BRS | అప్పులు కాదు.. ఆస్తులు సృష్టించాం!.. ప్రభుత్వ శ్వేతపత్రానికి బీఆర్‌ఎస్‌ కౌంటర్‌

రాష్ర్టాన్ని అప్పుల్లో ముంచారని పేర్కొంటూ బుధవారం రాష్ట్ర శాసనసభలో కాంగ్రెస్‌ ప్రభుత్వం విడుదల చేసిన శ్వేతపత్రానికి విపక్ష బీఆర్‌ఎస్‌ కౌంటర్‌ ఇచ్చింది. గడచిన తొమ్మిదిన్నరేండ్లలో సాధించిన ప్రగతి, సృష్టించిన ఆస్తుల వివరాలతో కూడిన సమగ్ర నివేదికను విడుదల చేసింది.

• 9 ఏండ్లలో భారీగా రోడ్లు, భవనాల నిర్మాణం
• ఎన్నడూ లేని విధంగా అభివృద్ధి, సంక్షేమం
• పారిశ్రామిక రంగంలో భారీగా పెట్టుబడులు
• బీఆర్‌ఎస్‌ పాలనలో ఆధ్యాత్మికతకూ పెద్దపీట
• రాష్ట్ర ఆస్తుల నివేదికను విడుదలచేసిన బీఆర్‌ఎస్‌
• ప్రభుత్వ శ్వేతపత్రానికి కౌంటర్‌గా వివరాలు

BRS | హైదరాబాద్‌, డిసెంబర్‌ 20 (నమస్తే తెలంగాణ): రాష్ర్టాన్ని అప్పుల్లో ముంచారని పేర్కొంటూ బుధవారం రాష్ట్ర శాసనసభలో కాంగ్రెస్‌ ప్రభుత్వం విడుదల చేసిన శ్వేతపత్రానికి విపక్ష బీఆర్‌ఎస్‌ కౌంటర్‌ ఇచ్చింది. గడచిన తొమ్మిదిన్నరేండ్లలో సాధించిన ప్రగతి, సృష్టించిన ఆస్తుల వివరాలతో కూడిన సమగ్ర నివేదికను విడుదల చేసింది. భారీగా రోడ్లు, భవనాలు నిర్మించినట్టు, పెద్ద ఎత్తున పెట్టుబడులను రాబట్టడం ద్వారా భారీగా ఉద్యోగావకాశాలను సృష్టించినట్టు నివేదికలో తెలిపారు. గతంలో ఎన్నడూ లేనివిధంగా రాష్ట్రంలో అభివృద్ధి, సంక్షేమ కార్యక్రమాలను అమలుచేసినట్టు చెప్పారు. బీఆర్‌ఎస్‌ పార్టీ విడుదల చేసిన ఆస్తుల వివేదికలోని ప్రధానాంశాలు..

ఆర్‌అండ్‌బీ ఆధ్వర్యంలో..

• తెలంగాణ రాష్ట్రం ఏర్పడే నాటికి ఆర్‌అండ్‌బీ రోడ్లు 24,245 కిలోమీటర్లు ఉండగా, 32,717 కిలోమీటర్లకు పెరిగాయి. 8,578 కిలోమీటర్ల మేర కొత్త రోడ్లు ఏర్పాటు కాగా, ఇందులో 8,218 కిలోమీటర్లు కొత్తరోడ్లు, 321 కిలోమీటర్లు నాలుగు లేన్ల రోడ్లు, 39 కిలోమీటర్లు ఆరు లేన్ల రోడ్లు ఉన్నాయి. కొత్తగా 382 బ్రిడ్జిల నిర్మాణం జరిగింది.
• జిల్లాలు 33కు పెంచడంతో 30 జిల్లాల్లో రూ.1,649.62 కోట్లతో జిల్లా కలెక్టరేట్ల నిర్మాణం చేపట్టారు.
  ఇందులో ఇప్పటికే 25 కలెక్టరేట్‌ భవనాలు ప్రారంభమయ్యాయి.
• రాష్ట్ర గౌరవానికి ప్రతీకగా 100 ఏండ్ల వరకు పాలనావసరాలకు సరిపోయే విధంగా రూ.617 కోట్లతో బీఆర్‌ అంబేద్కర్‌ తెలంగాణ సచివాలయాన్ని నిర్మించారు. 28 ఎకరాల్లో, ఏడు అంతస్తుల్లో ఏడు లక్షల చదరపు అడుగుల విస్తీర్ణంలో దీని నిర్మాణం జరిగింది.
• అంబేద్కర్‌కు గౌరవ సూచకంగా రూ.146.50 కోట్లతో రాజధాని నడిబొడ్డున 125 అడుగుల ఎత్తైన అంబేద్కర్‌ విగ్రహాన్ని నిర్మించారు.
• తెలంగాణ అమరవీరుల స్మారకాన్ని మూడు ఎకరాల విస్తీర్ణంలో రూ.178 కోట్ల ఖర్చుతో అత్యంత అట్టహాసంగా నిర్మించారు. 150 అడుగుల స్మారకంలో 26 అడుగుల దీపాన్ని ఏర్పాటుచేశారు.

మున్సిపల్‌ శాఖ ఆధ్వర్యంలో..

• 2014కు ముందు 52 మున్సిపాలిటీలు, ఆరు కార్పొరేషన్లు ఉండగా, మున్సిపాలిటీల సంఖ్య నేడు 128కి, కార్పొరేషన్లు 13కు పెరిగాయి.
• జీహెచ్‌ఎంసీలో చెత్త సేకరించే వాహనాలు 2014లో 2,548 మాత్రమే ఉండగా, ప్రస్తుతం వీటి సంఖ్య 4,713కి పెరిగింది. చెత్త సేకరణ కూడా గతంలో రోజుకు 2,675 టన్నులు ఉండగా, నేడు అది 4,356 టన్నులకు పెరిగింది.

పరిశ్రమల శాఖ ఆధ్వర్యంలో..

• 2014 తరువాత రాష్ర్టానికి 3.3 లక్షల కోట్లకుపైగా పెట్టుబడులు రాగా, 22.5 లక్షలమందికి ఉద్యోగ, ఉపాధి అవకాశాలు లభించాయి. 334 చిన్న పరిశ్రమలను పునరుద్ధరించగా, 10,400 ఎకరాల్లో అతిపెద్ద ఫార్మా క్లస్టర్‌ను అభివృద్ధి చేశారు.
• 2014 తరువాత కొత్తగా వచ్చిన పరిశ్రమలు సుమారు 23,000 కాగా, ప్రస్తుత ఆర్థిక సంవత్సరంలో పరిశ్రమలకు బడ్జెట్‌లో కేటాయించిన నిధులు రూ.5,000 కోట్లు.తొమ్మిదేండ్లలో పరిశ్రమలకు రూ.9,500 కోట్ల ప్రోత్సాహకాలు అందించింది. కొత్త పారిశ్రామికవాడల కోసం ప్రభుత్వం 1.45 లక్షల ఎకరాలు నిర్ధారించగా, ఇప్పటివరకు 28,000 ఎకరాలు కేటాయించారు.

ఆధ్యాత్మిక సంపద..

• ఆలయాల అభివృద్ధికి గడచిన తొమ్మిదిన్నరేండ్లలో రూ.2,800 కోట్లు ఖర్చుచేశారు. యాదాద్రి పునర్నిర్మాణానికి రూ.1,200 కోట్లు వెచ్ఛించారు.

విద్యారంగం..

• 2014కు ముందు 293 గురుకులాలు మాత్రమే ఉండగా, ప్రస్తుతం రాష్ట్రంలో 1022 గురుకులాలు ఉన్నాయి. ఇందులో బీసీ, ఎస్సీ, ఎస్టీ, మైనారిటీ, జనరల్‌ వర్గాలకు సంబంధించిన పాఠశాలలు, ఇంటర్మీడియట్‌, డిగ్రీ గురుకులాలున్నాయి.
• మూడు విడతల్లో 1,240 పాఠశాలల నిర్మాణం జరుగగా, 1,521స్కూళ్లలో సౌరవిద్యుత్తు సౌకర్యం ఏర్పాటు చేశారు. స్కూళ్ల అభివృద్ధి, నిర్మాణం కోసం రూ.7,289.54 కోట్లు ఖర్చుచేయగా, 23,37,654 మంది విద్యార్థులకు లబ్ధి చేకూరింది.

పచ్చదనం..

• రూ.10,822 కోట్లతో 283.71 కోట్ల మొక్కలు నాటారు. ఫలితంగా పచ్చదనం 33.15 చదరపు కిలోమీటర్ల నుంచి 81.81 చదరపు కిలోమీటర్లకు పెరిగింది. హైదరాబాద్‌లో 249 శాతం పచ్చదనం పెరగడం విశేషం.
• 6,298 ఎకరాల్లో పల్లె ప్రకృతి వనాలు ఏర్పాటు చేశారు. 109 అర్బన్‌ ఫారెస్టులు, 1,00,691 కిలోమీటర్ల పొడవునా రహదారి వనాలను ఏర్పాటుచేశారు. 13.44లక్షల ఎకరాల్లో అటవీ పునరుద్ధరణ చేశారు.

జల భాండాగారం కాళేశ్వరం

• ప్రపంచంలోనే అతిపెద్ద లిఫ్ట్‌ ఇరిగేషన్‌ ప్రాజెక్టును నిర్మించారు. ఇందులో భాగంగా మూడు బ్యారేజీలు, 15 రిజర్వాయర్లను నిర్మించారు. దీంతో కొత్తగా 7,27,968 ఎకరాల భూమి సాగులోకొచ్చింది. సాగునీటి విస్తీర్ణం 137 శాతం పెరిగింది.
• ఉమ్మడి మహబూబ్‌నగర్‌, రంగారెడ్డి జిల్లాలకోసం రూ.35 వేల కోట్లతో పాలమూరు రంగారెడ్డి ఎత్తిపోతల పథకాన్ని చేపట్టారు. దీంతో 12.30 లక్షల ఎకరాలకు సాగునీరు, 1,226 గ్రామాలకు తాగునీరు అందనున్నది. ఇందులో భాగమైన నార్లాపూర్‌ పంప్‌హౌస్‌ ఇప్పటికే ప్రారంభమైంది.

ఆరోగ్యంలో..

• 2014లో 17,400 దవాఖాన బెడ్స్‌ ఉండగా, నేడు వాటి సంఖ్య 34,000కు పెరిగింది. ఆక్సిజన్‌ బెడ్ల సంఖ్య 30 రెట్లు పెరిగి 34,000లకు చేరింది. ఐసీయూ కేంద్రాలు 80కి, డయాలసిస్‌ కేంద్రాలు 82కు పెంచారు. కొత్తగా 500 బస్తీ దవాఖానాలను ఏర్పాటు చేశారు.
• అల్వాల్‌, ఎర్రగడ్డ, గడ్డిఅన్నారంలో 1,000 పడకల చొప్పున, గచ్చిబౌలిలో 1,261బెడ్లతో టిమ్స్‌లను అభివృద్ధి చేశారు. రూ. 1,571 కోట్లతో నిమ్స్‌ను 2,000 పడకలకు విస్తరిస్తున్నారు.
• వరంగల్‌లో రూ.3,779 కోట్లతో 15 ఎకరాల్లో 24 అంతస్తుల్లో 2000 పడకల సూపర్‌ స్పెషాలిటీ హాస్పిటల్‌ను అభివృద్ధి చేస్తున్నారు. ప్రస్తుతం నిర్మాణం తుదిదశలో ఉంది.
• కేంద్రం నుంచి తెలంగాణకు మొత్తం రూ.1,43,061 కోట్లు రావాల్సి ఉన్నది.
• ఎఫ్‌ఆర్బీఎం తగ్గింపు వల్ల – రూ.26,425 కోట్లు
• విద్యుత్తు సంస్కరణలు (2020-24) – రూ.21,171 కోట్లు
• 15వ ఫైనాన్స్‌ కమిషన్‌ సిఫారసులు – రూ.894 కోట్లు
• 14వ ఫైనాన్స్‌ కమిషన్‌ బాకి – రూ.817 కోట్లు
• 15వ ఫైనాన్స్‌ కమిషన్‌ (స్టేట్‌ సెక్టార్‌ స్పెసిఫిక్‌) – రూ.5,374 కోట్లు
• పన్నుల్లో వాటా 41 శాతం కరెక్ట్‌గా ఇచ్చి ఉంటే – రూ.44,052 కోట్లు
• ఏపీ నుంచి విద్యుత్తు బకాయిలు – రూ.17,828 కోట్లు
• 2014-15లో ఏపీకి మళ్లించిన సీఎస్‌ఎస్‌ నిధులు – రూ.495 కోట్లు
• విభజన చట్టం ప్రకారం రావాల్సిన ప్రత్యేక నిధులు – రూ.1,800 కోట్లు
• మిషన్‌ భగీరథకు నీతి ఆయోగ్‌ సిఫారసులు – రూ.19,205 కోట్లు
• మిషన్‌ కాకతీయకు నీతి ఆయోగ్‌ సిఫారసు – రూ.5,000 కోట్లు
• మొత్తం రూ.1,43,061 కోట్లు
• మిషన్‌ భగీరథ కోసం రాష్ట్ర ప్రభుత్వం రూ.27,838 కోట్లు రుణం సేకరించింది. ఇందులో అసలు, వడ్డీ చెల్లించగా ఇంకా రూ.20,200 కోట్లు మాత్రమే పెండింగ్‌ ఉన్నది.
• మెడికల్‌ కాలేజీలను 3 నుంచి 33కి, ఎంబీబీఎస్‌ సీట్లను 2,850 నుంచి 8515కు, ప్రభుత్వ ఎంబీబీఎస్‌ సీట్లను 850 నుంచి 3,915కు పెంచారు.

శాంతిభద్రతలు..

• వరల్డ్‌ క్లాస్‌ పోలీసింగ్‌ కోసం రూ.585 కోట్లతో హైదరాబాద్‌లో పోలీస్‌ కమాండ్‌ కంట్రోల్‌ సెంటర్‌ను నిర్మించారు. రాష్ట్రవ్యాప్తంగా 137 పోలీస్‌ భవనాలు, రూ.654.50 కోట్లతో కొత్త జిల్లాల్లో జిల్లా పోలీసు అధికారుల కార్యాలయాలను నిర్మించారు.
• 10 ఏండ్లలో 10.13 లక్షల సీసీ కెమెరాల ఏర్పాటుతోపాటు పోలీసు వాహనాల సంఖ్యను 20,115కి పెంచారు.

సంక్షేమం..

• ఎస్సీల సంక్షేమానికి రూ.70,965.75 కోట్లు ఖర్చుచేస్తే, ఎస్టీల సంక్షేమానికి రూ.37,779.79 కోట్లు వెచ్చించారు.
• దళితబంధు ద్వారా కుటుంబాలకు రూ.10 లక్షల చొప్పున సహాయం చేస్తున్నారు.
• గొల్ల కురుమల కోసం రూ.5,000 కోట్లతో గొర్రెలను పంపిణీ చేశారు.

రైతు సంక్షేమం..

• రైతుబంధు ద్వారా రూ.72,817.04 కోట్ల పెట్టుబడి సహాయం రైతులకు అందించారు. చనిపోయిన 1,08,051 మంది రైతు కుటుంబాల కు రైతుబీమా ద్వారా రూ.5,402.55 కోట్ల పరిహారం అందించారు.
• రూ.572.22 కోట్లతో 2,601 రైతు వేదికలు నిర్మించారు. సాగు విస్తీర్ణం 1,31,34,000 ఎకరాల నుంచి 1,98,37,000ఎకరాలకు పెరిగింది.
• వరిసాగు విస్తీర్ణం 97 శాతం పెరిగి 97,97,785 ఎకరాలకు చేరింది. పత్తి సాగు విస్తీర్ణం 10 శాతం, కందుల సాగు విస్తీర్ణం 19.34 శాతం పెరిగింది.