఆమె ఆవేదనకు నమస్తే అక్షరరూపం ఇచ్చింది.

• జగిత్యాల మౌనిక ఇంటికి 6 నెలల బిల్లులపై కథనం
• స్వయంగా ఆమె ఇంటికి ఎన్పీడీసీఎల్‌ అధికారులు
• ఇది మౌనిక కథ కాదు.. రాష్ట్రమంతటా పలువురి గోస

Gruha Jyothi | జగిత్యాల, ఆగస్టు 31(నమస్తే తెలంగాణ): ‘ఆరిపోయిన గృహజ్యోతి పథకం’ శీర్షికన నమస్తే తెలంగాణలో శనివారం ప్రత్యేక కథనం ప్రచురితమైంది. జగిత్యాల జిల్లా కేంద్రానికి చెందిన మౌనికకు గృహజ్యోతి పథకం వర్తించకపోగా, ఒకేసారి 6 నెలల బిల్లలు చెల్లించాలన్న ఆమె ఆవేదనకు నమస్తే అక్షరరూపం ఇచ్చింది. ఈ కథనాన్ని మాజీ మంత్రి, ఎమ్మెల్యే హరీశ్‌రావు సహా రాష్ట్రంలోని ఎందరో సోషల్‌ మీడియా వేదికల్లో పోస్టులుగా పెట్టారు.

దీంతో ఎన్పీడీసీఎల్‌ అధికారులు స్పందించారు. మౌనిక సమస్యను పరిష్కరిస్తామని ట్విట్టర్‌ ద్వారా ప్రకటన చేశారు. ఎన్పీడీసీఎల్‌ అధికారులు మౌనిక ఇంటికి వెళ్లి విద్యుత్తు మీటర్‌తోపాటు బిల్లులు, ప్రజాపాలన దరఖాస్తు ఫారమ్‌ పరిశీలించారు. దరఖాస్తు ఫారమ్‌లో గృహజ్యోతి పథకం వర్తింపు కాలమ్‌లో రైట్‌మార్క్‌ వేయకుండా, ఇంటు మార్క్‌ వేసిందని, దీంతో ఆమె పేరును గృహజ్యోతి పథకంలోకి పరిగణనలోకి తీసుకోలేదని అధికారులు సెలవిచ్చారు. ఆమె కిరాయి ఇంటిలో ఉన్నట్టు పేర్కొనలేదనీ తేల్చారు. దాంతోనే ఆమెకు జీరో బిల్లు జనరేట్‌ కాలేదని చెప్పుకొచ్చారు.

ఇప్పుడు ఆన్‌లైన్‌లో సరిచేశామని, ఇక నుంచి మౌనికకు జీరో బిల్లు వస్తుందని హామీ ఇచ్చారు. ఇప్పటివరకు 6 నెలల విద్యుత్తు బిల్లు బకాయిలు చెల్లించాలని కోరడంతో మౌనిక భర్త రవికుమార్‌.. ఫోన్‌పే ద్వారా మొత్తం బకాయిలను చెల్లించారు. మౌనిక ఆవేదనకు ఫుల్‌స్టాప్‌ పడింది. రాష్ట్రవ్యాప్తంగా మౌనిక లాంటి పేదలు ఎందరికో గృహజ్యోతి అమలుగాక లబోదిబోమంటున్నారు. ఈ కథనాన్ని ప్రభుత్వం మౌనిక వ్యక్తిగత సమస్యగా పరిగణించడం విమర్శలకు దారి తీస్తున్నది.

రాంగ్‌ మార్క్‌గా టాంపరింగ్‌ చేశారు: మౌనిక దంపతులు

ప్రజాపాలన దరఖాస్తును ట్యాంపరింగ్‌ చేశారంటూ మౌనిక, ఆమె భర్త రవికుమార్‌ చెప్పారు. తాము దరఖాస్తు ఫారమ్‌లో గృహజ్యోతి కాలమ్‌లో రైట్‌మార్క్‌ వేశామని స్పష్టం చేశారు. దానినే ఇంటు మార్కులా మార్చారని తెలిపారు. రైట్‌మార్క్‌పైనే మరో గీతను గీసినట్టుగా స్పష్టంగా కనిపిస్తున్నదని తెలిపారు.

అధికారుల తీరు.. నవ్వులపాలు

• నమస్తే తెలంగాణలో ‘ఆరిపోయిన గృహజ్యోతి పథకం’ కథనం వచ్చిన రోజే స్పందించిన అధికారులు ప్రజాపాలన దరఖాస్తు ఫారమ్‌ను వెంటతీసుకెళ్లడంపై అనుమానాలు వెల్లువెత్తకమానవు.
• గృహజ్యోతి పథకం వర్తించడం లేదనే ఉద్దేశంతోనే మౌనిక ఇదే పథకం కోసం కార్యాలయంలో మరో దరఖాస్తు చేసుకున్నారు. మరి ఆ దరఖాస్తును సదరు అధికారులు ఎందుకు తేలేదన్నది మరో ప్రశ్న.
• మౌనిక దంపతులు ఉంటున్నది కిరాయి ఇంటిలోనే, అద్దె చెల్లించే స్థోమతలేని ఆమె జీరో కరెంటు బిల్లును ఎందుకు వద్దనుకున్నదో అధికారులే సెలవియ్యాలి.
• ఉచిత బస్సు, పింఛన్‌, ఇందిరమ్మ ఇండ్లు పథకాల కోసం టిక్‌ పెట్టిన అదే మహిళ జీరో కరెంటు బిల్లు ఎందుకు వద్దనుకున్నదో వారే తేల్చి చెప్పాలి.
• మరో విచిత్రమేమిటంటే దరఖాస్తులో స్పష్టంగా టిక్‌ మార్క్‌ పెట్టినట్టుగా ఉన్నది. ఆ టిక్‌ మార్క్‌నే ఇంటుగా మార్చినట్టుగా చిన్నపిల్లలకైనా ఇట్టే తెలిసిపోతున్నది. ఏమార్చేందుకు ప్రయత్నించి ఆ చిన్న లాజిక్‌ను ఎలా మరిచారో!