CM Revanth Reddy | భూమిలేని వారికి 12 వేలు సాయం.. 26 నుంచి కొత్త రేషన్‌కార్డులు: సీఎం రేవంత్‌రెడ్డి

రైతు భరోసా కింద రైతులకు అందించే పెట్టుబడి సాయాన్ని రూ.12 వేలకు పెంచుతున్నట్టు ముఖ్యమంత్రి రేవంత్‌రెడ్డి తెలిపారు. శనివారం సచివాలయంలో సీఎం రేవంత్‌రెడ్డి అధ్యక్షతన క్యాబినెట్‌ సమావేశం జరిగింది.

• రైతు భరోసాగా 12వేలు

CM Revanth Reddy | హైదరాబాద్‌, జనవరి 4 (నమస్తే తెలంగాణ): రైతు భరోసా కింద రైతులకు అందించే పెట్టుబడి సాయాన్ని రూ.12 వేలకు పెంచుతున్నట్టు ముఖ్యమంత్రి రేవంత్‌రెడ్డి తెలిపారు. శనివారం సచివాలయంలో సీఎం రేవంత్‌రెడ్డి అధ్యక్షతన క్యాబినెట్‌ సమావేశం జరిగింది. అనంతరం సీఎం మీడియాకు వివరాలు వెల్లడించారు. రాష్ట్ర ఆర్థిక పరిస్థితిని బట్టి రైతు భరోసాను ప్రతి ఎకరాకు ఏడాదికి రూ.10 వేల నుంచి రూ.12 వేలకు పెంచాలని నిర్ణయించినట్టు తెలిపారు. రాష్ట్రంలోని వ్యవసాయయోగ్యమైన భూములన్నింటికీ రైతు భరోసా ఇస్తామని స్పష్టంచేశారు.

వ్యవసాయ యోగ్యం కాని భూములకు, రాళ్లు-రప్పలు, గుట్టలు, మైనింగ్‌ భూములు, నాలా కన్వర్షన్‌ జరిగిన భూములకు, పరిశ్రమల కోసం తీసుకున్న భూములకు, రైతుల నుంచి ప్రభుత్వం సేకరించిన భూములకు రైతు భరోసా ఉండదని తెలిపారు. భూమి లేని రైతు కుటుంబాలకు ఏటా రూ.12 వేలు ఇవ్వాలని నిర్ణయం తీసుకున్నట్టు చెప్పారు. ఈ పథకానికి ‘ఇందిరమ్మ ఆత్మీయ భరోసా’ అనే పేరు పెట్టినట్టు చెప్పారు. దీంతోపాటు కొత్త రేషన్‌కార్డులు జారీ చేయాలని ప్రభుత్వం నిర్ణయించిందని వెల్లడించారు. ఈ పథకాలన్నీ ఈ నెల 26 నుంచి ప్రారంభిస్తామని ప్రకటించారు.
మరిన్ని క్యాబినెట్‌ నిర్ణయాలు

• పాలమూరు-రంగారెడ్డి ఎత్తిపోతల పథకానికి మాజీ కేంద్ర మంత్రి సూదిని జైపాల్‌రెడ్డి పేరు పెట్టాలని నిర్ణయం.
• సింగూరు ప్రాజెక్టు కాలువకు మంత్రి దామోదర రాజనర్సింహ తండ్రి, దివంగత మంత్రి సిలారపు రాజనర్సింహ పేరు పెట్టాలని నిర్ణయం.
• జూరాల నుంచి కృష్ణా జలాలను తీసుకొచ్చి మహబూబ్‌నగర్‌ జిల్లాలో కొత్తగా మరింత ఆయకట్టుకు సాగునీరు అందించేందుకు ఉన్న మార్గాలు, ప్రత్యామ్నాయాలను పరిశీలించేందుకు సాంకేతిక నిపుణుల కమిటీని నియమించాలని నిర్ణయం. ఎకడ నీటి లభ్యత ఉన్నది? ఎకడనుంచి ఎంత నీటిని తీసుకునే వీలున్నది? ఎకడెకడ రిజర్వాయర్లు నిర్మించాలి? ఇప్పుడున్న ప్రాజెక్టులకు మరింత నీటిని తీసుకొనేందుకు సాధ్యాసాధ్యాలపై కమిటీ అధ్యయనం చేస్తుంది.
• మల్లన్నసాగర్‌ నుంచి గోదావరి జలాలను హైదరాబాద్‌ తాగునీటికి తరలించే గోదావరి డ్రింకింగ్‌ వాటర్‌ సప్లయ్‌ సీమ్‌ ఫేజ్‌-2, ఫేజ్‌-3కి గ్రీన్‌సిగ్నల్‌. గతంలో 15 టీఎంసీలకు ప్రతిపాదించిన ఈ పథకాన్ని భవిష్యత్‌ అవసరాల దృష్ట్యా 20 టీఎంసీలకు పెంచేందుకు ఆమోదం.
• పంచాయతీరాజ్‌, గ్రామీణాభివృద్ధి శాఖలో 588 కారుణ్య నియామకాలకు ఆమోదం.
• కొత్తగూడెంను మున్సిపల్‌ కార్పొరేషన్‌గా అప్‌గ్రేడ్‌ చేసేందుకు ఆమోదముద్ర.
• ములుగు జిల్లా కేంద్రాన్ని మున్సిపాలిటీగా మారుస్తూ నిర్ణయం.