ప్రిన్సిపాల్‌ పోస్టులకు ప్రమోషన్లు వద్దు

రాష్ట్రంలోని ప్రభుత్వ డిగ్రీ కళాశాలల ప్రిన్సిపల్‌ పోస్టుల భర్తీ విధానాన్ని పూర్తిగా మార్చాలన్న మరో వివాదాస్పద నిర్ణయాన్ని తెలంగాణ విద్యాకమిషన్‌.. రాష్ట్ర సర్కార్‌ ముందుంచింది.

• ప్రమోషన్లతో ‘డిగ్రీ’ ప్రిన్సిపాళ్ల భర్తీ వద్దు
• డిగ్రీ ప్రిన్సిపాళ్లను నేరుగా నియమించాలి
• సర్కార్‌ కొత్త కాలేజీలను ఏర్పాటు చేయొద్దు
• ప్రభుత్వానికి విద్యాకమిషన్‌ సిఫారసు

హైదరాబాద్‌, మార్చి 4 (నమస్తేతెలంగాణ): రాష్ట్రంలోని ప్రభుత్వ డిగ్రీ కళాశాలల ప్రిన్సిపల్‌ పోస్టుల భర్తీ విధానాన్ని పూర్తిగా మార్చాలన్న మరో వివాదాస్పద నిర్ణయాన్ని తెలంగాణ విద్యాకమిషన్‌.. రాష్ట్ర సర్కార్‌ ముందుంచింది. ఆటోమెటిక్‌ ఉద్యోగోన్నతులు రద్దుచేయాలని తన నివేదికలో సిఫార్సు చేసింది. ప్రిన్సిపాళ్లను నేరుగా నోటిఫికేషన్‌ ద్వారానే నియమించాలని సూచించింది. యూజీసీ నిబంధనల ప్రకారం ఎంపిక కమిటీ ద్వారా నియామకాలు చేపట్టాలని సూచించడమే కాకుండా.. డిగ్రీ కాలేజీల్లో ఉన్నత విద్యాప్రమాణాలను కొనసాగించేందుకు ఎలాంటి ఆటోమెటిక్‌ ప్రమోషన్లు కొనసాగించొద్దని సర్కార్‌కు సూచించింది. ఈ విధానం పరిపాలన, విద్యా అనుభవం, ఎక్కువ అర్హతలున్న, సమర్థులైన, దార్శనికులైన విద్యావేత్తల నియామకాన్ని ప్రోత్సహిస్తుందని కమిషన్‌ పేర్కొన్నది. రాష్ట్రంలో డిగ్రీ కాలేజీల్లో 136 ప్రిన్సిపల్‌ పోస్టులు ఉన్నాయి. ప్రస్తుతం 79 మంది పనిచేస్తున్నారు. ఇంకా 57 పోస్టులు ఖాళీగా ఉన్నాయి. ఈ పోస్టులను నేరుగానే నియమించాలని కమిషన్‌ సూచించడం వివాదాస్పదమవుతున్నది. కమిషన్‌ ఈ సిఫార్సుపై డిగ్రీ అధ్యాపకులు, ప్రిన్సిపాళ్లు విస్మయం వ్యక్తంచేస్తున్నారు. డిగ్రీ ప్రిన్సిపాళ్లను నేరుగా నియమించే విధానం దేశంలో మరెక్కడా లేదని డిగ్రీ కళాశాలల ప్రిన్సిపాల్స్‌ అసోసియేషన్‌ రాష్ట్ర అధ్యక్షుడు సంగి రమేశ్‌, డిగ్రీ లెక్చరర్ల సంఘం అధ్యక్షుడు బ్రిజేశ్‌ అభిప్రాయపడ్డారు.

కొత్త కాలేజీలు నెలకొల్పొద్దు

రాష్ట్రంలో కొత్తగా ప్రభుత్వ డిగ్రీ కళాశాలలను నెలకొల్పవద్దని సర్కార్‌కు కమిషన్‌ సూచించింది. కొత్త కాలేజీలను మంజూరు చేయడం కన్నా ఉన్న కాలేజీలను బలోపేతం చేయడంపై దృష్టి పెట్టాలని పేర్కొన్నది. సరైన అధ్యయనం చేయకుండా, సాధ్యాసాధ్యాల నివేదిక లేకుండా కొత్త కాలేజీలను ప్రారంభిచొద్దని సిఫార్సు చేసింది. కొత్త కాలేజీలను ప్రారంభించడం, విధానపరమైన నిర్ణయాలు తీసుకునే ముందు జనాభా డిమాండ్‌, ప్రోగ్రామ్స్‌ ఔచిత్యం, అధ్యాపకుల లభ్యత, మౌలిక వసతులు, ఆర్థిక స్థిరత్వం వంటి అంశాలను పరిగణనలోకి తీసుకోవాలని సూచించింది. ఇలాంటి అంశాలను పరిగణనలోకి తీసుకోకుంటే ఎన్‌రోల్‌మెంట్‌పై ప్రభావం చూపుతుందని, అధ్యాపకుల కొరత, మౌలిక వసతుల లేమి వంటి సమస్యలు తలెత్తుతాయని హెచ్చరించింది.

డిగ్రీ కాలేజీల్లో స్థానికులకే సీట్లు

రాష్ట్రంలోని డిగ్రీ కాలేజీల్లో స్థానికులైన విద్యార్థులతోనే నింపాలని సర్కార్‌కు తెలంగాణ విద్యాకమిషన్‌ సూచించింది. జిల్లాను యూనిట్‌గా తీసుకొని ఆ జిల్లా పరిధిలోని విద్యార్థులతోనే సీట్లు భర్తీ చేసేలా మార్పులు చేయాలని సిఫార్సు చేసింది. ఇంటర్‌ తర్వాత విద్యార్థులు డిగ్రీ చదువుల కోసం హైదరాబాద్‌, వరంగల్‌ నగరాలకు ఎక్కువగా వలస పోతున్నారు. దీనికి అడ్డుకట్ట వేయాలి. ఒక్కో డిగ్రీ కాలేజీలో వెయ్యి మంది విద్యార్థులు చదువుకునేలా వసతులు ఉండాలి. వంద మంది విద్యార్థులకు సరిపోయేలా హాస్టల్‌ నిర్మించాలి. కాలేజీల్లో అన్ని వసతులు కల్పించాక, అన్నిరకాల ప్రమాణాలు సమకూరాక ఆ కాలేజీల్లో సీట్లను సంబంధిత జిల్లా విద్యార్థులకే కేటాయించాలి. ఇతర జిల్లాల విద్యార్థులకు అసలే కేటాయించొద్దు అంటూ విధాన పత్రంలో పొందుపరిచింది. ఇదే జరిగితే నిజాం కాలేజీ, హైదరాబాద్‌ కోఠి మహిళా కాలేజీల్లో రాష్ట్రంలోని ఇతర జిల్లాల విద్యార్థులకు ఇక నుంచి అసలే సీట్లు కేటాయించబోరన్న మాట. వాస్తవానికి డిగ్రీ ఆన్‌లైన్‌ అడ్మిషన్ల తెలంగాణ (దోస్త్‌ )ను రద్దు చేయాలన్న అంశాన్ని తెరపైకి తీసుకొచ్చింది.

ఇదీ వాస్తవ పరిస్థితి

• రాష్ట్రంలోని డిగ్రీ కాలేజీల్లో 61శాతం పోస్టులు ఖాళీగా ఉండటంతో విద్యాబోధన దెబ్బతిన్నది. ప్రభుత్వ డిగ్రీ కాలేజీల్లో 2,589, గురుకుల డిగ్రీ కాలేజీల్ల్లో 1,800 వరకు ఫ్యాకల్టీ పోస్టులు ఖాళీగా ఉన్నాయి.
• రాష్ట్రంలో ఒక ప్రభుత్వ డిగ్రీ కాలేజీ సహా మొత్తం 64 డిగ్రీ కాలేజీల్లో జీరో అడ్మిషన్లు ఉన్నాయి. కాకతీయ వర్సిటీ పరిధిలో అత్యధికంగా 22, మహాత్మాగాంధీ వర్సిటీ పరిధిలో 14, ఉస్మానియా పరిధిలో 13 చొప్పున జీరో ఎన్‌రోల్‌మెంట్‌ కాలేజీలు ఉన్నాయి.
• రాష్ట్రంలో 40 శాతం లోపు కాలేజీల్లోనే ఇంటర్నెట్‌తోపాటు, వినియోగించేందుకు వీలుగల కంప్యూటర్‌ ల్యాబ్‌లు ఉన్నాయి.
• రాష్ట్రంలోని 39 శాతం ప్రభుత్వ డిగ్రీ కాలేజీలు ఎంఏ, ఎమ్మెస్సీ, ఎంకాం వంటి కన్వెన్షనల్‌ కోర్సులతో నడుస్తున్నాయి. కొత్తగా ఎంబీఏ (డేటా అనలిటిక్స్‌), ఎంసీఏ, ఎమ్మెస్సీ (కెమిస్ట్రీ) వంటి కోర్సులను ప్రోత్సహించాల్సిన అవసరం ఉన్నది.
• వికారాబాద్‌ జిల్లా కేంద్రంలోని ప్రభుత్వ డిగ్రీ కాలేజీ అత్యంత దారుణ స్థితిలో ఉన్నది. జడ్పీ హైస్కూల్లో ఈ కాలేజీ నిర్వహిస్తున్నారు.

ఇవీ సిఫార్సులు

• డిగ్రీ, పీజీ కోర్సుల్లో కనీస ఉత్తీర్ణత మార్కులను 50 శాతానికి పెంచాలి. అసైన్‌మెంట్లు, ప్రజెంటేషన్లు, ప్రాజెక్ట్‌ వర్క్‌కు 30 శాతం మార్కులను, సెమిస్టర్‌ పరీక్షలకు 70 శాతం మార్కులను కేటాయించాలి.
• ఏటా జూన్‌ 15 నుంచి విద్యా సంవత్సరాన్ని ప్రారంభించాలి. జూన్‌ 30 వరకు అడ్మిషన్లు పూర్తిచేయాలి.
• డిగ్రీ కాలేజీల్లో రిసెర్చ్‌ సెంటర్లను, రిసెర్చ్‌ ఇంక్యుబేషన్‌ సెల్స్‌ను నెలకొల్పాలి. డిగ్రీ కాలేజీ అధ్యాపకులకు రిసెర్చ్‌ గైడ్‌షిప్‌ అవకాశమివ్వాలి.
• పట్టణ, గ్రామీణ ప్రాంతాల్లోని కాలేజీల్లో అంప్రెటిస్‌షిప్‌ ఎంబీడెడ్‌ డిగ్రీ కోర్సులను ప్రవేశపెట్టాలి.
• రాష్ట్రంలోని అన్ని కాలేజీలను కమిషనర్‌ పర్యవేక్షించలేకపోతున్నారు. దీంతో పర్యవేక్షణను కళాశాల విద్యా కమిషన్‌ స్థానంలో జిల్లా కలెక్టర్ల అధ్యక్షతన కాలేజీ గవర్నింగ్‌ బాడీలకు అప్పగించాలి. ఈ పాలకమండలిలో పూర్వ విద్యార్థులకు భాగస్వామ్యం కల్పించాలి.
• కొత్తగా స్కిల్‌ ఇంటిగ్రేటెడ్‌ హయ్యర్‌ ఎడ్యుకేషన్‌ సెల్స్‌ను నెలకొల్పాలి. ఎయిడెడ్‌ డిగ్రీ కాలేజీలను ప్రభుత్వం స్వాధీనం చేసుకోవాలి.
• కొత్తగా తెలంగాణ యంగ్‌ రీసెర్చర్‌ ఫెలోషిప్‌ను ఏర్పాటుచేయాలి. వన్‌టైమ్‌ గ్రాంట్‌ కింద రూ.50 వేల ప్రోత్సాహకాన్ని అందించాలి.