లక్ష్య సాధన వైపు పదిలంగా..

పదో తరగతి వార్షిక పరీక్షల్లో ఉత్తమ ఫలితాల సాధనకు పాఠశాల విద్యాశాఖ ప్రత్యేక యాక్షన్‌ ప్లాన్‌తో ముందుకెళ్తున్నది. ఈ ఏడాది 6 పేపర్లకే పరీక్షను నిర్వహించనుండగా, సైన్స్‌లో రెండు పేపర్లు ఉంటాయి.

• ఎస్సెస్సీ పరీక్షల్లో ఉత్తమ ఫలితాల కోసం విద్యాశాఖ యాక్షన్‌ ప్లాన్‌
• మొత్తం షెడ్యూల్‌లో 50 % బోధన, 50% సన్నద్ధత పాఠాలు
• సెంబర్‌ ఆరంభంలోనే షురూ అయిన ప్రత్యేక కార్యక్రమం
• జనవరిలో రెండు పూటలా ప్రత్యేక తరగతుల నిర్వహణ

హైదరాబాద్‌, డిసెంబర్‌ 30 (నమస్తే తెలంగాణ): పదో తరగతి వార్షిక పరీక్షల్లో ఉత్తమ ఫలితాల సాధనకు పాఠశాల విద్యాశాఖ ప్రత్యేక యాక్షన్‌ ప్లాన్‌తో ముందుకెళ్తున్నది. ఈ ఏడాది 6 పేపర్లకే పరీక్షను నిర్వహించనుండగా, సైన్స్‌లో రెండు పేపర్లు ఉంటాయి. దీంతో పరీక్షలు 7 రోజుల పాటు కొనసాగనున్నాయి. సైన్స్‌ రెండు పేపర్ల మార్కులను ఒకటిగానే పరిగణించి ఫలితాలు ప్రకటిస్తారు. ఈ ఏడాది 5.08 లక్షల మంది విద్యార్థులు పరీక్ష ఫీజు చెల్లించారు. 2024 మార్చి మూడో వారంలో వార్షిక పరీక్షలు నిర్వహించనున్నారు. విద్యార్థులు ఎలాంటి జంకూ లేకుండా పరీక్షలు రాసేలా సన్నద్ధం చేసేందుకు ‘లక్ష్య’ కార్యక్రమానికి శ్రీకారం చుట్టింది పాఠశాల విద్యాశాఖ.

డిసెంబర్‌ నెల ఆరంభంలోనే లక్ష్య కార్యక్రమాన్ని ప్రారంభించారు. ఒత్తిడికి గురికాకుండా, అర్థవంతమైన అభ్యాసాలు విద్యార్థులతో చేయించడం ఈ కార్యక్రమ ప్రధాన లక్ష్యం. ముఖ్యంగా బట్టీ విధానానికి దూరంగా, మైండ్‌ మ్యాపింగ్‌ ద్వారా సొంత మాటల్లో రాసేలా విద్యార్థులను సన్నద్ధం చేసేందుకు లక్ష్య కార్యక్రమాన్ని అమలు చేస్తున్నారు. మొత్తం యాక్షన్‌ ప్లాన్‌లో 50 శాతం బోధనకు, మరో 50 శాతం రోజులను పరీక్షలకు సన్నద్ధం చేయడానికి కేటాయించారు. విద్యార్థుల సందేహాల నివృత్తికి జిల్లా, రాష్ట్రస్థాయిలో టోల్‌ఫ్రీ నంబర్‌ ఏర్పాటు చేశారు. టీశాట్‌ ద్వారా అవగాహన కల్పించడం, వ్యక్తిత్వ వికాస నిపుణులతో కౌన్సెలింగ్‌ నిర్వహించడం, ప్రేరణ పొందే కార్యక్రమాలను అమలు చేయడం ‘లక్ష్య’లో భాగమే.

యాక్షన్‌ ప్లాన్‌ తీరుతెన్నులు

• 2024, జనవరి 10లోగా పదో తరగతిలోని అన్ని సబ్జెక్టుల సిలబస్‌ పూర్తి చేయాలని నిర్ణయించి, డిసెంబర్‌ నెల నుంచే స్పెషల్‌ క్లాసులు ప్రారంభించారు. మొత్తం రెండు నెలల షెడ్యూల్‌లో భాగంగా డిసెంబర్‌లో ఒక పూట తరగతులు నిర్వహిస్తన్నారు. జనవరి నుంచి రెండు పూటలు 2 గంటల పాటు ప్రత్యేక తరగతులు నిర్వహిస్తారు.
• విద్యార్థులను ఏ, బీ, సీ గ్రూపులుగా విభజించి ‘లక్ష్య’ సాధన దిశగా సాగుతున్నారు. సొంతంగా చేయగలిగిన వారిని ఏ గ్రూపుగా, పీర్‌ సపోర్ట్‌లర్నర్స్‌ను బీ గ్రూపుగా, టీచర్‌ సపోర్ట్‌లర్నర్స్‌ను సీ గ్రూపు విభజించడం ద్వారా ఉత్తమ ఫలితాల సాధనకు కృషి చేస్తున్నారు.
• సెక్షన్ల వారీగా వాట్సాప్‌ గ్రూపు ఏర్పాటు చేసి, వి ద్యార్థులు, తల్లిదండ్రులకు ఎప్పటికప్పుడు సమాచారం అందించడం యాక్షన్‌ ప్లాన్‌లో భాగం.
• ఫిబ్రవరిలో ప్రత్యేక పరీక్ష, మార్చిలో 100 శాతం సిలబస్‌తో ప్రీ ఫైనల్‌ ఎగ్జామ్స్‌ నిర్వహిస్తారు.
• జనవరి, ఫిబ్రవరి మాసాల్లో విద్యార్థులకు పరీక్షల సన్నద్ధతపై కౌన్సెలింగ్‌, నిపుణులతో మోటివేషనల్‌ క్లాసులు నిర్వహిస్తారు.
• ఫిబ్రవరి, మార్చిల్లో పాఠశాల, మండల స్థాయి లో సందేహాల నివృత్తి కోసం, టెన్షన్‌ దూరం చే సేందుకు అవగాహన సదస్సులు నిర్వహిస్తారు.