బ్రాహ్మణులకు మొండిచెయ్యి.. సంక్షేమంలో కాంగ్రెస్‌ సర్కార్‌ ధోకా.. పాలకమండలి లేక ప్రతిష్టంభన

రాష్ట్రంలో రెండేండ్లుగా బ్రాహ్మణ సంక్షేమ పథకాలు నిలిచిపోవడంతో ఆ సామాజిక వర్గం తీవ్ర ఆవేదన వ్యక్తంచేస్తున్నది. కాంగ్రెస్‌ ప్రభుత్వం తమను చిన్నచూపు చూస్తున్నదనే ఆందోళన వారిలో వ్యక్తమవుతున్నది.

హైదరాబాద్‌ సిటీబ్యూరో, మార్చి 22 (నమస్తే తెలంగాణ): రాష్ట్రంలో రెండేండ్లుగా బ్రాహ్మణ సంక్షేమ పథకాలు నిలిచిపోవడంతో ఆ సామాజిక వర్గం తీవ్ర ఆవేదన వ్యక్తంచేస్తున్నది. కాంగ్రెస్‌ ప్రభుత్వం తమను చిన్నచూపు చూస్తున్నదనే ఆందోళన వారిలో వ్యక్తమవుతున్నది. ఆర్థిక సమస్యలతో కొట్టుమిట్టాడుతున్న పేద బ్రాహ్మణులను అభివృద్ధి పథంలోకి తీసుకొని రావడానికి గత బీఆర్‌ఎస్‌ ప్రభుత్వ హ యాంలో బ్రాహ్మణ సంక్షేమ పరిషత్‌ను ఏర్పాటుచేశారు.

ఈ పరిషత్‌ ద్వారా పలు సంక్షేమ, అభివృద్ధి కార్యక్రమాలు విజయవంతంగా అమలు చేశారు. రాష్ట్రంలో కాంగ్రెస్‌ ప్రభు త్వం అధికారంలోకి వచ్చిన తరువాత గత రెండేండ్లుగా నిధులు విడుదల చేయకపోవ డం, పరిషత్‌కు పాలకమండలిని నియమించకపోవడంతో ఆయా పథకాలు నిలిచిపోయా యి. ఈ ఏడాది బడ్జెట్‌లో బ్రాహ్మణుల సంక్షే మం కోసం రూ.100 కోట్లు ప్రతిపాదించగా, పరిషత్‌ నుంచి అందిన ప్రతిపాదనలు 350 కోట్ల వరకు ఉన్నాయి. ఈ బడ్జెట్‌లో కేటాయించిన నిధులు ఇప్పటికే ఎంపిక చేసిన లబ్ధిదారులు, సదన్‌ నిర్వహణ కోసం మాత్రమే సరిపోతాయని పరిషత్‌ అధికారి ఒకరు చెప్పారు.

కాగా, గత సంవత్సరం బడ్జెట్‌లో రూ.100 కోట్లు ప్రకటించినప్పటికీ, అందులో రూ.60 కోట్లు మాత్రమే విడుదల చేస్తూ సర్కార్‌ ఉత్తర్వులిచ్చింది. అందులోనూ రూ.25 కోట్లు మాత్రమే విడుదల చేసింది. మరో రూ.35 కోట్లను ఈ నెల 31లోగా విడుదల చేయకపోతే అవి వెనక్కి మళ్లే అవకాశముందని పరిషత్‌ అధికారులు ఆందోళన వ్యక్తంచేస్తున్నారు.. బ్రాహ్మణ సంఘాలు సైతం పరిషత్‌కు రావలసిన నిధులను వెంటనే విడుదల చేయాలని ప్రభుత్వాన్ని కోరుతున్నాయి.

రెండేండ్లుగా పరిషత్‌ పథకాల తీరిది..!

• వివేకానంద విదేశీ విద్యాపథకం కింద ఉన్నత చదువుల కోసం యూఎస్‌, యూకే, ఆస్ట్రేలియా లాంటి పలు దేశాలకు వెళ్లే పేద బ్రాహ్మణ విద్యార్థులకు రూ.20 లక్షల ఆర్థిక సాయం అందిస్తారు. సెమిస్టర్‌వారీగా, వారి వీలును బట్టి విద్యార్థులు చదువుకొనే యూనివర్సిటీలు, విద్యాసంస్థలకు ఫీజులు చెల్లించి రసీదు అందజేస్తే, ఆ మొత్తాన్ని విడుదల చేస్తారు. 2023 డిసెంబర్‌ వరకు అప్పటి బీఆర్‌ఎస్‌ ప్రభుత్వం 780 మంది బ్రాహ్మణ విద్యార్థులకు రూ.81 కోట్లు విడుదల చేసింది. ఆ తర్వాత పరిషత్‌ ఆధ్వర్యంలో 300 మంది విద్యార్థులను ఎంపిక చేసి రూ.30 కోట్లతో ప్రభుత్వానికి ప్రతిపాదనలు పంపారు. ప్రభుత్వం ఆర్థిక సహాయం అందిస్తున్న నమ్మకంతో ఈ 300 మంది విద్యార్థులు చదువుకోవడానికి విదేశాలకు వెళ్లిపోయారు. కానీ, ప్రభుత్వం నిధులు విడుదల చేయలేదు. దీంతో నానా ఇబ్బందులుపడి వారి తల్లిదండ్రులు కొంతమేరకు ఫీజులు చెల్లించారు. ప్రభుత్వం నుంచి నిధులు వస్తాయని ఎదురుచూస్తున్నారు. దీనికితోడు గతంలోనే విదేశాల్లో చదువుల కోసం వెళ్లినవారికి కూడా కొంత మేర ఫీజు రీయింబర్స్‌మెంట్‌ చెల్లించాల్సి ఉన్నది. ఈ మొత్తం కలుపుకుని సుమారు రూ.40 కోట్ల వరకు ఉంటుందని సమాచారం. సీఎంకు, మంత్రి దుద్దిళ్ల శ్రీధర్‌బాబుకు పలుమార్లు విజప్తులు చేయడంతో 2025 సెప్టెంబర్‌లో రూ.25 కోట్లు విడుదల చేశారు. బడ్జెట్‌లో ప్రకటించినట్టుగా మరో రూ.35 కోట్లు విడుదల చేస్తే మరికొందరు లబ్ధిదారులకు ఊరట లభిస్తుంది. పాత లబ్ధిదారులే తప్ప ఇప్పటివరకు కొత్తవారి ఎంపిక ప్రక్రియ చేపట్టకపోవడంతో పేద బ్రాహ్మణ విద్యార్థులకు విదేశీ చదువుల ఆశలు అడుగంటుతున్నాయి.
• రంగారెడ్డి జిల్లా గోపనపల్లిలో బ్రాహ్మణ సదనాన్ని పది ఎకరాల స్థలంలో రూ.13 కోట్లతో నిర్మించారు. నిరుపేద బ్రాహ్మణులు శుభకార్యాలు, వివాహాలు చేసుకోవడానికి ఇది ఎంతో ఉపయుక్తంగా ఉన్నది. పూర్తిగా ఉచితంగా అందిస్తారు. బ్రాహ్మణేతరులకు స్వల్ప రుసుముతో దీనిని అద్దెకు ఇస్తారు. దీంతో సదన్‌ నిర్వహణకు స్వల్పంగా ఆదాయం కూడా అందుతున్నది. అయితే దీని నిర్మాణానికి సంబంధించి ఇప్పటివరకు కోటి రూపాయలు మాత్రమే ప్రభుత్వం నుంచి విడుదల చేశారు. గత రెండేండ్లుగా ఒక్కపైసా విడుదల కాలేదు. తమకు రావల్సిన రూ.12 కోట్ల నిధుల కోసం కాంట్రాక్టర్‌ కాళ్లరిగేలా తిరుగుతున్నారు. సూర్యాపేటలోనూ బ్రాహ్మణ సదనాన్ని నిర్మించారు. నిధులు లేకపోవడంతో నిరుపయోగంగా మారింది. ఖమ్మంలో అపరకర్మ భవనం నిర్మాణం కూడా మధ్యలో ఆగిపోయింది.
• ‘బ్రాహ్మిణ్‌ ఎంటర్‌ప్రెన్యూర్‌ షిప్‌ స్కీం ఆఫ్‌ తెలంగాణ’ (బెస్ట్‌) సుమారు ఐదువేల మంది లబ్ధిదారులకు రూ.150 కోట్ల వరకు ఆర్థిక సాయం అందించారు. ఇందులో రూ.లక్షలోపు ఆర్థిక సాయం పొందినవారికి 80% సబ్సిడీ, రూ.లక్ష నుంచి రూ.2 లక్షల వరకు ఆర్థిక సాయం పొందినవారికి 70%, రూ.2 లక్షల నుంచి రూ.12 లక్షల వరకు ఆర్థిక సాయం పొందినవారికి 60% సబ్సిడీ ఇచ్చారు. ఇలా ఆర్థిక సాయం పొందినవారు కార్లు కొనుగోలు చేసి, క్యాబ్‌ సర్వీసులు నడుపుతూ జీవనోపాధి పొందుతున్నారు. అయితే, 2023 డిసెంబర్‌ 1వ తేదీ నాటికి మరో 500 మంది లబ్ధిదారులను ఎంపిక చేసి రూ.16 కోట్ల నిధుల కోసం ఈ జాబితాను ప్రభుత్వానికి పంపించారు. కానీ, ప్రభుత్వం ఇప్పటివరకు ఈ జాబితాను ఆమోదించి, నిధులు విడుదల చేయలేదు. ఆ తర్వాత ఆర్థిక సాయం కోసం కొత్తగా ఏ ఒక్కరినీ ఎంపిక చేయలేదు.
• రామానుజ ఫీజు రీయింబర్స్‌మెంట్‌ స్కీంలో భాగంగా పేద బ్రాహ్మణ విద్యార్థులకు పోస్ట్‌మెట్రిక్‌ స్కాలర్‌షిప్‌గా 440 మందికి రూ.1.16 కోట్లు ప్రభుత్వం చెల్లించింది. ఈ పథకం కూడా 2023 డిసెంబర్‌ తరువాత పూర్తిగా నిలిచిపోయింది. కొత్తగా ఎవరినీ ఎంపిక చేయలేదు. వారికి స్కాలర్‌షిప్‌లు లేవు. వీటితోపాటు వేదపాఠశాలు, వేదపండితులు, వేద విద్యార్థులకు అందించాల్సిన ఆర్థిక సాయం కూడా నిలిచిపోయింది.

పూర్తిగా విస్మరించిన కాంగ్రెస్‌ సర్కార్‌!

బ్రాహ్మణ సంక్షేమ పరిషత్‌ 2017 ఫిబ్రవరిలో ప్రారంభమైంది. అప్పటి నుంచి 2023 వరకు పరిషత్‌ ఆధ్వర్యంలో అనేక పథకాలను విజయవంతంగా అమలుచేశారు. వందలాది మంది నిరుపేద బ్రాహ్మణ విద్యార్థుల విదేశీ విద్యకు ఆర్థిక సాయం అందింది. వందలాది మంది ఔత్సాహికులకు ఆర్థిక సాయం అందడంతో వారు వ్యాపారాలు నిర్వహించుకుంటున్నారు. గతంలో బీఆర్‌ఎస్‌ సర్కార్‌ బ్రాహ్మణ సంక్షేమ పరిషత్‌కు ఏటా రూ.100 కోట్లకు తగ్గకుండా నిధులు కేటాయించేది.

దీంతో సంక్షేమ పథకాలను అమలు చేయడంతోపాటు పేద విద్యార్థులకు స్కాలర్‌షిప్‌ల పంపిణీ, బ్రాహ్మణ సదన్‌ల నిర్మాణం వంటి పనులు చేపట్టారు. ఆయా సంక్షేమ పథకాలు, నిర్మాణ పనులను పూర్తిచేసేందుకు రూ.350 కోట్లు అవసరమవుతాయని అధికారులు చెప్తున్నారు. రాష్ట్రంలో కాంగ్రెస్‌ ప్రభుత్వం ఏర్పడిన తర్వాత బ్రాహ్మణ సంక్షేమ పరిషత్‌ను పూర్తిగా విస్మరించింది. ప్రభుత్వం నిధులు కేటాయించకపోవడంతో ఆయా పథకాలు అటకెక్కాయి. వాస్తవానికి, కొత్త ప్రభుత్వం ఏర్పడిన వెంటనే, గత ప్రభుత్వ హయాంలో నియమితులైన బ్రాహ్మణ సంక్షేమ పరిషత్‌ చైర్మన్‌, సభ్యులు తమ బాధ్యతల నుంచి తప్పుకున్నారు. వారి స్థానంలో ప్రభుత్వం కొత్త చైర్మన్‌, సభ్యులను నియమించాల్సి ఉండగా.. ఆ దిశగా చర్యలు తీసుకోలేదు. బ్రాహ్మణ సంక్షేమ పరిషత్‌కు కార్యవర్గం లేకపోవడంతో దీని ఆధ్వర్యంలో నడువాల్సిన బ్రాహ్మణ సదన్‌, అపరకర్మ భవనం లాంటివి నిర్వహణ సరిగా లేక ముందుకు సాగడం లేదు.

మరోవైపు వివేకానంద విదేశీ విద్యాపథకం, ఎంటర్‌ప్రెన్యూర్‌షిప్‌ స్కీం, వేదపాఠశాలలు, పండితులకు పారితోషికాలు, మెరిట్‌ విద్యార్థులకు స్కాలర్‌షిప్‌లు తదితర పథకాలకు సాయం నిలిచిపోయింది. పరిషత్‌కు ఉన్న నలుగురు ఉద్యోగులు కూడా ఏం చేయాలో తోచక నామమాత్రంగా వచ్చిపోతున్నారు. గత రెండేండ్లుగా బ్రాహ్మణ సంక్షేమ పరిషత్‌ కార్యకలాపాలన్నీ నిలిచిపోవడంతో సంఘాల ప్రతినిధులు ముఖ్యమంత్రి రేవంత్‌రెడ్డికి, మంత్రి దుద్దిళ్ల శ్రీధర్‌బాబుకు పలుమార్లు విన్నపాలు చేశారు. అయినా ప్రయోజనం లేకుండా పోయింది.