కేసీఆర్‌ ఆనవాళ్లా.. పనులన్నీ ఆపేద్దాం.. గత ప్రభుత్వ నిర్మాణాలను పట్టించుకోని కాంగ్రెస్‌ సర్కారు

రాష్ట్రంలో బీఆర్‌ఎస్‌ ప్రభుత్వ హయాంలో.. తొలి ముఖ్యమంత్రి కేసీఆర్‌ సారథ్యంలో మొదలుపెట్టిన అభివృద్ధి పనులు ప్రస్తుత సర్కారు హయాంలో అర్ధాంతరంగా నిలిచిపోయాయి.

December 9, 2025 / 02:36 AM IST

కేసీఆర్‌ ఆనవాళ్లా.. పనులన్నీ ఆపేద్దాం.. గత ప్రభుత్వ నిర్మాణాలను పట్టించుకోని కాంగ్రెస్‌ సర్కారు

జిల్లాల్లో ఎక్కడికక్కడ నిలిచిపోయిన అభివృద్ధి పనులు
నిధులివ్వకుండా నిర్లక్ష్యవైఖరి సంక్షేమంపైనా రాజకీయ కుయుక్తులు

రాష్ట్రంలో బీఆర్‌ఎస్‌ ప్రభుత్వ హయాంలో.. తొలి ముఖ్యమంత్రి కేసీఆర్‌ సారథ్యంలో మొదలుపెట్టిన అభివృద్ధి పనులు ప్రస్తుత సర్కారు హయాంలో అర్ధాంతరంగా నిలిచిపోయాయి. నాటి సంక్షేమపథకాలను ఇప్పటికే ఆపేసిన రేవంత్‌ సర్కారు.. ఇప్పుడు కేసీఆర్‌ ఆనవాళ్లు కనిపించడం ఇష్టం లేక ఈ అభివృద్ధి పనుల జోలికి వెళ్లడం లేదు. కోట్లాది రూపాయల ప్రజల సొమ్ముతో మొదలైన ఈ పనులు దాదాపు తుది దశకు చేరుకోగా, కొద్దిపాటి నిధులు విడుదల చేసేందుకు కూడా ఈ సర్కారుకు మనసొప్పడం లేదు.

గత ప్రభుత్వం ఇచ్చిన ఉద్యోగ నోటిఫికేషన్లను తామే ఇచ్చినట్టుగా గొప్పలు చెప్పుకుంటున్న ప్రభుత్వం, ఇప్పుడు ఈ అభివృద్ధి పనులు కూడా పూర్తి చేసి ప్రజలకు అందుబాటులోకి తెస్తే తప్పేంటని ఆయా జిల్లాల వాసులు ప్రశ్నిస్తున్నారు. అభివృద్ధి విషయంలోనూ రాజకీయ కుట్రలు పనికిరావని మండిపడుతున్నారు. చివరకు మౌలిక వసతులపైనా సర్కారు నిర్లక్ష్యంపై కన్నెర్రజేస్తున్నారు. వెంటనే ఈ పనులను పూర్తి చేసి అందుబాటులోకి తేవాలని ఆయా జిల్లాల ప్రజలు కోరుతున్నారు.