అబ్బాయిలు ప్రైవేట్‌కు.. అమ్మాయిలు సర్కార్‌ బడికి

రాష్ట్రంలో 21వ శతాబ్దంలోనూ లింగ వివక్ష కనిపిస్తున్నది. అబ్బాయిల పట్ల ఒకరకంగా.. అమ్మాయిల పట్ల ఒక రకంగా వ్యవహరించే తల్లిదండ్రులు ఇంకా ఉన్నారు. పాఠశాల విద్యలో విద్యార్థుల ఎన్‌రోల్‌మెంట్‌ లింగ వివక్షకు నిదర్శనంగా నిలుస్తున్నది.

• 21వ శతాబ్దంలోనూ లింగ వివక్ష
• పాఠశాల విద్యలో అసమానతలు
• వివక్ష ప్రదర్శిస్తున్న తల్లిదండ్రులు
• వెల్లడించిన 2026 యూ డైస్‌ నివేదిక

హైదరాబాద్‌, మార్చి 14 (నమస్తే తెలంగాణ) : రాష్ట్రంలో 21వ శతాబ్దంలోనూ లింగ వివక్ష కనిపిస్తున్నది. అబ్బాయిల పట్ల ఒకరకంగా.. అమ్మాయిల పట్ల ఒక రకంగా వ్యవహరించే తల్లిదండ్రులు ఇంకా ఉన్నారు. పాఠశాల విద్యలో విద్యార్థుల ఎన్‌రోల్‌మెంట్‌ లింగ వివక్షకు నిదర్శనంగా నిలుస్తున్నది. కొందరు తల్లిదండ్రులు అబ్బాయిలను ప్రైవేట్‌ స్కూళ్లకు, అమ్మాయిలను సర్కార్‌ బడులకు పంపిస్తున్నా రు. సర్కార్‌ బడుల్లో 52% అమ్మాయిలుంటే.. ప్రైవేట్‌ స్కూళ్లల్లో 54% అబ్బాయిలున్నారు. రాష్ట్రంలో లింగ వివక్ష ఇంకా పూర్తిగా తొలగి పోలేదనేందుకు ఈ గణాంకాలే తార్కాణంగా నిలుస్తున్నాయి. 2026 యూనిఫైడ్‌ డిస్ట్రిక్ట్‌ ఇన్ఫర్మేషన్‌ సిస్టం ఫర్‌ ఎడ్యుకేషన్‌ (యూ డైస్‌) నివేదికలో ఈ అంశం వెలుగుచూసింది.

అబ్బాయిలు 4 లక్షల మంది ఎక్కువ…

సర్కార్‌ బడుల్లో (గురుకులాలు, కేజీబీవీలు, మాడల్‌ స్కూల్స్‌) అన్ని కలిపితే విద్యార్థుల సంఖ్య 26,81,580 ఉండగా, వీరిలో 13.94 లక్షలు (52%) అమ్మాయిలున్నారు. సర్కార్‌ బడుల్లో అబ్బాయిల సంఖ్య 12,87,158(48%) మాత్రమే. అదే ప్రైవేట్‌స్కూళ్లల్లో మొత్తం 47,51,692 లక్షల మందికి అబ్బాయిలు 26.73(54%) లక్షలుండగా, అమ్మాయిలు 22.77(46%) లక్షలు మాత్రమే. అంటే రాష్ట్రంలోని ప్రైవేట్‌ స్కూళ్లల్లో అమ్మాయిలతో పోల్చితే అబ్బాయిలు 4 లక్షల మంది ఎక్కువగా చదువుతున్నారన్నమాట. అన్ని రకాల సర్కార్‌ బడులు 28,033 ఉండగా, వీటిల్లో విద్యార్థుల సంఖ్య 26 లక్షలుండగా, ప్రైవేట్‌ స్కూళ్లు 13,244 ఉండగా, వీటల్లో ఏకంగా 49.51లక్షల మంది విద్యార్థులున్నారు. యాజమాన్యాలవారీగా తీసుకొంటే సర్కార్‌ బడుల్లో 35% విద్యార్థులుంటే, ప్రైవేట్‌ స్కూళ్లల్లో 65% విద్యార్థులున్నారు.

డిగ్రీ సైన్స్‌లో అమ్మాయిలు.. ఆర్ట్స్‌లో అబ్బాయిలు

రాష్ట్రంలో డిగ్రీ కోర్సుల ఎంపికలోనూ లింగ సమానత్వం కనిపించడంలేదు. ఈ కోర్సుల్లో పరిస్థితులు భిన్నంగా ఉన్నాయి. సైన్స్‌ కోర్సుల్లో అమ్మాయిలు అధికంగా చేరుతుండగా, ఆర్ట్స్‌ కోర్సుల్లో అబ్బాయిలు ఎక్కువగా అడ్మిషన్లు పొందుతున్నారు. బీఎస్సీ గ్రూపులో 64% మంది అమ్మాయిలుంటే, అబ్బాయిలు కేవలం 36% మాత్రమే ఉన్నారు. ఇక బీకాం కోర్సుల్లో అబ్బాయిలు 54శాతముంటే, అమ్మాయిల వాటా 46% మాత్రమే. బీఏ కోర్సుల్లో అబ్బాయిలు 58% అడ్మిషన్లు పొందితే, అమ్మాయిలు 42% మాత్రమే ఉన్నారు.

సామాజిక వర్గాలవారీగా..

• ఎస్టీ కులాలకు చెందిన విద్యార్థుల్లో అత్యధికులు బీఏ కోర్సుల్లో చేరుతున్నారు. 36% మంది బీఏ కోర్సుల్లో అడ్మిషన్లు పొందారు.
• ఎస్సీ, బీసీ కులాలకు చెందిన వారు బీఎస్సీ కోర్సును ఎక్కువగా ఇష్టపడుతున్నారు. ఈ కోర్సులో ఏకంగా 45%
  ఎస్సీలు, బీసీలే ఉన్నారు.
• ఓసీ కులాలకు చెందిన వారు బీకాం కోర్సుల్లో చేరుతున్నట్టు గణాంకాలు వెల్లడిస్తున్నాయి. 40% మంది ఓసీలు బీకాం కోర్సుల్లో చేరడం విశేషం.

కారణాలు

• అబ్బాయిల భవిష్యత్తు కోసం మంచి చదువులు అవసరమన్న భావనలో ఉండే కుటుంబాలు ఇంకా ఉన్నాయి.
• ప్రైవేట్‌ స్కూళ్లల్లో చదువులు ఖరీదైనవి కావడంతో ఫీజులు భరించలేక కొన్ని కుటుంబాలు అబ్బాయిలను ప్రైవేట్‌కు పంపించి, అమ్మాయిలను సర్కార్‌ బడులకు పంపిస్తున్నారు.
• ఇంకా కొన్ని సమాజాలు అమ్మాయిల విద్యకు తక్కువ ప్రాధాన్యం ఇస్తున్నాయి. అమ్మాయిలకు ఖరీదైన చదువులెందుకు అన్న భావనలో ఉన్న వారింకా ఉన్నారు. అమ్మాయిలు ఇంటి పనులు నేర్చుకోవాలనే అభిప్రాయం ఇంకా ఉంది.
• తరగతులవారీగా మొత్తం ఎన్‌రోల్‌మెంట్‌ (శాతం) వివరాలను పరిశీలిస్తే 1-5 తరగతుల్లో సర్కార్‌ బడుల్లో 8,58,106 (32%)విద్యార్థులుంటే, 6-12 తరగతుల్లో 18,23,474 (48%) విద్యార్థులున్నారు.
• ప్రైవేట్‌ బడుల్లో 1-5 తరగతుల్లో 33,67,150 (68%) విద్యార్థులుండగా, 6-12 తరగతుల్లో 15,84,542 (52%)
  విద్యార్థులున్నారు.