సర్కారు కాలేజీల్లో స్మార్ట్‌బోర్డులు.. 40కోట్లు వెచ్చించనున్న అధికారులు

రాష్ట్రంలోని ప్రభుత్వ జూనియర్‌ కాలేజీల్లో డిజిటల్‌ విద్యాబోధన అందుబాటులోకి రానున్నది. బ్లాక్‌బోర్డుల స్థానంలో ఇంటరాక్టివ్‌ ప్లాట్‌ ప్యానళ్లను బోధనకు వినియోగించనున్నారు.

• ఒక్కో కాలేజీకి రూ. 20 లక్షల వ్యయం

హైదరాబాద్‌, జూన్‌ 22 (నమస్తే తెలంగాణ) : రాష్ట్రంలోని ప్రభుత్వ జూనియర్‌ కాలేజీల్లో డిజిటల్‌ విద్యాబోధన అందుబాటులోకి రానున్నది. బ్లాక్‌బోర్డుల స్థానంలో ఇంటరాక్టివ్‌ ప్లాట్‌ ప్యానళ్లను బోధనకు వినియోగించనున్నారు. సర్కారు కాలేజీలన్నింటికి ఇంటరాక్టివ్‌ ప్లాట్‌ ప్యానళ్లను సమకూర్చాలని ఇంటర్‌ విద్యాశాఖ అధికారులు నిర్ణయించారు.

ఒక్కో కాలేజీకి రూ.20లక్షలు వెచ్చించి 6-8 ఇంటరాక్టివ్‌ ప్లాట్‌ ప్యానళ్లను సమకూరుస్తారు. రాష్ట్రంలో 420కి పైగా సర్కారు కాలేజీలుండగా, ఇందుకోసం రూ.40 కోట్లను అధికారులు ఖర్చుచేయనున్నారు. ఇంటరాక్టివ్‌ ప్లాట్‌ ప్యానళ్లను తెలంగాణ టెక్నాలజీ సర్వీసెస్‌(టీజీటీఎస్‌) సంస్థతో టెండర్‌ ప్రక్రియ ద్వారా సేకరించాలని నిర్ణయించారు.

ప్రయోజనాలివి

• ఆన్‌లైన్‌, ఆఫ్‌లైన్‌ బోధనల మేళవింపు అయిన హైబ్రీడ్‌ పద్ధతిలో పాఠాలు బోధించవచ్చు.
• పాఠ్యాంశ సంబంధ అంశాలను ఇంటర్‌నెట్‌ నుంచి తీసుకుని బోధించవచ్చు. గ్రాఫిక్‌లు, డిజైన్‌, యానిమేటెడ్‌ వీడియోలను సులభంగా ప్రదర్శించవచ్చు.
• బ్లాక్‌బోర్డుకు బదులుగా స్క్రీన్‌పై విభిన్న రంగుల్లో రాయవచ్చు. రాసిన వాటిని చెరిపివేయాల్సిన అవసరం లేకుండా పలు మార్లు ఉపయోగించుకోవచ్చు.
• చాక్‌పీస్‌ల అవసరం ఉండదు. పెన్సిల్‌/పెన్‌, బ్రష్‌ల ఆధారంగా స్క్రీన్‌పై రాయవచ్చు. కంప్యూటర్‌లో స్క్రీన్‌లను మార్చుకున్నట్టుగా తెరలను నచ్చిన రంగుల్లోకి మార్చుకోవచ్చు.
• గ్రాఫ్‌లు, మ్యాపులను డౌన్‌లోడ్‌చేసుకుని స్క్రీన్‌పై బోధించవచ్చు. పెన్‌డ్రైవ్‌లు, సీడీల్లో ఉన్న వాటిని, పీపీటీలు, యానిమేషన్‌ చిత్రాలను ప్రదర్శించవచ్చు.