హంగ్‌ మున్సిపాలిటీలపై గులాబీ గురి

రాష్ట్రంలో ఏ పార్టీకి స్పష్టమైన మెజారిటీ దక్కని మున్సిపాలిటీలపై బీఆర్‌ఎస్‌ గురిపెట్టింది. ఆయా చోట్ల అత్యధిక పురపాలికలను కైవసం చేసుకొనే దిశ గా పార్టీ అడుగులు వేస్తున్నది.

• మెజారిటీ స్థానాలు దక్కించుకునే దిశగా బీఆర్‌ఎస్‌ అడుగులు
• బెల్లంపల్లిలో గులాబీ కండువా కప్పుకొన్న కాంగ్రెస్‌ పార్టీ, స్వతంత్ర అభ్యర్థులు

హైదరాబాద్‌, ఫిబ్రవరి 14(నమస్తేతెలంగాణ): రాష్ట్రంలో ఏ పార్టీకి స్పష్టమైన మెజారిటీ దక్కని మున్సిపాలిటీలపై బీఆర్‌ఎస్‌ గురిపెట్టింది. ఆయా చోట్ల అత్యధిక పురపాలికలను కైవసం చేసుకొనే దిశ గా పార్టీ అడుగులు వేస్తున్నది. బీఆర్‌ఎస్‌ మెజారిటీ స్థానాల్లో విజయం సాధించిన మున్సిపాలిటీల్లో ఇప్పటికే ఆ పార్టీ చెంతకు పలువురు స్వతంత్ర అభ్యర్థులు దరిచేరారు. కొన్నిచోట్ల బీజేపీ, కాంగ్రెస్‌ పార్టీల కౌన్సిలర్లు కూడా బీఆర్‌ఎస్‌ వైపు నిలిచేందుకు నిర్ణయించుకున్నారు. మరికొందరు పార్టీలో అధికారికంగా చేరకున్నా మద్దతు ప్రకటించారు. ఇలా పలువురు తమ సంపూర్ణ మద్దతు ఇచ్చేందుకు ముందుకొచ్చా రు. రాష్ట్రవ్యాప్తంగా సుమారు 36 చోట్ల హంగ్‌ ఏర్పడింది. కొన్నిచోట్ల ఎక్స్‌ ఆఫీషియో సభ్యుల ఓట్లతో గెలుచుకొనేందుకు పావులు కదుపుతున్నది.

ఈ నేపథ్యంలో శనివారం బెల్లంపల్లి మున్సిపాలిటీ 30వ వార్డు స్వతంత్ర కౌన్సిలర్‌ శంకర్‌సింగ్‌, కాంగ్రెస్‌ పార్టీకి చెందిన 26వ వార్డు కౌన్సిలర్‌ కుమారస్వామి కేటీఆర్‌ సమక్షంలో బీఆర్‌ఎస్‌ తీర్థం పుచ్చుకున్నారు. బీజేపీకి చెందిన 34వ వార్డు కౌన్సిలర్‌ రామ్మూర్తి బీఆర్‌ఎస్‌ పార్టీకే మద్దతు తెలిపారు. బెల్లంపల్లిలో 34 వార్డులకు బీఆర్‌ఎస్‌, కాంగ్రెస్‌ చెరో 14 చోట్ల గెలుపొందాయి. బీజేపీ 2, ఇతరులు 4 స్థానాలు దక్కించుకొన్నారు. మ్యాజిక్‌ ఫిగర్‌ చేరుకోవాలంటే బీఆర్‌ఎస్‌కు నలుగురి మద్దతు అవసరం కాగా, ఇప్పటికే ముగ్గురు కారు పార్టీ వైపు నిలిచారు. మరొకరు మద్దతు తెలిపితే సునాయాసంగా బెల్లంపల్లి మున్సిపల్‌ పాలకవర్గాన్ని గెలిచే అవకాశం ఉన్నది. రాష్ట్రంలో హంగ్‌ ఏర్పడిన చోట్ల బీఆర్‌ఎస్‌ను వరించే మున్సిపాలిటీలు ఈ కింది విధంగా ఉన్నాయి.

గులాబీ జెండా ఎగిరే మున్సిపాలిటీలు ఇవే?

• జనగామ: వరంగల్‌ జిల్లా జనగామ మున్సిపాలిటీలో 30 స్థానాలకు బీఆర్‌ఎస్‌ 13 చోట్ల, కాంగ్రెస్‌ 12 స్థానాలు దక్కించుకొన్నాయి. ఐదుగురు స్వతంత్రులు గెలిచారు. ఈ ఐదుగురిలో ఇద్దరు బీఆర్‌ఎస్‌కే జైకొట్టారు. దీంతో బీఆర్‌ఎస్‌ బలం 15కు పెరిగింది. ఎక్స్‌ అఫీషియో సభ్యుడైన స్థానిక బీఆర్‌ఎస్‌ ఎమ్మెల్యే పల్లా రాజేశ్వర్‌రెడ్డి మద్దతుతో ఇక్కడ గులాబీ పార్టీ జయకేతనం ఎగురవేసేందుకు సిద్ధమైంది.
• ఇంద్రేశం: సంగారెడ్డి జిల్లా ఇంద్రేశం మున్సిపాలిటీలో 18 వార్డులు ఉండగా, బీఆర్‌ఎస్‌ 9 స్థానాలు గెలుచుకొన్నది. కాంగ్రెస్‌ 6, బీజేపీ 2, ఇండిపెండెంట్‌ 1 చోట గెలిచారు. ఇక్కడ స్వతంత్ర అభ్యర్థి బీఆర్‌ఎస్‌ వైపే నిలిచారు. అలాగే ఎక్స్‌ అఫీషియోగా పటాన్‌చెరువు ఎమ్మెల్యే గూడెం మహిపాల్‌రెడ్డి సైతం బీఆర్‌ఎస్‌కు మద్దతు ఇస్తుండగా ఇక్కడ బీఆర్‌ఎస్‌ విజయం దాదాపు ఖాయమైపోయింది.
• అలంపూర్‌లో 10 వార్డులు ఉండగా బీఆర్‌ఎస్‌, కాంగ్రెస్‌ చెరో ఐదు స్థానాల్లో విజయం సాధించాయి. ఇక్కడ బీఆర్‌ఎస్‌ ఎమ్మెల్యే విజయుడు, ఎమ్మెల్సీ వెంకట్రామిరెడ్డి ఎక్స్‌ అఫీషియో ఓట్లతో బీఆర్‌ఎస్‌ గెలుపొందనుంది.
• జిన్నారం: సంగారెడ్డి జిల్లా జిన్నారంలో 20 వార్డులకు బీఆర్‌ఎస్‌ 8 , కాంగ్రెస్‌ 6, బీజేపీ 4, ఇతరులు రెండు చోట్ల గెలుపొందారు. బీఆర్‌ఎస్‌కు ముగ్గురు సభ్యుల మద్దతు అవసరం ఉండ గా, ఇద్దరు స్వతంత్ర అభ్యర్థులు మద్దతు ప్రకటిస్తున్నట్టు తెలుస్తున్నది. రెండు పార్టీల నుంచి ఎవ రో ఒకరు బీఆర్‌ఎస్‌ వైపు మళ్లినా ఇక్కడ విజ యం సాధించే అవకాశాలు పుష్కలం.
• జమ్మికుంట: జమ్మికుంటలోని 30 వార్డుల్లో బీఆర్‌ఎస్‌ 12, కాంగ్రెస్‌ 10, బీజేపీ 4, ఇతరులు 4 స్థానాల్లో గెలిచారు. ఇక్కడ బీఆర్‌ఎస్‌కు నలుగురు సభ్యుల అవసరం ఉండగా, ఇండిపెండెంట్ల దన్నుతోపాటు హుజూరాబాద్‌ ఎమ్మెల్యే పౌడి కౌశిక్‌రెడ్డి మద్దతుతో బీఆర్‌ఎస్‌ మున్సిపాలిటీని దక్కించుకొనే అవకాశం ఖాయమైంది.
• ఆసిఫాబాద్‌: ఈ మున్సిపాలిటీలో 20 వార్డులకు బీఆర్‌ఎస్‌ 9, కాంగ్రెస్‌ 7, ఇతరులు 4 స్థానాల ను గెలుచుకొన్నారు. ఇక్కడ బీఆర్‌ఎస్‌కు ఇద్దరు సభ్యుల మద్దతు అవసరం ఉండగా, ఇతరుల్లో ఇద్దరు బీఆర్‌ఎస్‌ వైపు నిలిచినట్టు తెలుస్తున్నది.
• కాగజ్‌నగర్‌: ఇక్కడ 30 వార్డుల్లో బీఆర్‌ఎస్‌ 11, కాంగ్రెస్‌ 9, బీజేపీ 5, ఇతరులు 5 స్థానాలు సాధించారు. అతిపెద్ద పార్టీగా నిలిచిన బీఆర్‌ఎస్‌ ఐదుగురు స్వతంత్రులతో కలిసి మున్సిపాలిటీపై గులాబీ జెండా ఎగురవేయనున్నది.
• క్యాతనపల్లి: ఈ మున్సిపాలిటీలో 22 వార్డులకు బీఆర్‌ఎస్‌ 10 చోట్ల గెలిచింది. కాంగ్రెస్‌కు 7, ఇతరులకు 5 స్థానాలు దక్కాయి. బీఆర్‌ఎస్‌ ఇద్దరు ఇతరుల మద్దతుతో ఈ మున్సిపాలిటీని గెలుచుకొనే పరిస్థితులు కనిపిస్తున్నాయి.
• కేసముద్రం: ఈ మున్సిపాలిటీలో 16 వార్డులకు కాంగ్రెస్‌, బీఆర్‌ఎస్‌ చెరో 8 గెలుచుకొన్నాయి. బీఆర్‌ఎస్‌కే అవకాశాలు మెరుగయ్యాయి.
• ఎల్లంపేట: మేడ్చల్‌ మల్కాజిగిరి జిల్లాలోని ఎల్లంపేటలోని 24 వార్డుల్లో బీఆర్‌ఎస్‌ 12 స్థానాలను కైవసం చేసుకొన్నది. కాంగ్రెస్‌ 8, బీజేపీకి 4 చోట్ల గెలిచాయి. బీఆర్‌ఎస్‌కు కేవలం ఒక్కరి అవసరం ఉండగా సునాయసంగా గెలుపొందే పరిస్థితి ఏర్పడింది.
• ఇస్నాపూర్‌: సంగారెడ్డి జిల్లాలోని ఇస్నాపూర్‌లో 26 వార్డులకు బీఆర్‌ఎస్‌ 12, కాంగ్రెస్‌ 10, స్వతంత్రులు 4 స్థానాలను గెలుచుకొన్నారు. ఇక్కడ బీఆర్‌ఎస్‌కు ఇద్దరు సభ్యుల మద్దతు అవసరం ఉన్నది. స్వతంత్రుల్లో ఇద్దరు బీఆర్‌ఎస్‌ వైపు మళ్లడంతో బీఆర్‌ఎస్‌కు విజయావకాశాలు మెరుగయ్యాయి.
• పరిగి: వికారాబాద్‌ జిల్లా పరిగిలోని 18 వార్డుల్లో బీఆర్‌ఎస్‌, కాంగ్రెస్‌ చెరో 8 చోట్ల విజయం సాధించాయి. ఇద్దరు స్వతంత్రులు గెలుపొందారు. ఆ ఇద్దరి మద్దతుతో బీఆర్‌ఎస్‌ గెలిచే అవకాశమే కనిపిస్తున్నది.
• వర్ధన్నపేట: ఈ మున్సిపాలిటీలో 12 వార్డుల్లో బీఆర్‌ఎస్‌ 6 చోట్ల, కాంగ్రెస్‌ 5, ఇండిపెండెంట్‌ 1 స్థానం గెలుచుకొన్నారు. ఇక్కడ ఆ స్వతంత్ర సభ్యుడి మద్దతుతో బీఆర్‌ఎస్‌ ఈ మున్సిపాలిటీని కైవసం చేసుకొనే అవకాశం ఏర్పడింది.
• మెదక్‌: 32 వార్డుల్లో బీఆర్‌ఎస్‌ 15 చోట్ల విజయం సాధించింది. కాంగ్రెస్‌ 14, బీజేపీ 2, ఇండిపెండెంట్‌ ఒకచోట గెలిచారు. ఇక్కడ ఇండిపెండెంట్‌తోపాటు మరో సభ్యుడు మద్దతిస్తే గులాబీ పార్టీ గెలుచుకొనే పరిస్థితులు ఉన్నాయి. ఇవేగాక మారుతున్న రాజకీయ సమీకరణాలతో మరో రెండు మున్సిపాలిటీల్లో బీఆర్‌ఎస్‌ పాగా వేసే అవకాశం ఉన్నదని చెబుతున్నారు.

బీఆర్‌ఎస్‌లోకి ఇండిపెండెంట్‌ కౌన్సిలర్లు పార్టీలోకి ఆహ్వానించిన ఎమ్మెల్యేలు
ఆయా మున్సిపాలిటీల్లో ఇండిపెండెంట్‌ కౌన్సిలర్లుగా ఎన్నికైన పలువురు బీఆర్‌ఎస్‌లో చేరారు. సంగారెడ్డి జిల్లా ఇస్నాపూర్‌లోని పదో వార్డు కౌన్సిలర్‌గా గెలిచిన రాహుల్‌రెడ్డి, ఇంద్రేశం మున్సిపాలిటీలో 2వ వార్డులో గెలిచిన కౌన్సిలర్‌ లావణ్య శనివారం బీఆర్‌ఎస్‌ గూటికి చేరారు. వీరికి పటాన్‌చెరు ఎమ్మెల్యే గూడెం మహిపాల్‌రెడ్డి గులాబీ కుండువాలు కప్పి బీఆర్‌ఎస్‌లోకి ఆహ్వానించారు. ఈ సందర్భంగా ఎమ్మెల్యే గూడెం మాట్లాడుతూ.. ఇస్నాపూర్‌, ఇంద్రేశం మున్సిపాలిటీలపై గులాబీ జెండా ఎగురవేయడం ఖాయమని అన్నారు. నియోజకవర్గంలోని ఐదు మున్సిపాలిటీలను బీఆర్‌ఎస్‌ కైవసం చేసుకోబోతున్నదని చెప్పారు. కేసీఆర్‌పై అభిమానంతో కౌన్సిలర్లు బీఆర్‌ఎస్‌లో చేరుతున్నారని తెలిపారు. కాగా సిద్దిపేట జిల్లా దుబ్బాక మున్సిపల్‌ 17వ వార్డు కౌన్సిలర్‌ ఎండీ చాంద్‌మియా బీఆర్‌ఎస్‌లో చేరారు. శనివారం బీఆర్‌ఎస్‌ సిద్దిపేట జిల్లా అధ్యక్షుడు, దుబ్బాక ఎమ్మెల్యే కొత్త ప్రభాకర్‌రెడ్డి సమక్షంలో చాంద్‌మియా గులాబీ గూటికి చేరారు. ఈయనకు బీఆర్‌ఎస్‌ టికెట్‌ దక్కకపోవడంతో స్వతంత్ర అభ్యర్థిగా పోటీచేసి కౌన్సిలర్‌గా గెలిచారు. శనివారం ఆయన సొంత పార్టీలోకి తిరిగి వచ్చినందుకు ఎమ్మెల్యే కొత్త ప్రభాకర్‌రెడ్డి హర్షం వ్యక్తం చేశారు.